今年18 有食煙 最近重要食多左
第一次同女朋友做大約係個半月前
頭幾次都好正常 扯得好行 扑嘢通常可以一晚兩次
大約1-2個鐘就完事
之後開始愈來愈快 亦都好快就自己軟左 戴個套戴下就軟
依家去到未扑就完事（大家用手/口幫大家就完）
之後諗住自己打下飛機嘅時候check下有冇特別 好快就射左
我哋之前差唔多日日都有扑 之後去到隔一兩日
但自己都feel到自己快軟左同快射左
之前有提過不如停一個星期先再扑 不過停咗兩日之後就已經扑左
有時我諗係咪我因為分左心 會諗其他野
同埋最近Feel條丁好似攰 扯一兩次都小小痛
女朋友好想要 我好想俾佢 我自己都好想變返之前可以扑好耐 依家有心冇力
今日本身book左酒店 諗住可以扑得開心啲
點知一次都冇就完左 我真係好有挫敗感 好唔開心
煙 我會戒㗎啦
究竟點解依家狀況愈來愈差
Hello 如果你依然會有晨勃或者自慰打飛機時可以如常勃起一段時間，係有刺激陰莖後先射精的話，暫時都代表性功能係正常嘅。不過，食煙的確有機會會對性功能慢慢造成影響，呢一點相信你都理解。
想了解多少少你最近留意到自己「好快」就射咗，係指大概幾耐？因為你都提及頭幾次同女朋友發生性行為時每次大概都係1－2小時先會完事，而根據過往嘅研究結果，其實由插入陰道到射精，平均係用咗5.7分鐘（最短 0.1分鐘 最長 52.1分鐘），所以普遍而言抽插嘅時間都係5－20分鐘之內。所以如果你嘅1－2小時內都有維持抽插的話，已經係屬於耐。最近嘅「快咗」，好大機會都仍然係平均數之內，而且人係性行為期間嘅表現會受好多因素影響，有改變並唔一定代表身體有問題，亦唔一定係一件負面嘅事。
你提及最近覺得陰莖有種好攰嘅感覺，係勃起後甚至會覺得痛，其實都係身體需要休息嘅訊號。你係個半月前開始同女朋友發生性行為，而且差唔多日日都會做，一晚會有幾次，每次亦會有1－2小時，都想了解下喺個半月之前，你發生性行為／自慰打飛機嘅頻率係點樣架呢？其實如果以往頻率都冇咁密，突然之間好頻密地發生性行為，對身體來講都係一個好大嘅體力消耗。就好似以往都係一星期先做一次運動嘅人，突然間要佢每日做多幾次，身體都會吃不消。頭幾日可能無咩嘢，但持續1－2星期後都會漸漸開始感覺到身體疲倦，表現越來越差，耐力減退，肌肉會開始覺得酸痛。性行為其實都一樣，過程中都會消耗不少體力，而且要維持陰莖勃起需要有充足嘅血液流入陰莖。次數突然變得頻密，身體其實都未必咁快適應得來。
另外，見到你提及自己有時係性行為過程會分心諗咗其他嘢，係會諗關於咩嘅事？關於學業？工作？家庭？關係？呢啲都係常見會令人感到有壓力嘅，而壓力本身亦係會影響身體狀況以及陰莖硬度／持久度嘅常見原因。太忙嘅時候，或者當有好多唔同嘅事困擾著自己，都可能會發現自己好難專心於一件事上，因為好容易就會分心諗其他未處理嘅事項，繼而影響到本身做緊嘅事。
「曾經試過好頻密，好持久，但突然開始做唔到，感到挫敗同失望」－明白你會好想可以好似之前咁，但其實呢個期望都係壓力來源嘅一種。性行為嘅表現除咗會被身體狀況影響到，其實心理嘅壓力影響都會好大。每次性行為嘅時候你都可能會擔心自己可唔可以維持到，好驚自己會突然軟咗或者好快就射，其實呢啲想法正正係會令身體受壓，加劇對身體表現嘅影響。
唔知你同女朋友之間有冇討論過其實自己最理想嘅性行為時間長短係幾耐呢？好多時我哋都以為越耐越好，但其實插入時間越耐，陰道嘅分泌物亦會隨之減少，如果冇足夠潤滑，都有機會令過程疼痛或者導致陰道受傷。而且性滿足／高潮亦唔一定係來自插入式嘅性行為，以女性／有陰部嘅人來講，其實好多人都唔能夠透過陰道交而感到興奮，反而刺激陰蒂可以更容易出現高潮。而且因為女性係高潮後回復嘅時間比較快，會比較容易係短時間内性興奮／高潮多過一次，所以其實係插入前刺激陰蒂令對方更放鬆，亦更易係後續嘅性行為得到滿足／高潮，變相就唔需要一個長嘅抽插時間。不過呢方面每個人嘅感受都唔一樣，可以試下先同對方商量，或者嘗試一次再問下對方感受後再作調節。
性行為嘅需求同期望都會隨著對象、時間、關係嘅進展等而有改變，唔會一成不變。良好嘅溝通先能夠令性行為變得愉悅同令人滿足，好好同對方交流一下各自對性嘅期望同需要，或者會發現原來大家之前都為咗「滿足」對方而犧牲咗自己嘅一啲喜好同需要，可能你哋都會從中搵到更適合彼此嘅性行為模式同頻率～