我最後一次月經係11月11日至11月16日…
正常應該12月8日黎…但今日仲未黎…
13/12，16/12分別驗左孕都係得1條線…
12/14開始睇中醫…至今食左9劑中藥，都未黎m…
我可以點算…
利申：由3月開始黎足接近3個月m，一直睇醫生都話苛爾蒙失調，最後5月入院宮腔鏡手術發現子宮內膜瘜肉，已清除…
Hello
知道遲遲未嚟月經令你好擔心，但影響月經嘅因素有好多：
-
首先想問吓你，由三月開始，醫生診斷你荷爾蒙失調後有冇開調經藥俾你食？因為調經藥係取代咗原先身體嘅月經周期，所以一般情況下，喺進食調經藥下嘅月經都會較準。當你停止服用調經藥後，身體亦都需要時間去適應，令月經自然嚟翻，咁所以停左藥之後月經周期可能會有所調整。
-
見到你有提及12月開始睇中醫，中醫同西醫最大嘅分別係前者係需要時間去調理身體，所以食完中藥唔會即時見到藥效(嚟m)。透過中醫去調理身體一般都需要以月來計先會見到成效，詳細情況你可以同返自己嘅中醫師溝通，睇吓會唔會有一啲比較快嘅藥方可以試吓。而且都唔建議中西藥一齊食，因為無論西藥定係中醫嘅調理方式，都一定會影響身體同埋月經周期，所以服用兩種藥物可能會為身體帶嚟負荷。而且你有提及五月嗰一次手術，其實都對月經帶嚟一定嘅影響，因為身體都要時間去適應呢個轉變。
-
見到你提及自己都有試過驗孕，結果都係冇懷孕。一般來講係性行為發生11日後或者預計月經嘅日子驗結果已經會非常準確。所以如果你有喺合適嘅日子按照驗孕棒嘅說明書驗孕的話，現時我哋已經可以排除係因為懷孕嘅原因而導致月經未嚟。除咗荷爾蒙失調，我哋可以嘗試喺生活作息方面入手了解原因啊
呢段時間有冇嘢令你覺得好大壓力啊～因為有好多因素例如：飲食習慣、作息時間、情緒壓力等會引致內分泌失調。所以試吓放鬆心情，遠離壓力來源，唔好因為未嚟月經而感到太擔心，相信心理上嘅轉變會令身體慢慢回復正常。
由三月到而家呢段時間，都見到你身體上有好多嘅轉變，而身體都需要時間去適應同調整，所以有可能會出現一個新嘅月經周期。如果真係遲遲都未嚟月經，建議再去睇西醫，睇吓需唔需要你提供催經～
希望解答到你