同女朋友做完我地通常都會傾返有咩可以改進，而我最經常聽到嘅都係：可唔可以唔好頂咁入，唔好咁大力。 最近同女朋友做完，我出左之後攞水俾佢飲再幫佢清潔返。見到佢好似完全無曬力咁訓左係床，當刻個心唔係幾舒服，好似我搞到佢太攰，加上之後成晚佢不停話入面有種被擴大嘅感覺，同埋落床個時腳震震咁企唔穩，就更加令我唔開心。回想起之前d ex 都有差唔多經歷，仲俾佢地話我大食，有d唔開心。
女朋友事後有send d msg 俾我話正常做愛應該保持係半個鐘內，但我真係出唔到，有咩方法可以令女方無咁刺激而我又易出到呢？ 另外想問如何女朋友唔想咁入，但我又鐘意俾包裹住嘅感覺應該點算好？
另外仲想問，我發現次次同依加呢個女朋友做都入唔曬去，大概有一至兩隻手指位咁上下留左係出面，但我同女朋友都feel 到到頂，係米身體有咩問題所以入唔曬去？
你好呀 @Facili 
好欣賞你同會女朋友係性行為後傾返有咩可以改進同埋幫佢清潔，睇得出你好顧及女朋友嘅感受，亦都好愛佢，唔係每個人都會咁做架。
我諗呢度有兩件事你比較著緊，
首先係女朋友感覺太入有啲唔舒服。可以嘗試前戲做得長少少，因為性興奮嘅時候陰道會擴大同埋拉長，肌肉亦都會變得比較放鬆。睇下增加或者調節前戲部份之後會唔會比較好啲，而詳細可以參考我地前戲系列：
另外就係女朋友認為性行為時間比較長，但你需要多啲時間先可以射精。每個人對於性行為需要幾耐都會有唔同嘅感覺同喜好，例如曾經有研究指出由插入到射精所需嘅時間係可以由少於1分鐘至大概1小時不等，但亦冇一個黃金標準或者幾耐為之「正常」，完全係視乎自己同對方嘅需要。其實唔單止女朋友需要多啲前戲嘅時候，你都可能有需要嘅，可以同女朋友傾下會唔會可以試下用唔同方法幫你刺激陰莖，當有感覺先進行插入，睇下咁樣會唔會好啲。同時亦都可以用一啲性玩具配合嘅，你可以用一啲有震動器嘅陰莖環，但係震動嘅地方可以放係陰囊嘅地方，一邊刺激陰囊一邊插入。另外亦都可以試吓選用一啲較刺激嘅安全套款式或者潤滑劑，令刺激感增大都會更容易達到興奮或者高潮，會有想射精嘅感覺。
至於話入唔曬去嘅情況，唔洗擔心，唔係身體有問題，只係每個人嘅身體都會有啲唔同，就好似我哋每個人嘅樣同身高都唔一樣咁，係好平常嘅事。性興奮時陰道平均長度會大概增長至9.5 - 10.5cm（數據會隨着唔同種族嘅人有所改變，呢個數字主要係亞洲嘅情況），而如果陰莖嘅長度超過咗呢個數值，都有可能令伴侶感到頂得太入嘅。要解決呢個情況，可以試吓用陰莖環，但唔套到底，只係套到陰囊前。咁當你插入到果個位置就會感覺到阻力，而且陰莖環嘅震動都可以帶俾你更多嘅快感。市面上亦有一啲產品係專為類似嘅情況而設，例如：https://ohnut.co ，香港都有成人用品店舖有售賣，可以自己搜尋一下。
另外都留意到女朋友反映喺過程中覺得太大力，有唔舒服嘅感覺。除咗調整抽插過程嘅力度，都可以試吓調節所用嘅體位，睇吓會唔會改善到。因為每個人嘅性器官（包括陰莖或者陰道）除咗長度粗度不一樣之外，其實角度都會有所不同，以致喺唔同嘅體位中，如果性器官唔能夠互相配合，就有機會出現唔舒服嘅感覺。除咗試吓唔同體位，亦可以喺同一個體位之內嘗試做小小嘅改變，例如傳教士式用枕頭墊起對方嘅pat pat，後入嘅時候對方上身趴低，將插入嘅方式同角度調整，都有可能帶嚟唔同嘅感受。
最後，見到你同女朋友之間關於性行為狀況嘅討論好多時都發生係完事之後。不妨鼓勵女朋友喺過程中有唔舒服嘅感覺就馬上出聲，因為完事過後都好難追溯返係邊一個位、邊一種力度、速度令佢覺得唔舒服。如果係果一刻對方就清晰地表明，除咗可以即時停止，減少唔舒服嘅情況，大家都會容易啲調節跟住落嚟嘅性行為
好多謝你咁有heart嘅回覆。 我有好努力同女朋友做前戲，只係佢唔鐘意幫我，佢有話過用口好攰，所以我都無逼佢幫我。
時間個方面，我無特別count 用左幾多時間，我諗大概成件事兩個鐘左右，係唔係唔正常？係米應該要睇醫生？
其實我有同女朋友講過如果過程中有唔舒服要出聲，亦好encourage 佢同我提出佢想要點/點先令佢舒服，但我諗佢都係怕醜所以無開口講。唔知點先可以開發到佢坦白講出黎。
最後講返入唔曬個問題，其實我地已經一齊左6年，但有時做耐左我都係會覺得好逼。想問點先可以令佢適應到呢？ 我提出過不如試下用玩具，但佢refused 因為佢唔想我以為嘅物件入去。
Hello @Facili
首先，前戲其實有好多種，除咗口以外，仲有手同埋其他嘅方法，有時候用口好攰係因為用唔啱方法，同一時間亦都唔知道控制用力… 其實網上面而家都有教一啲前戲嘅提議方法，你同女朋友亦都可以參考下，搵到一個大家都舒服而且唔攰又有情趣嘅前戲。有一條問題係有關於唔放性玩具入去女朋友陰道可以點樣令到佢放鬆，的而且確有時女性唔鍾意性玩具係陰道係因為其實佢會覺得性行為係伴侶之間感受身體嘅一種方法，有時候反而性玩具唔會令到佢感覺舒服，同一時間其實性玩具唔係淨係得插入式，仲有刺激陰蒂嘅性玩具，而由於陰蒂其實係有好多神經末梢，非常敏感，好多女性其實係喺刺激陰蒂嘅時候比起刺激陰道係更加容易有性歡愉甚至達致性高潮㗎~ 除咗性玩具之外，其實我哋嘅手指都可以同對方進行指交，喺呢方面呢都可以研究一下~
雖然我哋講性行為嘅過程係情侶之間培養感情方法，但係其實同一時間亦都可以當係一個實驗嘅過程，去了解多一啲伴侶身體嘅真正需要，咁樣嘅情況底下，更加提議你哋可以喺進行插入性行為之前做多啲唔同種類嘅小實驗，例如當日花多啲時間喺撫摸互相嘅身體，係呢個小實驗嘅過程裏面，可以詢問多啲另一半撫摸邊啲位置，或者用邊一種嘅力度，會令到對方產生性快感，既而更加明白到對方。如果測試到可能有一啲嘅力度對方好舒服，但係自己做起上嚟其實比較攰嘅，就可以慢慢喺實驗嘅呢個過程，去睇下有冇一啲嘅小技巧係可以自己做完對方嘅感受一樣但係又會冇咁攰。我哋之前其實都有出過一個post關於口交嘅技巧，你都可以撳入以下嘅link去參考下:
https://www.stickyricelove.com/post/口交情趣小tips-陰莖篇
好欣賞女朋友會主動地同你講你嘅插入令到佢有唔舒服嘅感覺，因為以你嘅說話睇得出女朋友喺性呢方面應該比較怕醜，所以你都會擔心佢會唔會唔好意思講出自己嘅感受，明白到你好愛你女朋友，所以喺個過程裏面好想自己享受到嘅同時，女朋友亦都舒服，亦好重視佢嘅體驗感受，係咁嘅情況底下，可以嘗試一下喺唔係進行性行為嘅時候去討論喺性行為過程裏面嘅感受，有少少次賽後檢討一樣，我提議你可以直接同女朋友講，你好希望佢都可以喺性行為嘅過程裏面享受，同一時間每一個你喺性行為嘅過程裏面用過嘅姿勢，過程當中嘅速度同力度，究竟對方鍾意慢一啲定係快一啲，其實可能每一次都唔同，所以更加需要你哋喺唔係進行緊性行為嘅時候攞出嚟講。
有時候伴侶喺性行為過程裏面唔敢表達太多自己嘅感受，因為好擔心自己會影響咗另一半嘅興致，同一時間影響你哋都珍惜嘅關係，既然你同你女朋友都咁愛對方，咁更加需要喺呢方面做好良好嘅溝通呀~