擔心會有咗

同兩日同男朋友進行性行為,有配戴安全套並依指示套至陰莖根部。但係個套好易鬆 套唔哂入根部。佢帶住射咗精(少量)後,之後蚊出嚟嗰陣先除套再俾我口爆。但係驚個套並非套至根部,會有咩意外(雖然男朋友話啲精液都布滿在安全套的尖端小囊裡)
咁岩係黎完m後幾日先扑嘢(安全期內?)有啲擔心如果等七日先驗孕會有機會有咗,應唔應該去家計會見醫生拎藥?如果18歲會唔會通知家長?

Hello~ 喺安全套唔係完全緊貼陰莖嘅情況下發生性行為,尿道球腺液 (陰莖性興奮時嘅分泌)同精液有機會外漏,所以的確係有懷孕風險嘅。見你提到依次性行為係2日前,建議盡快去診所向醫生拎取緊急避孕藥,緊急避孕藥主要分為兩種,一種嘅服食時限係性行為嘅72小時後,愈遲服食愈會影響藥效,另一種嘅服食時限係性行為嘅120小時後,服食時限唔會影響藥效。因為緊急避孕藥喺香港係必須經醫生處方嘅藥物,而且亦都唔係每個人嘅體質都適合服用,所以建議去家計會、母嬰健康院或者私家診所經醫生評估後處方。

另外見你提到安全期,一般來講所謂嘅「安全期」係指月經前嘅七日同月經起計七日。不過呢一個計算係好科學地以周期數字係28日,而且係第14日排卵去計算。但現實生活中唔係每一個人嘅周期數字都係28日,亦唔係每一個女性都係喺第14日排卵,所以一般情況下係唔會建議透過計算安全期或者危險期去避孕。

而且其實要月經嚟咗先至會知道到底幾時係前七日同後七日,同埋大概知道呢個月嘅周期去大概計算返排卵日。所以其實係未嚟月經嘅日子之下,係唔能夠推算到幾時排卵或者幾時係安全期嘅。

至於安全套未能緊貼陰莖方面,有機會係因為安全套嘅尺寸唔合適,建議喺購買安全套前先量度陰莖勃起後根部嘅圓周,再喺購買時參閱包裝上標示嘅尺寸,一般歐美/香港牌子嘅安全套尺寸會以圓周除二 (即寬度) 標示,而一般日本牌子嘅安全套尺寸就會以圓周除以3.14 (即直徑) 標示,揀岩尺寸就唔洗怕安全套鬆脫啦:blush:

即係指懷孕機率大?

就如 @Ana_StickyRiceLove 所講

今次性行為係有懷孕風險嘅。今次嘅情況比起完全唔用安全套係較低風險,但要造成懷孕只需要一粒精子。「高風險」唔代表一定會懷孕,但同一時間,「低風險」亦唔代表一定唔會造成懷孕。所以只要性器官或者體液有可能/已經直接接觸到,就會有懷孕同傳播性病/其他疾病嘅風險。而且雖然係月經後數日發生性行為,但其實月經週期同排卵期都會受不同因素影響,難以單憑日子去推斷,而且亦會有人喺係月經期間身體已經會排卵。

既然知道有可能有懷孕風險,你可以選擇嘅係係指定時間內透過醫生處方食事後丸做緊急避孕,或者等7/11後利用驗孕棒驗孕。不妨同伴侶商量一下之後再作決定呀 :relaxed: 但因為未來兩日都係公眾假期,家計會診所都唔會開門,如果需要事後丸,就只能夠去私家診所或者急症室。要留意返現時如果你會進行緊急避孕,你只能夠選擇120小時內服食嘅款式,求診時都可以問清楚診所有冇提供相應藥物先去睇醫生呀~