想問下女性見到男性性器官會有咩感覺？會唔會好似男性咁見到女性性器官而出現性興奮?定會覺得好核突？
Hellooo
「女性見到男性性器官會有咩感覺」，呢個我哋都好難一概而論呀。
我自己就覺得視乎情況，例如對方同你嘅關係？咩場合？意願等等… 如果係兩個人情投意合，準備做愛嘅時候見到，我諗應該唔會反感
；調返轉如果知道對方唔願意又要夾硬逼對方睇嘅話，我諗會反感/覺得核突都好正常，始終尊重對方好緊要。
不過如果你話性行為嘅話，撇除有啲人對男性性器官極其反感，否則粗度丶長度丶顏色丶形態丶硬度丶持久丶毛髪多寡可能都會影響對方嘅觀感，始終每個人都有自己嘅喜好。但係如果唔符合對方期望嘅話都唔緊要，溝通是一個好方法- 我都知好行哈哈，但我相信每段關係入面都有佢哋自己獨特嘅溝通方法。如果對方反應不似預期嘅話可能係目前嘅溝通不太有效，可以了解下對方嘅喜好先- 又或者坊間都有唔同嘅性玩具、情趣用品等等都可以配搭技巧（例如凱格爾運動、控射等等…)令性愛過程更加順利&愉悅。不過就算係尺寸丶外形等因素不如對方期望都好，尊重對方先係最緊要！可以問吓點樣令對方舒服啲，對方鍾意啲乜嘢體位丶形式等等…
如果擔心自己有健康顧慮嘅話，都可以向醫生請教攞返個專業意見或者及早就醫。
另外，見到你話「好似男性咁見到女性性器官而出現性興奮」
社會加諸咗好多性別定型俾我哋，話俾我哋聽一個男性/女性應該點樣hehave/有啲咩特質。例如女仔應該貞潔啲，如果鍾意性/談論性嘅話會俾人落下「淫賤」呢一個標籤；調返轉，作為男性，我哋成日都不被鼓勵表達自己情緒，否則會被視為不夠masculine (有男子氣概)。 但其實呢啲只係父權所衍生嘅產物，呢啲標籤並不代表你-雖然無可否認呢啲標籤嘅力量係好大- 同時你都可以拒絕被別人落下呢啲標籤。我相信即使你係一個男性都好，你都唔會逢見到女性性器官就一定有性興奮，因為當中都摻雜好多因素，例如你嘅喜好等等… 所以你並不需要標籤埋自己呀:)
希望解答到你啦：）
我見到女性性器官都一定會勃起，咁係咪都算係出現性興奮？
Hello
其實呢個問題有好大嘅討論空間，尤其喺性嘅世界係冇分對與錯，亦都冇一定嘅答案。
性興奮可以指一種被性喚醒，被打開嘅感覺，當你性興奮嘅時候，你嘅身體同情緒都會有變化。你可以係同其他人一齊（例如伴侶）被喚醒，亦都可以喺自己一個嘅時候被喚醒。當然因為有刺激物所以先會有性興奮，呢個位就因人而異啦。有啲人見到性器官或者私人部位就會性興奮，有啲人閱讀到文字（例如重甜文）或者聽到一啲聲音都會性興奮。有啲人甚至唔需要見到或者聽到，喺腦入面幻想都可以有性興奮。相反，有啲人即使見到性器官或者影像都唔會有性興奮，所以每個人嘅刺激物都唔一樣，唔需要覺得自己好易性興奮，就係唔正常或者奇怪。
有好多研究關於不同性別喺性興奮嘅分別，的確有研究透過功能性磁振造影(FMRI)，發現在受到相同影像性刺激時，比起女性，男性對影像性嘅刺激物有更大嘅興趣同反應。呢啲研究可以為我哋帶嚟更多角度思考，但記住唔係一個肯定嘅答案啊
另一方面，性器官有生理反應，例如陰莖會勃起，都可以由不同原因引起。除咗常見嘅性刺激或感到性興奮，其實血液流動多咗、荷爾蒙水平有明顯變動或者有外在嘅磨擦刺激到性器官，都有機會引起生理反應。例如係一啲性暴力或性侵嘅個案當中，受害人係唔情願嘅情況下被強迫刺激性器官，都有機會出現生理反應，例如陰莖會勃起或者陰道有分泌物流出，但呢啲生理反應並唔代表當事人好享受呢個狀態，亦唔會感到性興奮。所以有生理反應都唔代表100%係性興奮架。
不妨問一問自己，當身體係見到女性性器官後出現生理反應時，其實自己當下嘅感受係點樣架呢？係覺得興奮？享受？定係會有懷疑自己或者感到不安？呢啲情緒可能都係一個幫助自己更理解自己同身體之間嘅關係。可能係自我探索嘅階段會遇到好多懷疑嘅地方，但只要你明白我哋每一個人都係特別嘅個體，冇需要同人比較，相信係呢個過程你會更了解自己嘅喜好同需要