Delay 咗十日了

以往用app計 月經周期大概都係34日左右
但唔算太穩定 上次嚟M已經係11月5 呢個月都同男朋友做過幾次 但全程都有帶套 佢亦都冇射到 之後都有用水check有冇穿嗰啲 都冇事
但直到今日都仲未嚟M :cry: 呢排都有啲心口悶住嘅感覺 間唔中會想反胃 同埋 呢幾日都keep住有啲褐息嘅分泌物 想求個安心 懷孕嘅機會其實係咪都唔大 好焦慮

Hello​:smiling_face_with_three_hearts:

首先,如果有check過安全套冇任何穿窿嘅情況,咁其實懷孕嘅機會較低,所以唔使太擔心~

至於你而家都未嚟月經呢,見到你都有提及自己會用Apps去記錄月經,但都有留意到自己嘅周期唔算太穩定,其實有好多因素會影響月經同排卵周期,例如有冇服用藥物,生活作息同飲食定唔定時,最近讀書或者工作係咪好大壓力等,都有機會影響月經嘅周期長短、出血量、出血日數、經前症狀等。所以都唔能夠太過倚賴日子上嘅計算去判斷自己身體嘅月經周期。而啡色嘅分泌物都係其中一個常見嘅經前症狀,所以可以觀察多幾日~但都要留意並唔係每個人,每次月經周期都會出現呢啲症狀~

如果真係想知有冇懷孕,可以同伴侶商量下需唔需要驗孕,因為驗孕係最方便快捷嘅方法知道有冇懷孕。驗孕係檢驗尿液中嘅hCG水平,hCG係卵子受精著床之後身體會產生嘅一種荷爾蒙,而卵子受精著床需要大概6-9日嘅時間。所以,喺最後一次性行為7日後驗孕會得到初步結果,而11日後驗孕就會得到相對比較準確嘅結果啦。

如果之後嚟左月經,但你都仲有出現心口悶着,反胃嘅情況,都建議你搵醫生check吓自己身體有冇其他病痛啊:thinking:

希望解答到你:ok_woman:t2:

多謝你嘅回覆 但因為去到今日我都未嚟m
都仲係好焦慮 成日都心掛掛 我知越大壓力越嚟唔到 但我控制唔到自己唔諗:cry:
又唔敢去買驗孕棒 因為怕面對唔到個後果
因為見網上都話嚟m同懷孕嘅徵兆有啲似
例如 分泌物多咗 因為以為都係見到褐色/少少血 第二日通常就會嚟m 但今次見到褐色分泌物之後第二日乜都冇 同埋有幾次啲白帶混咗啲紅色嘅血絲
都比較擔心
同埋 今次嘅月經週期 今日已經去到46日:cold_sweat:
另外今個月有幾多都做得特別多運動 同埋 都比較夜訓 其實係咪都關事

同埋反胃嘅問題其實都持續左好耐 都有差唔多一年 自己都知係因為啲心理因素影響 所以真實都應該唔係好關懷孕事?:pray:t2:

因為上網都睇咗好多資料 越睇就越擔心
特別係 以前有少少血/褐色分泌物 第二日就會嚟m
但今次有少少血/褐色分泌物 第二日就乜都冇
見到有人同樣情況 最後有咗bb 之後就好擔心
都有人提及到著床出血
想問下其實今次嘅風險其實係咪都好細

Hello
首先想你知道,你哋嘅性行為如果全程都有正確使用安全套嘅話,懷孕風險係好低嘅。而現時冇一種症狀係可以準確咁顯示一個人有冇懷孕嘅(例如你所講嘅反胃,其實有好多其他因素都會導致反胃嘅出現),要想準確咁知道有冇懷孕,係要靠驗孕嘅。如果距離你哋對上一次發生性行為已經過咗7日(會有初步結果)/11日(會有較為準確嘅結果),咁你都不妨去驗孕,等自己唔好「囉囉孿」,可能你親眼睇到個結果,個心會安定啲。 :blush:

排除咗懷孕嘅可能,可能你都會冇咁緊張,壓力都會影響月經㗎。而就算驗孕結果係陽性,都仲有唔同嘅解決方法,亦會有唔同嘅機構支援你,而我哋都會一直陪住你! :sparkling_heart:所以唔好因為唔敢知道結果就唔去面對,咁樣keep住有壓力,對身心健康都可能有影響㗎。

我哋之前有提及,月經會受好多唔同身體因素影響,因為身體唔同嘅系統係互相連結,互相有關係嘅,所以如果突然運動量加大,情緒緊張,休息得唔夠,可能會影響到月經㗎。你都有提及,你本身月經週期都唔穩定,其實每人每次嘅月經情況(例如週期程度、流血量、流血日數、經前症狀、經痛程度等等)都有機會唔同㗎。有啲人月經前會因為荷爾蒙水平變化而有啡色分泌物,但唔代表有流啡就一定會好快月經出現。 :relaxed:

另外著床性出血呢樣嘢,其實係相對比較少見嘅情況,至於個名咁講,係卵子受精、受精卵著床(呢個過程需要大概6-9日),而身體因為荷爾蒙改變而出現嘅少量出血情況,通常1-2日,而血量比較少,大概1塊護墊可以裝載。

而反胃呢樣嘢,如果都持續咗一年,其實都值得去睇下醫生檢查下 :woman_health_worker:t2: :man_health_worker:t2:。因為消化系統嘅問題,有時都會影響其他身體系統㗎(例如有時你感冒,可能情緒都會比較低落、胃口又唔太好,就係因為免疫系統有壓力/有狀況嘅時候,其他身體系統-消化系統、情緒等等都會被影響到,同樣道理,如果你呢一年内都係覺得腸胃唔太舒服,甚至如果因為咁樣連飲食習慣都改變咗,咁其實身體其他部份都可能被牽連嘅)。

有其他問題歡迎你隨時問我哋呀! :smiling_face_with_three_hearts:

想問下你依家月經嚟咗未?

:cold_sweat:

你係個個月都會遲?

想問下最後結果係咩:cold_sweat: