關於避孕藥

第一次食避孕藥,係黎m第三日開始食,通常黎七日,而家完m後第三日仲keep有深啡色嘢出黎,想問係咪正常架??好驚keep住流嘢出黎

另外再想問,我第一次食,係咪食左頭七日就開始有避孕作用架啦?

Hello @iloveu1989

首先同你講返啦,荷爾蒙避孕法嘅原理係透過人造荷爾蒙抑制排卵,增加子宮頸分泌物黏稠度,阻止精子通過,阻止受精,改變子宮內膜環境,令受精卵難以著床。如果由你食藥當日開始至今已經超過7日,期間又無漏食或者出現嚴重嘅副作用(例如嘔吐),咁其實身體已經開始適應藥效,會有避孕嘅效果。

第一次食事前避孕藥通常會需要一至三個月嘅適應時間,視乎每個人嘅身體狀況,呢個適應期都會有短有長。服用初期亦可能會有噁心、頭暈、頭痛、乳房脹痛、水腫及情緒轉變等嘅情況出現,但一般會係慢慢減退消失。而你所講仲keep有深啡色嘢出黎,其實係俗稱嘅流啡都係服用事前避孕藥後常見嘅情況,唔需要咁擔心。服用避孕藥嘅其中一個功能,係幫助我地調整經期。透過控制體內嘅荷爾蒙含量,令我地嘅經期調整作28日嘅月經週期 。服用初期,可能身體喺適應階段時,會出現不規律嘅陰道出血,或者月經週期日數會比較唔穩定。但係隨著慢慢適應,經期一般就會變得穩定~ 所以都無需太擔心服用避孕藥後,會長期影響月經週期變得唔穩定啊~ 不過,如果覺得副作用太強,承受唔到,都可以考慮一下轉換其他牌子。因為市面上有嘅事前避孕藥有好多唔同牌子,每種所含嘅荷爾蒙種類同劑量都有所不同,加上每個人身體狀況都唔一樣,有好多人都未必係食第一個牌子就完全適應到架。

另一方面,雖然事前避孕藥係香港係唔需要醫生處方就可以買到,但因為有咁多唔同選擇,而且其實唔係所有人嘅身體狀況都適合用藥物去避孕(例如有心血管疾病、肥胖、長期食藥等等情況嘅人都係唔適合嘅),所以都會建議大家係服食之前先搵醫生做檢查,同埋聽取醫生嘅建議去選擇適合嘅牌子。如果你食藥之前無徵詢過醫生嘅意見,都可以考慮一下去家計會嘅診所預約,而且係家計會買藥都會比坊間平一半左右,有咩事亦可以隨時返去覆診。。

希望解答到你。