早幾日開始小陰唇反開內側個位有啲痕
跟住應該唔小心r損左 去廁所個陣r損個位有啲喇
到今日陰道口好似都有少少痕
但分泌物又正常乳白色 冇豆腐渣又冇變色冇異味
自己用鏡睇又唔識分有冇紅腫
所以我都分唔到係念珠菌定咩
好驚係念珠菌 因為成日聽人講好難斷尾
同埋奇怪地係佢好似夜晚先痕啲 朝早冇咩事
另外因為未有過性行為 好驚如果真係陰道炎嘅話要塞藥會好痛同唔知點搞
之前俾男朋友用手指插過少少入去都覺得痛🥲
Helloo
如果分泌物係正常乳白色 (透明-偏奶），帶有黏性呈蛋清狀態嘅話，呢度聽落去都唔似係有異常嘅:)；但同時我都見到你話陰道有無故&持續嘅痕癢，反映陰道可能都有啲情況出現咗，建議向醫生詢問返會好啲呀
正如你所講，一旦感染念珠菌，一般都會出現白色豆腐渣狀分泌物嘅症狀，而性器官會感到痕癢灼痛，但未必所有人都會咁，所以都係要透過醫生檢驗先會有一個確切嘅答案，而就算係陰道炎都好，都唔一定關念珠菌事，可能係清潔上、其他細菌感染引致都話唔定。
同埋呢度都想問下平時有冇清洗內陰唇嘅習慣？因為嗰個位置都容易被忽略令到佢容易積聚細菌造成感染呀 而且平時都可以着啲乾爽透氣嘅內衣物，一黎可以加速癒合，二黎可以令陰道保持乾爽減低細菌滋生。
另外都聽到你同男朋友sex嘅過程入面有痛楚，呢度都建議同男朋友溝通返好啲，畢竟身體都要啲時間去適應。如果真係好唔舒服都唔好勉強自己。或者過程入邊其實都可以用多啲潤滑液去輔助，或者用指交套減低因為指甲太鋒利而刮傷陰道嘅風險。
最後都想補充多少少，並唔係所有陰道感染都需要用到塞藥，有啲只係需要口服藥物、藥膏已經治療到，而即使要用塞藥都好，都唔會好似手指咁大，而且會有埋導管輔助，呢點唔使擔心:)
祝快啲好返