我上個月M come第1日係11月6號，廿幾號嗰啲日子有試過冇帶condom同男朋友嚟左幾下 跟住帶返。本來預計M come嘅日子係12月5號，冇嚟 但都冇理，因為我不嬲都唔太準。
然後前幾日12月8號全程帶condom，但做完男朋友發現成個dom穿左。因為驚之前廿幾號嗰幾次已經中，嗰晚就用左驗孕棒驗左係negative。第二朝再買事後避孕藥食左。
今日已經12月10號，雖然一路有胸部脹痛同子宮有啲陰住陰住既感覺，但都仲係未嚟。請問係只係我遲嚟定仲會有咩原因
我都係食完事後有焗m感覺就係唔知點解成日想來野
Hello
-
首先驗孕係檢驗尿液中嘅hCG水平，hCG係卵子受精著床之後身體會產生嘅一種荷爾蒙，而卵子受精著床需要大概6－9日嘅時間。所以，喺最後一次性行為7日後驗孕會得到初步結果，而11日後驗孕就會得到相對比較準確嘅結果。而你係第一次發生性行為(廿幾號)後11日進行驗孕，咁其實準確度都算高～
-
而第二次性行為(12月8日)，你喺72/120小時內有服食緊急避孕藥，咁其實懷孕嘅機會都會較低。因為佢嘅原理係抑制排卵或者干擾受精過程，即使係排左卵都依然會有避孕嘅效用～但係都見到你話「買」緊急避孕藥，因為緊急避孕藥喺香港係法例規定必須經醫生處方嘅藥物，所以喺家計會、母嬰健康院或者私家診所向醫生領取緊急避孕藥比起診所以外嘅渠道例如藥房獲取都較好，因為有啲藥房會賣冇藥盒或者過咗期嘅緊急避孕藥，呢啲事後藥嘅藥效存疑。所以如果你有保留你買嗰盒事後藥嘅藥盒，建議你可以去上述處所俾醫生睇一睇，亦建議你喺發生性行為後120小時內(13/12前)去上述處所經醫生評估下領取緊急避孕藥。
提提你！服用緊急避孕藥會出現頭痛、噁心、頭暈、疲倦、經痛、腹痛、背痛及乳房脹痛等副作用，但係一般情況下，呢啲副作用都唔會持續超過24小時。而且，緊急避孕藥有機會令下一次月經提早嚟或者延遲，所以遇到呢啲情況都唔洗太擔心。見到你有提及胸部脹痛同埋子宮陰住陰住嘅感覺，除左有機會係食緊急避孕藥帶來嘅副作用，其實有好多其他因素會影響月經，例如有冇服用藥物，生活作息同飲食定唔定時，最近係咪好大壓力等，都有機會影響月經嘅出血量、出血日數、經前症狀等。即使有啲懷孕症狀同谷M症狀有相似，但我地都唔可以單憑呢啲症狀去判斷係咪懷孕，如果真係擔心嘅話，可以再驗孕去確定自己有冇懷孕。
最後，男性陰莖性興奮嘅時候會分泌出透明且黏稠狀嘅液體，稱為尿道球腺液，裏面含有少量精子，如果喺冇帶安全套嘅情況下有插入式嘅性行為，都有機會導致懷孕，所以都建議整個性行為嘅過程都帶翻安全套，咁懷孕機會會減低～
希望解答到你