停止服用21粒避孕藥後 幾時會嚟m?

之前有食開21粒嘅避孕丸 食咗差唔多兩年幾左右 上個月10號食完最後一粒之後就冇再食 到咗14號-18號有嚟到m 但係到今日都仲未嚟M 已驗孕兩次都係一條線:pleading_face:
想問下大約幾時會回復正常一個月一次嫁:pleading_face:

Hello

聽你嘅描述,你食嗰隻21粒裝應該係屬於混合荷爾蒙避孕丸(含雌激素及黃體酮),理論上好處係可以令月經變得規律化,但因為你已經停左藥,所以冇咗藥效都正常呀,而且身體都需要啲時間去適應,大概一至三個月先會嚟返M。

同埋經期會受唔同因素影響,例如最近呢個月有食過藥、飲食唔均衡、生活唔定時、情緒有起伏、壓力過大等等… 都會令黎月經週期變長/變短。 所以我哋都好難答到實質嘅時間呀。建議呢段時間都用返安全套等避孕措施避孕,注意作息調理一下身體,唔使太擔心呀:)

另外外國暫時普遍黎講都有指出注射疫苗,有機會對月經週期產生影響 ,原因係子宮內膜內都含有免疫細胞,注射疫苗有機會令子宮內膜內嘅免疫細胞有反應,有機會延遲月經週期。

再者,事前避孕藥都未必係個個適合用/或者而家食緊嗰隻未必係最適合自己,因為每個牌子嘅劑量不一,建議可以向醫生查詢返,選擇最適合自己嘅藥。

不過聽你講話驗左孕兩次都係一條線,呢點我哋可以放心先,懷孕嘅可能性比較低。如果真係好擔心,都可以考慮睇醫生攞多個意見,一嚟放心啲,二嚟如果係其他因素嘅話都可以盡快作處理。

最後有一點都值得我哋注意,因為我哋要等月經出現先可以推算返嗰個週期,所以我地難以準確預測「安全期 / 危險期」,佢並唔係一個好有效嘅避孕方法呀。

希望解答到你