關於事前避孕丸(好急😭)

今個星期一(6/12)我去咗家計會配避孕丸 係人生第一次食 姑娘開咗yaz俾我試 點知到星期三四左右 開始覺得胸悶 好似俾野壓住個心 又未到唞唔到氣 但係會想大啖啲氣 同埋有時會心悸 長期胃脹氣
我以為純粹自己驚 因為以前緊張嘅時候都會有呢種反應
但到今日依然係咁
我已經book咗嚟緊去家計會睇醫院 同埋今日停咗藥
但擔心我咁嘅症狀係咪血栓?:sob:定係我過份擔心? 如果俾血栓應該點算…第一次食好徬徨…

今日手腳都有啲酸痛 唔知關唔關事:sob:
如果係血栓嘅話會唔會有即時嘅危險性? 聽日會見醫生 會唔會太遲?
同埋想問一下血栓嘅治療方法係點?

hello @jkjk

首先都希望你放鬆少少,唔好太擔心先。

因為如果好似你咁講,你去過家計會配避孕丸,相信你亦都有做過身體檢查同埋過往病歷嘅一啲檢查,醫生同護士先至畀避孕丸嚟嘅,咁嘅情況底下其實都基本上排除咗一啲對身體好大影響嘅風險。

唔同人對藥物嘅副作用反應都唔同,但係本身因為食避孕藥而導致血栓嘅情況都相對嚟講比較少,不過如你所講,你嘅身體出現咗一啲比較嚴重嘅副作用反應,而你即時停藥同埋打返去畀家計會約見醫生呢個行為,係做得非常正確嘅!

都會想問下,當你打去畀家計會嘅時候,護士有冇同你講喺咩情情況底係要點樣處理呢? 例如,可能你嘅身體狀況係點樣嘅情況底下要去急症室搵醫生求助?

因為血栓其實即係血凝固咗,如果你去醫院嘅話,其實醫生係會幫你注射一啲抗凝血藥物入體內,令到你嘅血流通返。

都希望了解一下,你喺停咗藥之後嘅身體反應,會唔會繼續有或者加劇?

如果你停咗藥之後嘅副作用身體反應其實係減低咗嘅話,聽日去睇家計會應該就已經可以解決到你而家好擔心嘅問題。

但係如果你停咗藥之後,身體嘅反應冇減少,甚至可能加劇咗,令到你更加唔舒服嘅話,我哋都會建議你盡快去私家門診,或者醫院急症室睇睇個情況,做一個身體檢查。

亦都提你可以帶埋你而家食緊嗰隻避孕丸去畀醫生睇。

喺現階段,都會建議你飲水同埋盡量放鬆心情,都可以幫助你舒緩身體感到不適嘅狀況,希望幫到你啦~

多謝你嘅回覆:pleading_face:
護士其實冇講係咩情況底下要自己去急症室
我停藥之後 其實已經冇咗之前所講胸部嘅不適反應
但反而四肢有酸痛情況出現 唔知關唔關事

四肢酸痛嘅情況可能有好多唔同因素導致嘅,我哋暫時都唔能夠好準確咁去判斷關唔關避孕藥事。
如果你停咗藥之後情況有所好轉,就唔使太擔心啦!但如果之後依然都有唞唔到氣呢種感覺,咁都建議盡快去睇醫生,檢查下身體,等自己可以安心啲! :woman_health_worker:t2: :man_health_worker:t2:

每人體質唔同,對同一種藥嘅反應都唔同,的確有啲人嘅身體情況對藥物嘅反應會相對比較大。如果你仲想食避孕藥作為安全措施嘅,咁建議你去預約睇醫生,同醫生傾下你今次食藥之後產生嘅副作用,商量下要唔要試下其他牌子嘅藥,睇下身體嘅適應情況會唔會好啲。有啲人可能試咗幾款藥先搵到最適合自己嘅嗰款。 :blush:
而如果你覺得唔想再食藥,都可以用返其他比較可靠嘅安全措施,例如安全套同子宮環。 :relaxed:

1個讚