事後避孕藥後

在上星期日 21/11 食完事後避孕藥後,今日分泌物呈啡色 係副作用定係?:persevere:

想補充番少少,因為本身自己大慨月頭嚟M,而今日已經有好似M咁嘅血,深紅色 ,仲帶有腹痛,我點樣知呢個係月經定係

Hello

因為食完事後丸可能會令月經提早或者延遲幾日,而你都有提及過自己大概係月頭嚟M,因此唔排除係經血嘅可能呀- 另外,經血嘅顏色因人而異,而且期間亦有機會出現腹痛或腰酸嘅感覺- 呢度唔使太擔心:)

而且月經都受好多唔同嘅因素呀,例如最近呢個月有食過藥、飲食唔均衡、生活唔定時、情緒有起伏、壓力過大等等… 都會令黎月經週期變長/變短。

另外,如果事後丸失效又同時着床性出血(俗稱「假M」)嘅話,都有可能會出現你所講嘅現象。(不過放心呢個同時發生嘅機會率係低嘅)補充多少少先,著床性出血其實係指受精卵着床喺子宮壁時時有機會造成少量出血。通常剩係得幾滴,又或者係一張護墊可以承載嘅血量,而且係一次性唔會連續幾日咁出現,血色同普通月經都唔一樣,一般受精去到着床講緊性行為後6-9日,而呢一個現象亦並非常見,只有好少量女性會出現。如果出血嘅日子距離性行為已經超過九日(見你描述都已經第六日),顏色同平時月經差唔多&keep住咁出血,基本上就可以排除着床性出血嘅可能性。

如果真係好擔心,可以考慮驗孕- 喺性行為11日後驗 。一般受精卵著床需要6-9日,所以性行為7日後驗孕已經可以有初步結果。而性行為11日後驗孕,就會比較準確同埋可靠,到時就更加放心:raised_hands:t6:

最後,即使生活冇大變化都好,都有機會令經期唔同,根據過往規律去推算排卵期&安全期
嘅話好容易出現唔準確嘅情況呀,因此佢並不可靠。

希望解答到你啦,有咩歡迎再問:)

Hello​:cry::cry:我發現今次「月經」只係嚟左2日
但呢2日嘅量都好多,同平時月經頭1/2日差唔多 但我平時M大概有5日左右先完… 其實今次究竟係事後避孕藥嘅副作用所以出血 定係因為副作用令到經期短左 定係著床出血?好驚
同埋平時M前都會有幾個胸部會痛 但今次並冇 只係頭一日到第二日朝早腹部有痛 到而家已經冇任何痛楚
同埋由於想更加安全 所以諗住服用事前避孕藥,之前有服用過但停左 到而家再食,我知道要喺月經頭五日食,我晏晝食左一粒之後發現 夜晚已經冇血 未知係咪月經 我究竟應唔應該繼續食?

幾日*

Hello
如果你流血量都比較大,咁應該唔會係著床出血,我哋之前都有介紹,著床出血嘅流血量會相對比較少,甚至有時只係啡色分泌物。如果你依然好擔心,不妨都進行驗孕,因為暫時冇任何症狀可以好準確咁俾我哋去判斷有無懷孕。你可以睇返對上一次發生性行為嘅時間,性行為7日後驗孕會得到初步結果,而11日後驗孕就會有相對比較準確嘅結果。

排除咗懷孕嘅可能性,咁就可以更加放心啦。 :blush:

而我哋之前都有提及,月經係會受好多唔同身體因素影響,例如荷爾蒙分泌、飲食、壓力、藥物等等。所以每人每次月經嘅月經週期長度、流血日數、流血量、經痛程度、經期或經前不適嘅程度都可能會唔同。即使平時月經週期都相對比較穩定,都唔代表嚟緊嗰次都一定穩定。尤其你有服用緊急避孕藥,係用高劑量嘅荷爾蒙去抑制排卵/阻礙卵子受精/改變子宮內膜令到受精卵難以著床;而呢個高劑量嘅荷爾蒙可能會導致你經期間不規則出血,或者月經情況同平時相比有明顯嘅唔同,一般1-2個月經週期之後就會相對穩定返。 :relaxed:

而事前避孕藥方面,其實正確服用嘅情況下有大約99%嘅避孕成功率嘅。不過都想問返你,上次服藥之後點解停藥?係因為副作用?今次再食返藥之前有冇睇醫生? :face_with_monocle:

避孕藥唔係每人嘅身體狀況都適合服用,例如有免疫系統/肝臟/腎臟問題嘅人就未必可以食。而且市面上有好多款避孕藥,每款嘅人造荷爾蒙成份同劑量都有所唔同。所以建議第一次服用之前,或者停藥之後再食返之前,都應該去睇下醫生,等醫生評估下你嘅身體係咪適合同埋適合食邊一款藥。尤其如果你之前係因為副作用而停藥,更加應該同醫生商量下,係應該服藥一排等身體適應藥物副作用慢慢消退,定係應該轉藥試下其他款會唔會更加適合你。你可以盡快預約家計會診所/母嬰健康院/部分私家診所睇醫生。 :woman_health_worker:t2: :man_health_worker:t2:
而睇醫生之前,如果你確認咗自己冇懷孕,而且暫時服藥後冇好嚴重嘅副作用,你可以考慮繼續服藥嘅。但如果你服藥時候覺得有嚴重嘅唔舒服(例如昏迷,心跳不規則等),就要停藥先啦。

最後想提提你,避孕藥喺正確服用嘅情況下有好高嘅避孕成功率,但係唔會好似安全套咁可以減少性病傳播或者其他感染(例如尿道炎、陰道炎、念珠菌感染)嘅風險。你都可以考慮服藥嘅同時配合埋安全套一切使用,可以更加安心啊~ :wink: