唔想咁快做老豆

前幾日同女友做愛( 25號
射精之後等左約十秒之後拔出陰莖時個保險套脫離左。。。然後有部份精夜流左在陰脣位置 之後同女朋友清潔完 過約二十分鐘又再有過 今次無射到但都有戴套 之後就好擔心會唔會有。。。。
女友月經週期 29天 本次初潮本月19號 會唔會有事架。。。有左又可以點落個B 唔想比家人知道這事
另外 之前女友在十二月七號食過事後丸。。會唔會影響之後的排卵期架。。
依家好驚 好焦慮。。。

你好呀 @TG1882740 :wave:t2::wave:t2::wave:t2:

因為陰唇都比較近陰道,精液有機會流咗入陰道裡面,所以懷孕嘅風險都比較高。下次要記住,射完精之後要用手撳住安全套嘅底部,馬上抽出身體,因為陰莖係射完精之後會慢慢疲軟,支撐唔到個安全套,導致有安全套脫落嘅情況。:grinning:

都想知道女朋友嘅月經週期係點樣計出嚟架?一個月經週期係由月經嚟當日直到下一次嚟月經前一日為止,不過月經週期好容易受其他內在及外在因素影響,例如荷爾蒙分泌、飲食、作息、壓力、藥物等等,所以每人每次月經週期都有機會唔同。即使係月經週期相對比較穩定嘅人,都有機會因為身體情況嘅改變而出現浮動,令月經週期有變化。因為每一次月經週期都可能唔一樣,所以單憑計算日子(例如一啲app/網站嘅紀錄)並唔能夠準確判斷月經週期嘅時間,但呢啲記錄可以幫助我哋更了解每個週期嘅變化。:face_with_monocle:

另一方面,事後丸的確都會令下一次月經提早或者延遲幾日。見到你提及女朋友今個月嘅初潮係19號,不過,一般「初潮」都係用來形容第一次嚟月經嘅狀況,所以都想了解多啲你所指嘅情況。如果你所指嘅係女朋友今個月19號嚟咗月經,咁基本上7號所食事後丸已經發揮效用,直至19號嚟月經前都係冇懷孕嘅。雖然事後丸一般只會影響一次月經(19號嗰次),之後身體會慢慢回復至以往嘅月經周期。但排卵期/安全期往往都係要月經出現之後先可以較準確推算到上一次排卵期係幾時。所以,除非喺醫護人員指導下每日用排卵試紙進行測試,否則我哋係唔能夠準確地知道究竟邊一日排卵。現階段,係冇辦法知道身體係19號周期開始後係咪已經排卵。:pleading_face:

因為25號當日嘅性行為精液有直接接觸到陰唇,有一定嘅懷孕風險。如果擔心的話可以係性行為發生120小時之內(大概係12月30日完結之前)透過食事後丸作緊急避孕。因為事後丸屬於醫生處方藥物,如果有需要,見醫生嘅時候可以同佢提起12月7號都有食過事後丸,等醫生更準確咁判斷係咪仍然適合透過食事後丸作緊急避孕。:nerd_face:

如果唔會做緊急避孕,可以係性行為發生7日後(1月1號)買驗孕棒驗孕,嗰時已經可以得到初步嘅結果,而你喺6號嘅時候(性行為發生11日後)都可以再去驗,就會得到一個比較準確嘅結果。建議你可以用電子驗孕棒,唔單止會比較清晰啲,如果真係驗出有懷孕嘅話,仲會有埋懷孕嘅週數,咁就唔怕睇錯啦。到時無論結果係咩都好,都可以上嚟同我哋再分享。假使真係意外懷孕,其實選擇都有好多,屋企人嘅反應亦未必係我哋想像中咁反感。如果到時有需要,我哋都會陪住你一齊面對架。:smiling_face_with_three_hearts:

係唔係因为精子最多在人體內生存7日 所以7日後驗晨尿無問題就無事架啦?

Hello你好呀 @TG1882740

其實一般情況下精子係體內最多都只能夠生存到5日,而點解7日後驗孕就可以得到初步結果係因為驗孕棒嘅原理都係透過檢測尿液中嘅hCG(人絨毛膜促性腺激素)含量嚟判斷有無懷孕,而呢種激素會喺卵子受精著床後開始分泌。一般受精著床嘅過程需要6-9日,所以通常係性行為發生後第7日驗孕已經可以達到初步嘅結果。而如果係11日後再驗,呢個時候受精卵已經完全著床成功,體內嘅hCG分泌亦會可以透過尿液被驗孕棒檢測得到。而係預計月經回嚟嘅日子再驗就可以再次確認結果。如果有按照說明書指示去使用驗孕棒,而結果係顯示陰性, 咁就代表冇受精,亦都代表冇懷孕。:blush: