家計會condom

我同男朋友都覺得出面買condom有啲貴
見到家計會60蚊有12個
但係睇網上啲人話質量唔係幾好(例如有穿窿)
咁其實係平就冇好嘢
定抑或要睇運氣

Helloo

其實並唔關價錢同埋邊度買事呀:rofl:,無論我哋去邊度買都好,都應該購買前/使用前/檢查一下佢有冇破損。而導致安全套破損嘅原因有好多:有可能係原廠監控唔好導致品質出現問題/平時放銀包嗰陣無意刮到/又或者打開安全套嗰陣冇沿住開口個邊邊打開/指甲刮到造成破損。只要喺使用前檢查清楚,確保包裝冇漏氣,套冇穿冇過期並且貼合陰莖(俗稱啱size​:rofl:)嘅話,其實都唔使太擔心嘅:)另外家計會賣嗰隻係杜蕾斯唔係啲來歷不明嘅牌子,呢方面都有一定嘅保障。

不過我哋都要留意,佢賣嗰隻超薄裝屬於天然乳膠,如果本身對乳膠敏感嘅話就唔適合啦。同埋使用乳膠避孕套嘅過程入面絕對唔可以用油性潤滑液/接觸到油,因為油會損壞甚至侵蝕避孕套導致失效,同埋都應該盡量將避孕套放喺陰涼乾燥嘅地方~

其實除咗家計會之外
仲有邊度買會平啲

因為家計會得一款
但係男朋友話唔想用超薄
佢話想用厚啲嗰啲
可以降低敏感度
其實係咪真係關事

Hello你好呀 @I_am_a_girl

的而且確係香港買安全套係比較貴嘅,而家計會已經係最平嘅選擇, 不過好似你咁樣講,如果係家計會買condom嘅缺點,就係佢哋只會提供比較少選擇,或者隔一段時間先會轉下款:thinking::thinking: 如果你要有其他嘅款式選擇,就要喺出面嘅超市個人用品部, 或者係一啲性用品店去買啦。有時候性用品店都會有優惠或者會員價,你都可以留意下,咁就可以用比較優惠嘅價錢去購買安全套~
其實而家都有啲嘅機構有提供免費嘅安全套, 例如關懷愛滋或者係善導會嘅水銀星三號, 但係好多時候都一次只會有幾個,而且你需要去佢哋嘅中心親自去攞,或者要用郵寄嘅方法, 你都可以睇睇呢一個會唔會係其中一個方便到你哋嘅選擇。

咁針對你另一個問題,就係安全套厚啲會唔會可以減低到陰莖嘅敏感度,的而且確會係嘅。 而家市面上面有好多標榜可以有延遲射精嘅安全套, 都會用唔同嘅方式去減低陰莖嘅敏感度, 除咗你所講嘅安全套物料厚啲之外, 亦都有啲係透過設計令到龜頭冇咁敏感;都有一啲係添加咗有麻醉成分嘅潤滑劑喺個安全套裏面-不過如果選擇呢類型嘅安全套,都提提你要留意,因為呢種麻醉成分都有機會令到皮膚敏感,如果本身皮膚容易敏感就要小心選擇啦。

如果其實你哋都仲喺度探索緊邊一種安全套比較適合自己, 都可以考慮去性商店去買安全套。因為好多性商店其實都可以買散裝嘅安全套,咁你就可以試下唔同種類嘅安全套,慢慢搵到最適合你哋嘅:blush::blush: