如果想墮胎唔想比屋企人知道

如果今次我女朋友真係有咗,我哋都決定會終止懷孕,因為比家長知道我一定死緊,同埋我哋依家係讀書時期希望而家都係讀書為先。我有考慮過去家計會同私家,想問吓佢哋會唔會同屋企人講,同埋聽講私家好似快啲,想問吓個流程其實係點(家計會同私家):pray:t2:

係咪要打電話去book?:pray:t2::pray:t2:

雖然我知道其實可以做足晒安全措施,但係個心都仲係好擔心,但係女朋友已經唔係好擔心,可能只係我自己成日胡思亂想

I mean 其實我已經做足安全措施,檢查過冇穿冇爛又全程帶套

Hello 感覺到你為咗今次嘅情況非常擔憂,即使理智上知道風險唔高(因為已經做足安全措施,另一方面亦知道月經會被不同因素影響,月經日子比預期有差距亦唔代表係已經懷孕),但依然未見到女朋友嚟月經都唔能夠放心。其實呢個都係好常見嘅情況,因為以往嘅性教育好多時都係透過威嚇嘅方式去描述「性行為可能會導致懷孕,而如果意外懷孕就會影響一生」,亦甚少會提及各種安全措施嘅成效、意外懷孕嘅選擇同支援以及其他會影響月經嘅因素,所以都需要太過自責或者覺得自己過份擔憂係奇怪嘅表現。

而女朋友冇感到太擔憂,有機會係佢好清楚月經本身就唔係完全穩定,會被不同因素所影響,亦認為你哋已經做足安全措施,所以唔需要擔心會懷孕。

而係香港,如果決定終止懷孕,係需要得到2為醫生同意,認為繼續懷孕會1)對孕婦生命所構成的危險或對其身心健康所造成的損害比終止懷孕為大 或 2)胎兒出生後極有可能身心不健全並足以造成嚴重傷殘。有關喺香港嘅安排以及可以選擇嘅方式可以參考 意外懷孕 - 香港家庭計劃指導會

而如果決定去家計會,係需要由受助者人本人(你女朋友)打去預約見醫生嘅,詳情可以參考 終止懷孕 - 香港家庭計劃指導會 。係香港,雖然女性需要年滿16歲先可以合法地進行陰道交,但無論你係幾多歲,家計會職員都係唔會喺未得到當事人同意下通知家長或報警。不過因為終止懷孕始終都係醫療程序嘅一種,如果未滿18歲,家計會都係會建議求助者自行通知家人,去確保安全。如有需要,輔導員亦會提供相應嘅協助去支援求助者。

喺家計會進行終止懷孕的話一般都會需要進行至少3次到診:
第一次:由醫護人員了解身體狀況、檢查身體、評估懷孕週數、講解可做的選擇和講解避孕方法,會見輔導員進行情緒支援、了解受助者意願同選擇。
第二次:受助者做出決定,進行轉介/終止懷孕醫療程序,輔導員提供心理輔導
第三次:術後覆診
按照受助者情況,覆診次數都會有所不同。收費方面大概需要合共$4400-6100,排期時間需要2-3星期。不過,因為求助者人數眾多,排期時間有機會要更加耐都唔一定。而如果受助者身體情況唔適合喺家計會診所進行手術,家計會會轉介去公立或私家醫院。

至於去私家醫院,現時香港只有仁安醫院、港怡醫院、明德國際醫院、養和醫院有提供呢個服務,收費大概約$20,000起,最終數目會按週數同醫生收費而決定。排期時間就會比較快,通常2-3星期就可以進行醫療程序。

明白如果真係意外懷孕,你哋都唔希望比屋企人知道,因為覺得屋企人一定會好嬲。但終止懷孕呢個決定都真係需要考慮好多唔同事,醫療程序亦會對身體造成一定影響,價錢亦唔平,亦唔係話即刻馬上就可以進行手術。其實屋企人嘅反應未必係負面,當然佢哋一定會有啲情緒,但其實我哋遇過好多人嘅屋企人知道咗之後係好願意提供支援。所以如果真係發生咗,都希望你哋同考慮屋企人講,一齊商量。如果有需要,我哋亦可以幫你哋轉介去有提供支援嘅機構,例如 母親的抉擇 或者 青躍 ,一齊商討可行嘅方案。

糖不甩亦會一直係度為你提供支援。無論發生咩事,你都唔係孤單一個,只要你願意,有好多人都好樂意為你提供協助㗎!

我哋真係唔可以比屋企人知道,想問全個墮胎過程只有我哋知道而屋企人唔知道得唔得:pray:t2:

Hello @Jaycgan

回應返你嘅問題,基本上去家計會做檢查為準備墮胎嘅過程,都係唔會通知家長,因為佢哋唔會突然間有家長嘅聯絡方法,但係如果真係去到做到墮胎嘅時候,家計會都會提議返你去通知你嘅監護人,因為成個手術嘅過程都有風險,亦有啲女仔佢喺過程當中適應得唔係咁好嘅話,係有可能會有生命危險… 都見到你有講好唔想畀屋企人知道,明白到每個屋企都有要面對嘅情況,所以如果你哋真係唔想比屋企人知都係明白嘅。

雖然你同你女朋友都有共識有bb之後,都會選擇墮胎呢個解決方法,但係墮胎嘅成個過程其實對女仔嘅心理同生理都會造成好大嘅影響,同時間作為陪伴者 – 伴侶,即係你,其實都會有好大嘅心理壓力要面對,都會對你造成好大嘅影響,所以都係需要慎重考慮先至做嘅一個決定,都會強烈建議你同你女朋友,即使係虛驚一場,之後如果現階段係未準備好組織家庭有屬於自己嘅bb,都可以傾一傾究竟用咩安全嘅方法,去保護自己嘅身體再去進行性行為!

如果真係去到墮胎嘅呢一步,我哋之前所提議嘅 “母親的抉擇” 其實會有專業嘅社工可以陪伴你去經歷成個過程,同時間佢哋都會提供宿舍,可以畀你女朋友喺墮胎前或後嘅過程裏面,喺宿舍住調整心情去面對呢一個對於生命同身體都好重大嘅變化,亦希望你記得我哋都會喺度同你以及你女朋友一齊度過。

我已夠16但係未滿18

呢度係講緊女性嘅年齡呀,都想知道女朋友幾多歲架?

不過好似上面 Kitty咁講:

雖然女性需要年滿16歲先可以合法地進行陰道交,但無論你係幾多歲,家計會職員都係唔會喺未得到當事人同意下通知家長或報警。不過因為終止懷孕始終都係醫療程序嘅一種,如果未滿18歲,家計會都係會建議求助者自行通知家人,去確保安全。如有需要,輔導員亦會提供相應嘅協助去支援求助者。

所以除非你親口/親手交出父母/監護人嘅電話,否則都唔會有人知道架。

不過係另一個post都見到你哋驗孕嘅結果係顯示冇懷孕,所以都唔需要咁擔心呀:smiling_face_with_three_hearts: