飛滋會染到性病嗎?

App上識人,拖手同錫咗,冇激吻,佢有伸脷。
當時覺得佢口有啲臭(唔知有冇口腔牙齦發炎問題)
我有粒痱滋,已經唔太清楚係當時已有,定今日先有生,但我知係我食嘢咬親而生嘅。

事後先起底發現佢係2019年嘅強姦犯 (費事開名 始終人總有改過嘅機會)
起疑心係因為佢好多大話。咁新聞話佢疑似有性病,係啲被害人講嘅。

1) 我立即去check 定需要等一段時間過咗空窗期先?
2) 錫得唔太耐 機會微嗎?(暫當佢係有性病)

**3)**有比較平宜嘅診所可以驗嗎?

謝謝:pray:t2:

當有高風險體液,例如精液、尿道球腺液(陰莖受到刺激嘅時候會分泌透明嘅尿道球腺液)、陰道分泌物、腸液同血液等,接觸到性器官同比較脆弱嘅黏膜組織(例如口腔、肛門、尿道口),特別係當上面有開放性傷口(正在流血)先會有比較大機會可以造成性病傳播。如果你嘅接觸係親吻,高風險體液同你嘅性器官/傷口冇接觸,感染性病嘅風險係好低嘅。 希望你了解完之後可以放鬆啲。 :relaxed:

如果你好擔心嘅話,你都可以去做個全面嘅性病測試,社會衛生科、家計會診所、部分私家診所或者醫療機構都有呢個服務,有需要可以去預約。提返你預約做檢測之前要問清楚需要等待嘅「空窗期」有幾耐,即係距離對上一次性接觸後幾多日做測試會有比較準確嘅結果。通常家計會、社會衛生科會要求3個月空窗期;某啲私家診所提供空窗期較短嘅測試,2星期左右已經可以做。其實如果有發生過性行為,尤其係高危性接觸(例如無套陰道陰莖交),都應該恆常進行性病測試,了解返自己嘅身體狀況。 :wink:

同埋亦都想解釋返,即使你嚟緊做測試發現有性病感染,都唔可以証明一定同呢一次嘅性行為有關。因為性病有潛伏期,而且有啲人感染性病之後並無病徵,有機會係之前感染咗但一直都無發現 :confounded:。所以先會建議要定期做測試。

某啲機構(例如關懷愛滋)有免費嘅HIV同梅毒測試,如果你覺得唔需要做全面測試,只係驗部分性病已經足夠,你都可以去預約。 :blush: