性愛時下體痛

後入嘅時候 係喺陰道入
但係每次體內近肛門嘅位置都會痛

Hello

你講嘅狀況有機會係以下幾種情況所形成:

  1. 其實你性交嘅時候, 唔係淨係個陰道嘅肌肉收縮嘅, 成個陰道,尿道,肛門,括約肌…嗰啲肌肉其實好多都係會一齊收縮。同埋其實佢入面core係嗰個盆骨底肌肉呢, 佢控制住的陰道或肛門口等等嘅,咁所以你受到刺激嘅時候其實唔只係陰部,而係整個下體嘅肌肉都會收縮。所以有啲人可能甚至係佢高潮嘅時候有少少痙攣嘅,連帶肛門嗰位都會有啲抽搐嘅, 咁你而家痛就有可能係你未係好適應到個刺激程度。咁所以可以做嘅時候留意下。
  2. 另一個原因呢就係插入嘅角度。因為每個人嘅陰道同埋陰莖除咗size之後, 其實個角度都有啲唔同, 有機會可能陰莖咁啱勃起嘅時候係比較向上, 係後入嘅時候就會頂住直腸嗰啲位, 以致肌肉收縮嘅時候造成痛楚。我哋會建議你可以試下喺後入嘅時候調整角度同埋姿勢, 搵返最適合大家嘅position。另一個建議係可以嘗試做kegel exercise訓練番個盤骨底肌肉, 令到肌肉習慣收縮亦鍛鍊返韌度。

而如果你所指嘅後面痛係指肛門外面嘅皮膚痛就有機會係因為肛門附近有傷口, 例如可能係平日排便嘅時候整到。

不過都會想你留意一下, 睇下平日會唔會都有排便困難嘅問題, 或者會唔會喺冇發生性行為嘅情況底下都有肛門直腸痛, 因為除咗我哋啱啱分享嘅兩種可能性之外, 如果平日冇性行為嘅情況底下都感覺到肛門直腸痛, 就有可能係嗰部分有病變, 如果有嘅話都建議你盡快去搵醫生檢查一下~

希望幫到你。