會唔會意外懷孕

我上次月經第一日係8/12,今日18/12同男朋友有性行為。我地冇正式插入,我首先幫佢打飛機,佢射左精,但射精前佢有用手摸過JJ,射精後用紙巾抹走左。之後佢幫我手交,有摸到陰道口,同用手插左少少入去。我好驚佢既分泌物有精子,會進入我陰道。請問我會唔會懷孕?我真係好驚!因為當時我下面都好濕,會唔會令精液入到陰道懷孕?

你好~陰莖分別會分泌出兩種含有精子嘅體液,包括1)喺性興奮時分泌透明嘅尿道球腺液,當中有機會含有精子同2)射精時會分泌出嘅精液,當中含有精子。你提及男朋友係射精前有摸過自己嘅陰莖,雖然有機會會掂到尿道球腺液,不過,因為距離接觸你陰道口之間都相隔一段時間,精子其實係接觸空氣後好快就會死亡,而且係射精係男朋友亦有用紙巾清潔過,抹走精液/尿道球腺分泌,手上都唔應該有任何殘留嘅體液,抹走體液後,精子亦唔會可以獨立地係手上生存。

所以,總括而言,今次嘅性接觸都係無風險嘅。雖然當時你陰道有分泌,但如果男朋友手上已經無體液/精子都已經死亡,都係唔會有精子可以因而進入到你體內,亦唔會造成懷孕。

下次可以考慮係接觸分泌物後洗手,進一步清潔好,確保唔會有任何分泌物殘留。又或者係指交時使用指套(或者用安全套代替),直接隔絕手指直接接觸到陰道嘅機會,除咗可以安全啲,亦可以避免手指/指甲縫嘅細菌進入到陰道。

我仲有啲問題想問:

  1. 如果當時係排卵期,我地指交,會唔會加大左懷孕機會?
  2. 我排卵期時會有好多黏性分泌物,又會排卵痛,係咪代表體內已經排左卵?
  3. 如果男女隔住內褲磨擦下面,搞到濕曬好多體液,有冇機會懷孕?
  4. 即使有帶安全套,我知道精子會留喺體內幾日,其實點樣可以預計時間,令性交後唔受精?

Hello
首先關於排卵期呢樣嘢,想你知道,除非喺醫護人員指導下每日用排卵試紙進行測試,否則我哋唔能夠準確咁知道究竟邊一日排卵。因為排卵其實要等月經出現之後先可以推算返,而排卵同月經都好容易受其他因素影響,例如荷爾蒙分泌、飲食、作息、壓力、藥物等等,所以每人每次月經週期都有機會唔同,你都可以試下回想你過往嘅月經週期係咪每次都一樣。而即使係月經週期相對比較穩定嘅人,都有機會因為身體情況嘅改變而出現浮動。所以我哋唔能夠單憑一啲身體現象(例如分泌物狀態嘅變化,或者下腹痛)或者日曆/app嘅推算好準確咁去知道自己究竟幾時排卵,幾時係「排卵期」。所以,所謂「計算安全期」係唔安全可靠嘅,喺月經週期嘅任何一日,精液/尿道球腺液同陰道/陰道口接觸,咁都會有一定嘅風險 :x:

而我哋之前都解釋咗,你上次性接觸嘅懷孕風險係好低嘅。懷孕係要由卵子同精子喺體內相遇、卵子受精、受精卵著床而造成。如果你哋嘅性接觸中,精子進入身體嘅機率好低微,咁自然就唔會導致懷孕。 :blush:

而之前我哋亦都解釋過,精子係需要依靠尿道球腺液/精液中嘅液體媒介提供養份先生存同移動到,當呢啲液體離開體外之後會揮發,精子因此好快會死亡。而當精液/尿道球腺液接觸到衣物之後,亦會生存唔到,更加唔會喺衣物到移動,因此唔會由陰道口進入到你嘅體內。

至於安全套呢樣安全措施,佢嘅原理係阻隔精液/尿道球腺液進入體內。喺性行為全程正確使用嘅情況下,有好高嘅避孕成功率。關於正確使用安全套嘅方法,可以參考:Login • Instagram

而如果你擔心安全套嘅避孕成功率唔夠,你都可以配合其他方法一齊使用,例如荷爾蒙避孕法(避孕針/避孕藥)。使用之前要等醫生檢查 :woman_health_worker:t2: :man_health_worker:t2:,認為你適合使用先得。而荷爾蒙避孕法唔能夠好似安全套咁,減低性病傳播或者其他感染(例如尿道炎、念珠菌、陰道炎等)嘅風險。所以你可以考慮配合埋安全套一齊使用。

明白你有好多擔憂,希望你了解完呢啲資訊之後可以令你少啲緊張。但係如果你依然會好擔心嘅,其實你都可以考慮同伴侶商量,暫時唔好發生性接觸著/發生比較低懷孕風險嘅接觸(例如口交),等你哋心理上準備好,先再發生插入式嘅性接觸(例如手交/陰莖陰道交)。 :smiling_face_with_three_hearts:

但係自從嗰日之後,我feel到有排卵痛,而且有蛋清分泌物。雖然今日25/12已經冇曬分泌,但下腹仍然係有刺痛感覺,係下腹兩側同埋中間,會唔會係受精了?

下腹仲有谷住谷住痛,腰背都有啲痛

我哋之前已經解釋過,冇任何一種症狀可以確實咁顯示有冇排卵/有冇懷孕。如果你擔心,與其估估下,不如去進行驗孕。可能你親眼睇到個驗孕結果,會比較安心啲。 :blush:

驗孕係檢測身體有冇hCG呢種物質,而hCG係受精卵著床之後身體先會產生嘅激素,而卵子受精著床需要6-9日時間。所以,喺性行為7日後進行驗孕,會得到初步結果,而11日後驗孕就會得到相對比較準確嘅結果。你可以購買驗孕棒,並依照包裝/說明書嘅指示進行驗孕。

下腹脹痛、腰背痛係常見嘅經前症狀,經前症狀大約會喺月經前2星期-2日間出現,隨著月經出現會消退。當然呢啲症狀亦有可能由其他原因導致。例如經常坐/企,姿勢唔好,都可能導致腰背痛。

性行為係18/12,今日係31/12,已經過左13日。我進行驗孕,結果係一條線,陰性,即係可以肯定冇bb? 結果準確嗎?

Hello @lpmwhmlsh

係呀,冇錯呀:blush:如果你係跟足驗孕棒說明書指示去做的話,呢個結果係陰性嘅,咁我哋就要相信驗孕棒結果。

而你所講,你驗孕嘅日子其實已經係性行為之後嘅第13日, 其實性行為後嘅第11日開始用驗孕棒已經可以有一個好清晰嘅結果。因為驗孕棒係透過檢測尿液中嘅hCG(人絨毛膜促性腺激素)含量嚟判斷有無懷孕,而呢種激素會喺卵子受精著床後開始分泌,一般受精著床嘅過程需要6-9日,所以喺性行為發生11日後驗孕,如果真係有懷孕的話,其實已經會透過驗孕棒檢測得到。而現時結果係無懷孕,可以放心。如果你想再確認一次結果,可以買一支電子驗孕棒,再按照指示驗多一次。因為電子驗孕棒唔嘅敏感度同準確度比較高,而且係透過電子屏幕顯示,如果懷孕的話亦會顯示週數。相信更清晰嘅結果都會令你更安心。

明白到月經到而家仲未呢有機會令到你好焦慮同埋擔心, 但都希望你盡量放鬆心情,亦都可以嘗試用一啲外在嘅方法,令到自己放鬆,等身體明白到你嘅狀況穩定,可以嚟月經:blush: