仲未黎M,見到唔該幫幫手

今個月因為智慧齒發炎所以去左睇醫生有食特效消炎藥同抗生素。(係10月31號夜晚開始食藥,直至11月5號左右就食完啦)
五日份量,每4個鐘頭食一次所以都食得幾密下,
今個月有sex 一次,前面無帶套入左陣,之後有帶,射係套裡面。
我本身17號左右就會黎M 但到而家都仲未黎,
就想問下其實係咪D藥影響到我定我有左BB

我身體係有黎M前既症狀
例如我有谷住谷住,又有肚all
脾氣都好差 呢d之前黎M之前都有
但就一直未黎月經
好驚 本人21歲 請問我應該點做?

Hello @Niceqq

  1. 其實月經係由身體幾個繁複嘅系統互相配合而形成,所以月經會受好多唔同身體因素影響嘅,例如荷爾蒙水平、休息時間係咪足夠、心理壓力、長期熬夜、生活習慣改變、服用過藥物、長期處於擔心狀態等等。即使你平時嘅經期相對比較穩定,但唔代表每次嘅月經情況都一定會一樣。如果你今個週期病過食過藥/特別大壓力等等都可能會對月經造成影響。至於你所講,你今個週期有食過藥,通常消炎藥同抗生素會對荷爾蒙造成較為明顯嘅影響,以致有機會影響到月經週期。另一方面,即使醫生冇俾消炎藥/抗生素你食,智慧齒發炎期間免疫系統好努力咁幫你對抗緊,身體其他系統都可能會被影響,月經都可能因此受到影響。所以,平時我哋用一啲apps或者計日子嘅紀錄未必係100%準確,因為apps通常係以你過往嘅月經週期pattern去估計你將來嘅經期,但係app並唔會知道你成個週期/將來嘅身體狀況(例如佢唔會知你呢幾日病咗食過藥),所以未必可以好準確咁話俾你知究竟幾時月經會出現。同樣道理,計日子亦都唔能夠好準確咁推算到幾時會有月經。

  2. 但係有關性行為既部分,其實陰莖係性興奮或受性刺激嘅時候通常會分泌出一啲透明而黏稠液體-尿道球腺液(Pre-cum),當中有機會含有少量精子。雖然比直接在陰道內射精的數量少很多,但直接接觸陰道的話仍然有機會導致懷孕。其實即係任何情況,或者任何時段,只要性器官之間有直接接觸過嘅話呢,就會有一定懷孕同性病傳播嘅風險。再加上你今個月病過食過藥,相對上都會更加難去預算排卵嘅日子,亦會更加難去預料可能有嘅懷孕風險。

所以都想問下你所講嘅性行為已經發生咗幾耐? 如果未超過72/120小時嘅其實可以考慮食事後丸去做緊急避孕:

事後丸有分兩隻: 一隻係屬於單一荷爾蒙(72小時之內食),另一隻係黃體激素受體劑(性交後120小時之內食)。事後丸係香港係屬於醫生處方藥物,所以如果你覺得有需要,可以考慮去家計會診所或者普通私家門診求醫,醫生係判斷你嘅身體狀況適合食藥後先會處方藥物俾你。不過,食完事後丸都有機會出現有唔同嘅副作用,例如係頭暈丶噁心丶疲倦丶經痛等等… 甚至影響下一次月經嘅日子同埋血量,所以都要有定心理準備。

如果性行為已經發生咗超過120小時或者唔考慮食事後丸的話,可以考慮驗孕,喺性行為7日後驗孕已經可以有初步結果,而喺性行為11日後或預計月經驗孕,結果就會比較準確同埋可靠,到時就更加放心。

另外,下次性行為時記住只要性器官有接觸的話都需要使用安全措施!亦可以考慮使用安全套以外嘅避孕方式,例如事前避孕藥丶避孕針丶子宮環等等。

我睇返我食既藥,其實好多 消炎藥已經有20幾粒
特效消炎藥有10粒 所以真係食左好多藥 仲有胃藥 同埋消腫藥都係醫生開。
至於性行為時間方面已經係10月24日有的
我10月的月經是10月17日至10月22日
即係月經完咗第二日有性行為
請問咁樣中招機會大嗎?

Hello
我哋之前解釋咗,無論係月經嘅邊一日,只要性器官有接觸,就有一定嘅風險。如果你10月24號發生性行為,暫時唔可以進行有效嘅緊急避孕,你可以首先進行驗孕,預期估估下,好擔憂自己嘅身體狀況,不如真係去驗孕。驗孕係檢驗尿液中嘅hCG水平,hCG係卵子受精著床之後身體會產生嘅一種荷爾蒙,而卵子受精著床需要大概6-9日嘅時間。所以,喺最後一次性行為7日後驗孕會得到初步結果,而11日之後就會得到相對比較準確嘅結果啦。你今日去買驗孕棒,根據包裝/說明書嘅指示正確咁驗孕,就會得到準確可靠嘅結果嘅。 :blush:

排除咗懷孕嘅可能,就可以嘗試下放鬆心情,等月經到。我哋之前亦解釋過,月經會受好多唔同身體因素影響。的確有幾款消炎藥同抗生素會影響經期;亦加上你智慧牙發炎期間可能食得少咗/清淡咗,飲食習慣嘅改變都可能令月經出現變化㗎。同埋唔係每人每次嘅月經週期都一定係一樣嘅。 :wink:

下次記得發生性行為嘅整個過程都要使用安全措施呀! :sparkling_heart:

驗左無bb,但月經都係無黎 … 唉

距離你上一次發生性行為嘅日子已經差不多一個月,使用驗孕棒檢查已經可以達到準確結果。只要你有按照說明書去使用,咁驗孕結果顯示係無懷孕的話咁就唔需要太擔心啊!

@Gabi_StickyRiceLove@Ching_StickyRiceLove 都有提過有好多因素可以影響月經,而你所服用嘅抗生素同消炎藥都係常見會影響月經嘅原因。即使你冇發生過性行為,單單係服食藥物都已經可以令月經出現變化。加上而家驗孕結果係冇懷孕,可以排除係因為懷孕而導致月經冇嚟嘅可能性。

不如嘗試放鬆一下心情,或者搵啲其他活動去轉移自己嘅注意力,因為情緒起復都係會對月經做成影響嘅,有時越擔心越緊張反而會令月經更加遲出現。盡量放鬆心情,保持健康嘅作息,令身體維持係穩定嘅狀態,月經好快就會出現架啦 :muscle:t2: :muscle:t2:

多謝你安慰我啊
唉 唔敢問身邊d 朋友
11月剩返兩日 其實建議我去睇醫生嗎?
醫生會唔會幫到我架?

明白你有好多嘅擔憂同埋疑慮,而我哋都同你解釋過,如果你有正確使用驗孕棒,你嘅驗孕結果係好可靠嘅。你可以嘗試同自己講「我無懷孕」,做下其他嘢令到自己放鬆啲。 :wink:而我哋都有解釋過,月經週期會受好多唔同因素影響,你之前智慧牙發炎、服用抗生素呢啲身體上嘅改變都會影響月經,甚至你不停擔心呢啲緊張嘅情緒同精神壓力都會令到月經受到影響。所以可能你都要想試下改變自己嘅諗法,唔係話月經同平時唔同就代表一定係有問題嘅。

如果你真係覺得好困擾,你可以去睇醫生,醫生會視乎你嘅情況決定需唔需要處方催經嘅藥物俾你。如果你覺得睇醫生,諮詢下醫生嘅建議會令到你安心嘅,不妨去咁做。你可以去預約家計會/母嬰健康院/部分私家診所嘅醫生呀。 :woman_health_worker:t2: :man_health_worker:t2:

明白可能有時「性」呢個話題唔係咁容易同朋友講,但性係生活中好正常嘅一部分,唔需要覺得羞恥嘅。當然如果你未準備好同朋友展開呢個話題嘅,都可以隨時搵我哋傾㗎。 :sparkling_heart:
或者即使唔係同朋友講你嘅憂慮,同佢哋見吓面,可能都幫助到你舒緩壓力。放鬆下心情,月經會出現嘅。