同女友分手半年 心情都好低落仲好掛住佢， 俾朋友講同自己衰關係早兩日去左召妓 做過程一直有硬帶套但未有高潮
最後除套女方用手幫手淫
發覺換來只係失落感同內疚 估唔到自己會咁
之後覺得除套後行為好危險
而家好驚會有病 心情更差
想知如要檢要等幾耐 同是否多數會中招….
你好～首先，性病其實係透過高風險體液，例如精液、尿道球腺液、陰道分泌物、腸液同血液，直接接觸到性器官、比較脆弱嘅黏膜組織（例如口腔、肛門、陰道、尿道口），特別係當上面有開放性傷口（正在流血）先會有比較大機會可以造成傳播，而且亦必須要其中一方係感染者先有機會造成傳播。
根據你所講，性交過程中有使用安全套，其實咁樣已經可以有效預防到性病以及其他疾病嘅傳染。而冇套手淫本身亦唔屬於高風險行為（性器官之間冇直接接觸亦冇體液嘅交換），除非當時對方手上有明顯流血中嘅傷口，否則都係唔能夠導致疾病嘅傳播。
你現時嘅疑問某程度上都假設咗性工作者=有性病，其實呢個想法係源於社會文化中對性工作者嘅歧視同污名化，將佢地同「污糟」、「性病」連上關係。而事實上，好多性工作者為咗生計同埋自己嘅安全同埋健康，係會恆常去做檢查，亦會要求使用安全套去保障安全。喺追求性健康同安全方面，好多時比起一般人更加嚴謹。反而有時係因為客人拒絕使用安全套，甚至性行為中途除套，就會加大性工作者感染嘅風險。所以同性工作者發生過性行為並唔等於會感染性病，亦唔能夠用呢一點去評估感染風險大唔大。一個人會唔會感染性病其實同對象冇關係，而係在乎性行為嘅方式同有冇正確使用安全措施。即使係同伴侶發生性行為，其實都一樣有風險，係香港每年亦有一定數量嘅人喺因為同伴侶發生冇套性行為而感染性病。
唔同性病嘅潛伏期（= 感染後幾耐會出現病徵）同測試空窗期（= 感染後要幾耐先可以透過科學測試檢測到體內有無受到感染，不同測試方式會有不同空窗期）都唔一樣，有啲性病係感染後亦係毫無病徵，以致有好多人一直唔知道自己喺感染者，而無意地將性病傳播俾自己嘅性伴侶（包括伴侶）。
雖然今次嘅性行為基本上無風險，但如果你仍然擔心，可以考慮喺3個月後（HIV病毒嘅測試空窗期，亦係常見性病之中最長嘅空窗期）進行全面性病測試。你可以考慮去衛生署嘅社會衛生科進行免費測試，或者去私家診所／化驗所進行測試。大部分私家診所都有提供包含多種性病測試嘅檢查套餐，收費大概由$1500-3000不等。而且私家診所亦會有提供空窗期較短嘅測試方案，可以更早知道自己有冇受感染，但價錢就會比較貴，可以視乎自己嘅需要選擇。而且其實係一段關係結束後／要開展新關係之前，進行性病測試都係一種保護自己同對方嘅表現，而如果恆常地進行測試，更加可以更清楚地知道自己身體嘅狀況。
明白 多謝你既回覆。
但想問如果最後既手淫過程 妓女幫除套後手上沾有佢既體液 而安全套以外包唔到既部分亦有小量體液 咁樣其實手淫時都有機會龜頭部分接觸到女性體液？ 會足以傳染疾病嗎？
正如我哋之前所講，其實你哋之前嘅性行為同接觸風險係比較低嘅，而如果性工作者本身係冇感染性病嘅，就更加唔會轉俾你。而我哋之前都建議過你，如果好擔心，而且之前又未做過測試，咁都不妨去做，一嚟可以令你安心啲；二嚟恆常測試（尤其如果你有發生過相對高風險嘅性接觸），了解自己嘅身體狀況，都係對自己同性伴侶負責嘅。你可以根據你嘅需要，預約相應嘅機構／診所進行測試。 
另外都想你了解返，性病會有潛伏期，同埋有啲感染情況係無明顯病徵嘅。所以如果你嘅測試結果真係陽性，都唔代表一定係呢一次性接觸導致嘅。
而依家醫學發達，大多數性病都可以喺積極治療下痊癒，而未能靠治療痊癒嘅性病亦可以靠藥物控制，喺正確服藥嘅情況下係唔會影響日常生活嘅。
所以，你不妨去進行測試啦。
明白 多謝你哋細心講解