除咗家計會，普通診所會唔會有得打？
因為家計會要排期 去到出年 
普通既診所會唔會有得打？
係唔係一定要m緊個陣先打得？因為岩岩M完
Hello
某啲普通診所都有提供避孕服務嘅，即係可以注射避孕針，不過唔係個個診所都有呢個服務，所以建議你去之前問清楚，或者提前打電話詢問預約。 
母嬰健康院亦有避孕針注射服務，不過可能都需要排期，你可以打去方便你嘅母嬰健康院問下有冇得打。
通常避孕針係需要喺月經週期頭7日內注射，亦有啲醫生會建議要經期流血期間，確保無懷孕嘅情況下注射；不過亦有啲醫生會根據你嘅身體情況，了解你有冇懷孕嘅機會，如果冇風險嘅話，即時唔係月經頭7日，都可以幫你注射，不過如果係咁，喺注射完嘅7日內如果發生性行為，就需要使用安全套作為額外嘅安全措施。你可以預約嘅時候問清楚你而家嚟完m，醫生係咪都同意幫你注射。 
我問左屋企附件既診所啦 有得打
要M到第一日就打 個護士就話要打第二針先會有效
但我上網睇 好多都話係打針後48小時已經會有藥效
當然 如果打左我都一定會用condom (諗住雙重保護 
咁如果個個月打完針 隔個幾兩個星期左右同男友搞 會唔會高風險？
Hello
首先避孕針一般分為兩種：單一荷爾蒙同埋混合荷爾蒙。
- 單一荷爾蒙：主要成份係黃體酮，每三個月需要注射一次。
- 混合荷爾蒙：主要成份有黃體酮同埋雌激素，每一個月需要注射一次。
第一次打針的話，如果係月經頭5日內打避孕針，原則上避孕功效會即時開始係身體內建立，不過因為唔同人對避孕針嘅反應都唔一樣，都唔建議打針後就即時發生性行為。一般都會建議打針後最少頭7日避免發生插入式性行為或者必須要同時使用安全套。打針後你可以留意一下身體情況，如果有比較嚴重嘅副作用，例如昏迷、四肢麻痹等等，就要盡快同醫生聯絡進行檢查，亦都唔好發生性行為住！
至於診所姑娘所講係第2針之後先有藥效，有機會係基於評估過你嘅身體狀況後而作出嘅建議，又或者係希望保守啲，觀察一個月確保真係身體適應打針嘅藥效。你可以按自己嘅情況去選擇幾時發生性行為阿～不過如果你無論如何都會同時使用安全套的話，其實都係可以照進行嘅！
但要留意，唔係所有人都適合注射避孕針，例如有不正常子宮出血，有內分泌疾病，需長期服用類固醇等嘅人都唔適合注射避孕針。而且無論係注射單一定係混合荷爾蒙避孕針後都會出現不同嘅副作用，例如骨質疏鬆，體重增加，乳房脹痛，頭痛等，所以建議你先向醫生了解自己嘅身體狀況，睇吓自己適唔適合注射避孕針。
至於你提及，注射避孕針後同伴侶發生性行為呢，好欣賞你都會使用安全套啊
咁因為係月經頭5日內注射避孕針後身體已經會開始有即時避孕效果，係7日或以上之後再發生性行為的話都係相對安全嘅。而且研究數字上，注射兩種避孕針後頭一年會意外懷孕嘅機會只有0.2-6%，而好多時都係因為冇定時去打針先會令藥效下降。所以只要定時打針，基本上懷孕嘅風險都好低，唔使擔心～
為咗避免延誤下一針嘅藥效，要盡量按照診所嘅覆診日期返去打針。如果真係去唔到，就要打返去診所問一問可以提早幾多日去打，一般早1－3日到冇問題嘅！