驗左4次孕…

發生性行為之後嘅17日驗咗2次 18日又驗左一次 呢一次等咗5分鐘都係一條線 但係唔知點解過咗幾個鐘之後 有一條超級淡嘅線出咗嚟 但真係超級超級淡 要超級仔細睇先睇到 驚得滯然後又驗咗次 都係冇兩條線的 咁其實係咪即係都唔係有左㗎喇?

因為遲咗嚟M所以好驚

Btw 我feel到谷M 但成個星期都仲未嚟,又腰痛又胸脹,好驚係嗰啲早期懷孕、因為真係好似

Helloo

文字入面我都感受到你好擔心好焦慮:pleading_face: 呢度我都提供多少少資料俾你,睇吓你會唔會覺得有用呀

首先月經其實都受好多唔同因素,例如最近呢個月有食過藥、飲食唔均衡、生活唔定時、情緒有起伏、壓力過大等等… 都會令黎月經週期變長/變短呀。而腰痛、胸脹嗰啲先兆其實唔一定同懷孕有關,血液循環疾病、心理因素等等都可能會令我哋出現類似嘅身體反應。

另外我都見到你驗咗4次,呢度想同你解釋下驗孕嘅原理先,其實佢係透過檢驗尿液入面嘅hCG(卵子受精着床後身體會產生嘅荷爾蒙)水平。一般受精卵著床需要6-9日,所以性行為7日後驗孕已經可以有初步結果。而性行為11日後驗孕,已經可以話係準確&可靠。雖然有啲牌子會建議用晨尿,因為會比較濃縮,hCG水平亦都相對會較高。但都要視乎情況,始終每個牌子都可能會唔同。只要有跟返驗孕棒相應嘅指示指示(再加上你已經驗咗四次),其實都可以容讓自己相信呢個結果(坊間嘅驗孕棒準確度都好高)。

最後都見你有提到「驗孕棒過咗幾個鐘之後出現咗一條好淡好淡嘅線」,呢度都想補充多少少。坊間嘅驗孕棒其實都有一個「有效嘅閱讀時間」,通常都喺5至10分鐘內(以說明書所述嘅時間為準)。雖然每隻牌子嘅有效時間都可能唔同,但都唔會長到幾個鐘之後仲有效,因此我哋可以判斷嗰個「好淡好淡嘅線」其實係唔準確嘅結果,呢度可以放心:)

希望解答到你啦,有咩歡迎上嚟再問