驗孕陰性 遲嚟m

Hello :frowning: 今年21歲。我一向月經週經係32-35日 我係10月10日第一日嚟m,10月16日進行咗性行為 戴咗套 男方亦無射到。 因為一遲嚟m 太緊張,所以係11月11日同11月15日都驗咗孕 顯示陰性。請問係懷孕嘅機會大唔大啊?有冇方法可以快啲嚟m:( 真係好擔心

我哋事後無檢查到個套有冇穿

Hello~ 因為我地喺WhatsApp都收到個同你嘅情況好相似嘅查詢,所以想提提你如果係嘅話只需要喺一個平台上面問就可以喇,我哋嘅同事會盡快回覆返你嘅,謝謝:blush:

如果喺整個性行為期間有使用安全套嘅話,懷孕嘅風險係好低嘅,唔洗太擔心:blush: 加上你已經進行驗孕,因為驗孕棒係透過檢測尿液中嘅hCG (人絨毛膜促性腺激素)含量,呢款激素會係受精卵著床後開始大量分泌,而一般受精著床呢個過程需要6-9日,所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確,所以你兩次嘅驗孕都係陰性,就代表係無懷孕架啦:relaxed:

至於月經遲黎方面,月經本身就係可以被不同外在同內在因素影響嘅事,例如病過、食過藥、情緒有起伏、有壓力、生活作息有明顯改變等等,都係可以導致荷爾蒙水平有變動,從而影響到月經周期嘅原因。有時即使冇發生過一啲明顯嘅變化,月經周期都係可以有變動嘅!唔係話每一個人每一個月嘅月經周期都會一模一樣,亦好少係每個月都同一日嚟月經。所以即使月經日子同預期嘅有差距都唔需要太擔心阿!

建議你先嘗試放鬆心情,調節好作息時間同飲食習慣,都有助維持月經嘅規律嘅:blush: