自己下面痕，分泌物有啲黃，打咗俾廣華嗰邊留言話兩個工作天內打嚟，又打咗俾家計會話只係提供少量藥物去治療，搞唔掂就會轉介去政府醫院。普通家庭醫生嗰啲有冇得睇？定應該等埋廣華？還是book咗家計會先(最快要等到下星期先有位)？
Hello
陰部痕癢同埋有偏黃嘅分泌物都有唔少原因導致嘅，例如性病感染、非性病嘅陰道感染、或者因為清潔不當／抵抗力不足導致陰道發炎。明白呢種感覺好唔舒服，同埋你好擔心。不過單憑你文字嘅描述，我哋都未能夠好準確咁去判斷究竟係邊一個原因導致感染。所以，都建議你盡快去睇醫生，一般嚟講，陰道感染可以通過抗生素療程／揸藥膏／陰道塞藥治療，醫生會根據你嘅情況被適合你嘅藥物，不過記得要依照醫生指示，用晒成個療程，千祈唔好覺得症狀好轉就自己停藥，如果唔係之後會更加容易難斷尾㗎。 
而睇醫生嗰度，如果公立醫院的確等候時間會比較長，所以你可以考慮要唔要等廣華排期。而家計會會提供化驗同藥物治療服務嘅，如果有需要可以盡快去預約。如果你係26歲以下未婚嘅，可以預約青少年保健中心：青少年保健 - 香港家庭計劃指導會 ；如果你26歲以上，可以去家計會診所：婦女健康服務 - 香港家庭計劃指導會 。而如果你唔想等，想盡快睇到醫生，都可以去部份私家診所／醫療機構求診，價錢可能比家計會同公立醫院貴。而你都可以考慮去母嬰健康院預約（家庭健康服務 - {page_title} ），不過有機會都要等一段時間先排到期。或者你都可以去社會衛生科診所（衞生署-診所及健康中心一覽表-提供社會衞生科(女性)服務的診所 ），佢哋提供性病／陰道感染檢查、治療及輔導；合資格人士免費，而且毋須預約。你可以根據你嘅需要去最適合你嘅地方求診。 
而喺等待見醫生期間，記得唔好自行服藥或者搽藥呀，以免用咗唔適合嘅藥物，反而為身體帶嚟負擔。同埋記得完成好嘅性器官護理習慣，每日用清水溫和溫柔地清潔，尤其記得清潔大小陰唇之間嘅位置；盡量穿著棉質乾淨嘅底褲，同埋鬆身嘅下身衣物；勤換月事產品；去完廁所之後由尿道口抹向肛門。
同埋喺康復之前唔好發生性行為住，而如果之後再發生性行為，都建議全程正確使用安全套，減少性病傳播或者其他感染（例如尿道炎／陰道炎）嘅風險。關於安全套正確使用方法，可以參考：https://www.instagram.com/p/B4EX0FVFLUf/?utm_source=ig_web_copy_link