想問吓是否每個女生一個月只會排一次卵，同埋係咪一定在月經14天之後排卵？
你好呀
係正常嘅情況下，每一個月其中一邊卵巢只會排出一粒卵子嘅，但係有啲月經週期比較短嘅人，可能就會出現一個月排出兩粒卵子；同樣地，月經週期較長嘅人可能超過一個月先會排出一粒卵子架。
「月經14天之後排卵」呢個說法係假設一個月經周期（由嚟月經當日開始起計直到下一次來月經之前）一定係28日，而且一定係第14日排卵。但呢個只係一個科學上嘅數字，現實中唔係所有人都會28日一個周期，即使28日周期嘅人亦唔一定係第14日排卵。而排卵其實係受好多唔同身體因素影響嘅，例如荷爾蒙水平、飲食、作息、壓力、生病、藥物等等。因為好多時反而係排卵後14天就會出現月經，所以其實係要等月經出現之後先可以推算返之前果次月經週期幾時排左卵，而唔可以靠是否嚟咗月經推斷下一次嘅排卵日子。所以，除非喺醫生嘅指導之下每日用排卵試紙測試，否則我哋好難準確咁知道自己究竟幾時會排卵。
可能你會用一啲app去紀錄或者推算月經週期，但係其實並唔準確，因為app通常係以你過往嘅月經週期pattern去估計，預算你幾時會排卵，但係app並唔會知道你成個週期／將來嘅身體狀況，例如你有冇休息得唔好，或者有冇病過食過藥，有冇特別大壓力等等，但係呢啲因素都會對月經同排卵造成影響。或者你試下回想下，有時你嘅月經都同app嘅預測未必完全一致，唔係我哋嘅身體唔正常，而係本身排卵同月經就係由身體幾個繁複嘅系統互相配合而形成，所以每人每個月經週期嘅情況都可能會有所不同，係好正常嘅。
如果我女朋友在近兩次月經都是35-37天而來月經的日子都是26/7,29/8,6/10,12/11, 想問吓月經週期咁長正常嗎？同埋呢三次都是35-37天用估計排卵日來避孕（當然我之前提過都有再用避孕套）會唔會比較可以估計到？希望你唔會嫌我麻煩
，因為我都係想搵個人可以俾我傾訴令我冇咁擔心🥲
咁其實如果月經遲嚟，係咪代表排卵日推遲咗？
再想問一下其實懷孕是否不容易
由五月到依家我記錄晒佢月經周期，都是介乎34至39
Helloo
首先常見嘅週期長短其實都係介乎23-35日，因此呢個位唔使太擔心係正常嘅：）
至於「同埋呢三次都是35-37天用估計排卵日來避孕會唔會比較可以估計到？」正如Kaleo 先前都有解釋，始終月經係由身體唔同器官配合而形成，而壓力、作息等因素有可能令月經週期未必按以往規律出現，呢個都係安全期被人避孕法俾人詬病嘅地方，始終我哋冇辦法預測到將來嘅身體狀況會唔會影響到月經，但係都見到你同時有提及自己會配合用安全套，咁樣的確有保障好多呀。只要安全套啱size 冇穿冇漏冇過期都唔使太擔心
而「如果月經遲嚟，係咪代表排卵日推遲咗？」呢個的確係嘅，始終都有好多因素影響排卵日子，不過我哋冇辦法準確計算具體嘅排卵日子係幾時，所以如果真係想用安全期避孕，其實都建議配合用返安全套免卻擔憂。
而最後「其實懷孕是否不容易」
呢個真係好難一概而論啊，都要視乎返當時嘅情況係屬於高風險定低風險；但我哋都要知道嘅係：所有安全措施都唔保證可以100%完美避孕，調返轉不安全性行為亦都唔代表100%會懷孕，因此呢一個位我哋都好難比到確切嘅答案，而只要有好好使用安全措施，其實都唔使太擔心嘅:)
想問吓如果月經遲來幾多日就屬不正常？因為我預測他明天或星期日來
Hello
其實冇話月經遲嚟幾多日就屬正常或者唔正常，有好多人係幾個月甚至半年先嚟一次。而且好似Kaleo所講，實在有太多因素影響月經周期同排卵，所以我哋更加唔可以就咁推斷月經遲嚟就係唔正常
建議你可以等埋聽日同後日，如果女朋友仲未嚟月經，可以同女朋友商量下需唔需要驗孕。如果排除懷孕嘅可能性後，月經比起預期遲兩至三個星期以上，就要考慮去睇醫生啦～一般醫生都要要求做一啲基本檢查例如驗孕、抽血檢查驗荷爾蒙、檢查子宮等，有需要嘅話會處方荷爾蒙藥催經。
希望解答到你
咁我想請問避孕棒應該點用，我見網上有啲電子避孕棒其實係點？thanks
驗孕棒係透過檢測尿液內嘅hCG（人绒毛膜促性腺激素）水平去判斷有無懷孕，呢種激素會係成功受精著床後開始分泌。而一般受精著床嘅過程需要6－9日，所以會建議係性行為發生至少7日後先驗孕，會得到初步結果，而係性行為發生11日後或者預計月經日子驗結果就會更加準確。可以睇睇距離最後一次發生時間為過咗幾耐，睇下可以使用驗孕棒檢查未。
驗孕棒嘅基本使用方法係透過將尿液沾濕驗孕棒上嘅試紙，係指定時間後再檢查結果。但因為每個牌子嘅沾濕時間、等候時間同顯示方式都有所不同，必須要係使用前清晰閱讀說明書，按照指引去使用，先可以得到準確嘅結果。其實大部份牌子都非常簡單易用，如果真係擔心的話，可以買定2，3枝，確保自己有按照正確步驟去使用。
而電子驗孕棒係指佢嘅顯示方式係透過電子屏幕去顯示有冇懷孕，可以避免因為人為因素而導致錯誤解讀驗孕結果，但使用方法同其他普通驗孕棒係冇太大分別嘅。電子驗孕棒一般敏感度同準確度都會比較高，如果懷孕的話亦會顯示懷孕週數，所以亦有唔少人會選擇。但同樣地，使用前都必須要清楚閱讀說明書啊～
有好多驗孕棒牌子都有官方網站，詳細講解如何正確使用驗孕棒，同埋點樣解讀結果。買好咗驗孕棒之後都可以再參考一下品牌嘅網站，清晰了解使用方法後再進行驗孕 
想問下排卵期其實會唔會係月經週期嘅第14天已經開始又或者早啲，但係月經遲嚟。但係一定係排卵之後嘅14天之後月經一定嚟？
Hello @Jaycgan
首先， “排卵期會唔會喺月經週期嘅第14日已經開始又或者早啲” ，的而且確係有呢個可能性，因為我哋嘅身體荷爾蒙會收到唔同嘅因素影響，咁所以的而且確你嘅推測係有機會出現嘅。
然後你第二個問題，”排卵之後嘅14天之後月經一定嚟”，其實好似我哋同事所講，無論係月經週期嘅前或者後都會有好多因素影響，包括壓力、身體狀況、食藥嘅荷爾蒙影響等等。所以我哋都冇辦法可以答實你。
我哋都有留意到，其實每個月你都會問有關於懷孕同埋月經週期嘅疑問，如果你真係非常之擔心嘅話，真係可以考慮下去睇醫生，等醫生同你同女朋友做一個基本嘅身體檢查，去了解返自己嘅身體狀況，減低返因為焦慮而引起嘅一連串影響身體狀況嘅因素。
我相信你一定係非常之重視你同女朋友之間嘅關係，而我亦都見到你亦都有喺第二個post裏面去問有關於懷孕之後嘅處理方法，我相信你不停問我哋呢一個話題，一定都成日喺你同女朋友之間嘅相處裏面出現，呢個會唔會就係其中一個原因令到女朋友月經週期推遲呢? 我相信如果你係咁擔心嘅時候，你最親近嘅身邊人亦都會留意到，亦同你一樣有類似嘅情緒，以我哋之前所講，精神嘅焦慮同擔憂亦都會係一個非常之重要嘅因素影響月經嘅週期!
建議你搵個時間同女朋友傾傾，用最適合雙方嘅安全措施，去減低你一系列嘅焦慮，相信可以令到女朋友嘅身體狀況亦都比較穩定，減少因焦慮而引起推遲月經週期嘅情況。
尋晚女朋友下腹脹痛，我知道呢啲係月經前嘅跡象，同埋問咗好多朋友，佢哋都認為今次懷孕嘅機會其實近乎零，因為我已經做足安全措施，所以而家我冇咁擔心，亦都唔會再俾咁大壓力女朋友，只好耐心咁等候月經嘅到來
我剛才買咗電子驗孕棒同女朋友驗左，顯示係冇懷孕，多謝糖不甩嘅職員一直喺呢度陪住我呀
但不是晨尿是否都可以，因為我見話其實性行為之後十一日驗出的結果都會很準的
其實如果過咗11日，尿液裡面嘅hCG水平已經足夠可以檢測架啦，並唔一定要用晨尿嘅，至於點解啲人話要用晨尿呢，係因為係前期hCG水平比較低嘅時候，晨尿係會有比較高濃度嘅hCG，所以就會相對上容易檢查出嚟，不過你地已經11日後，唔洗擔心架。
而且如果所用嘅驗孕棒說明書冇指明一定要用晨尿，咁基本上用任何時段嘅尿做測試都準確嘅。而且我哋喺上面都解釋過，電子驗孕棒嘅敏感度同準確度都會比較高，只要有正確使用的話結果都係非常準確同可信嘅。
如果驗之前飲咗檸檬茶有冇影響，定係其實都冇乜特別？
我用嘅係clearblue 電子驗孕棒
佢說明書話如果唔係提前係月經之前測試，係任何時間都可以驗，之後上網睇又話其實一般性行為之後11日個hCG指數已經達到足夠嘅水平，所以其實飲檸檬茶都唔會影響到，同埋電子驗孕棒嘅敏感度都好高，所以一定會好準確地驗到，我咁樣講其實有冇錯？