開始咗食yaz大概18日，一起身去完廁所抹嗰時發現紙巾有血，啲血鮮紅色嘅，顏色同平時嚟m差唔多，但係個量就得好少好少，中午食飯嗰時有一陣m痛嘅感覺，但係唔係好犀利，好快就無事，初初以為係啱啱開始食事前嘅副作用(不規則陰道出血)所以無特別去理。
晏晝同男朋友做完，佢一抆出嚟嗰陣發現成個套都係血，我即刻攞紙巾抹一抹下面，張紙巾嘅血多到同平時第一日嚟m差唔多，所以就開始用m巾。隔咗大概三個鐘之後check，塊m巾嘅血量同平時第一日嚟m差唔多，血嘅顏色都同平時差唔多，簡單啲嚟講其實同平時第一日嚟m一樣咁滯。
請問我呢個情況係咪嚟m？我以為食完最尾嗰幾粒白色先會嚟m，呢個情況正唔正常？另外，我係咪應該keep住食埋剩低嘅藥？如果係咁嘅話，我會唔會嚟完呢次又好快嚟多一次m？
Thanks
Hello
首先想了解返多啲你嘅服藥情況先。你係咪第一次食藥？食藥之前有冇睇醫生先？係月經第幾日開始食藥嘅？除咗出血之外有冇其他特別唔舒服？ 
如果你係第一次食避孕藥，又或者你之前食過藥停咗一排而家再食返，都建議開始食藥去睇咗醫生先。雖然避孕藥好容易喺市面買到，但係唔同牌子款式嘅避孕藥有唔同嘅人造荷爾蒙成份同劑量。而且唔係每個人都可以服用，例如有心臟／腎臟／免疫功能問題嘅人就未必適合服食避孕藥。所以，建議要等醫生評估下你嘅身體狀況係咪適合同埋適合食邊款避孕藥先開始食。家計會診所／母嬰健康院／部分私家診所都有呢個服務嘅。同埋如果你有睇醫生先食，當你身體出現副作用嘅時候，都可以同醫生商量返，係繼續服用一排，等身體逐漸適應藥物，定係嘗試另一款藥物，搵下最啱自己嘅藥物。而且，通常醫生（尤其家計會醫生）都會建議你喺月經週期（月經第一日去到下次月經嘅前一日為之一個週期）頭7日內（家計會醫生通常建議月經週期第5日）開始食第一粒藥。一嚟可以懷孕風險最低，二嚟對身體嘅副作用同埋對月經週期嘅影響會相對比較細。如果你之前冇睇過醫生就食藥，你都可以考慮去睇下醫生先。 
而服用避孕藥初期有不規則出血，或者腹痛，其實都係比較常見嘅副作用。一般嚟講1－3個月後身體適應咗藥物，呢啲副作用就會消退。不過情況亦會因人而異，有啲人嘅身體可能需要更加長嘅時間去習慣藥物，不過理論上唔超過6個月。而亦都有啲人係要轉幾次藥，先搵到最適合自己嘅藥。 
都想問下你呢排有嚴重腹瀉／嘔吐？有冇服用緊其他藥物？有冇每日同一時間食藥？ 
如果有腹瀉／嘔吐，或者有服用緊其他藥物同避孕藥有交互作用，都有機會導致不規則出血。而每日同一時間準時服藥，係有機會改善出血情況嘅。
如果你出血量唔算太多都可以繼續服藥，但如果血量都比較多，或者仲伴有其他嚴重副作用，咁就建議要停藥同埋盡快預約睇醫生檢查返你嘅身體情況呀。
最後再同你解釋返避孕藥嘅原理，避孕藥係通過人造荷爾蒙去抑制排卵，改變子宮頸黏液嘅粘稠度，同埋改變子宮內膜環境，從而達致避孕嘅功效。所以，喺避孕藥嘅影響下，唔會好似平時月經咁，因為身體週期性荷爾蒙變化、排卵、然後未受精嘅卵子連同子宮內膜喺月經期間排出體外；服藥期間出現嘅「月經」其實係「撤退性出血」，即係服用活性藥物（24粒粉紅色藥丸）期間，有荷爾蒙，而服用非活性藥丸（4粒白色藥丸），其實冇荷爾蒙成份，而呢個變化就會令到子宮內膜脫落，出現出血現象。所以當身體適應咗藥物之後，避孕藥會令到「月經」好規律嘅。不過服藥初期都會相對唔穩定嘅。