漏服避孕藥問題

食娜迪(Nordette)一年幾,一直都有準時服藥。到最近一次11月27日開新一排藥,12月1日漏食咗,到12月2日先補食返(遲咗19-20小時),當日個粒都有按平時食返,之後幾日都有按時食。

今日12月5日有進行性行為但冇額外避孕措施,之後先突然記得早前漏食過…我睇返娜迪係12小時內補食先唔會影響避孕功效。

所以而家好擔心懷孕嘅風險會唔會大咗,係咪要食事後丸?:pensive:

Hello 事前避孕藥係透過人造荷爾蒙去改變月經週期,抑制排卵去達到避孕嘅功效。雖然你係12月1日漏食咗一粒,而且係超過指定嘅補食時間內先食返漏咗嘅個粒藥,但因為你已經服食超過一年,以往都準時食藥,12月2日打後亦有照常食返藥,其實身體唔會咁快就開始返自然排卵,所以相對上12月5日所發生嘅性行為會導致意外懷孕嘅機率唔高。

不過,如果想保險一啲,係性行為發生後透過食事後丸緊急避孕都係一個可靠嘅做法。而且,如果你想今個月繼續食事前避孕藥的話,你只可以選擇服用單一荷爾蒙式嘅事後丸-即係需要係性行為發生後72小時(大概3日)內服食嘅種類。如果你衡量完風險後認為有需要,就盡快約見醫生處方藥物。可以考慮去家計會嘅診所,或者普通私家門診。預約時記住要提及自己本身有食開避孕藥,同埋係邊一個牌子,確保診所有相應藥物提供先去見醫生(特別係普通私家門診,因為有啲診所只有提供120小時個一款藥物,記住要問清楚~

謝謝回答:pleading_face::pleading_face:

理性上我都覺得機會唔高,都唔想太食事後,但總有一絲擔心🥲

我都諗緊聽日去家計會尋求醫生專業意見,睇下我個情況其實有冇需要食事後藥… 但總係覺得醫生保險起見點都會叫我食咗先

好驚事前加事後咁食會有好多副作用…

Hello
明白你嘅擔心嘅,而且的確你嘅懷孕風險唔算好高,唔知你今日最後有冇去睇醫生呢? :face_with_monocle:

其實事後藥係用高劑量嘅荷爾蒙去進行緊急避孕,所以的確有啲人食完之後會有比較明顯嘅副作用,而亦有啲人係冇乜感覺嘅。所以其實副作用嘅情況係因人而異嘅。而如果醫生根據你嘅情況,認為你適合食嘅話,其實都可以食嘅。 :woman_health_worker:t2: :man_health_worker:t2:

如果你考慮完覺得都係唔想食緊急避孕藥,你都可以考慮進行驗孕。驗孕係檢驗尿液中嘅hCG水平,hCG係卵子受精著床之後身體會產生嘅一種荷爾蒙,而卵子受精著床需要大概6-9日嘅時間。所以,喺最後一次性行為7日後(12月12日)驗孕會得到初步結果,而11日之後(12月16日)就會得到相對比較準確嘅結果啦。 :blush:

如果你擔心之後都會有漏食藥嘅情況,你可以考慮設定鬧鐘,或者用一啲食藥專用app,可以提醒同記錄自己嘅服藥情況,可能都幫到你記得準時食藥呀! :wink:

Hello 再次感謝你地嘅回覆

我最後去咗家計會,職員安排咗我去諮詢護士嘅意見。護士話呢個情況唔需要食事後避藥,漏服兩粒或以上先睇情況決定需唔需要食,所以最後都冇服食到。

不過我12月16日都會驗孕,等自己唔好咁擔心:)

1個讚