我喺今個月中去私家診所安裝咗子宮環，佢同時幫我做埋抺片測試。我上咗環後keep住有食佢處方嘅止血藥、止痛藥、抗生素等，一個星期多啲就無點滴出血，亦都無痛等副作用。之後，我就嘗試咗幾次插入式性行為，全部都係安全性行為，但每一次之後都有陰道微量出血，最近更感到開始有熱感、痕、痛，而陰道亦出現返類似安裝子宮環後試過有嘅點滴出血。咁啱呢個時候抹片嘅報告出咗，話我有念珠菌感染。我唔想去返嗰間私家診所（因為等得好耐、診金高昂），於是就去家庭醫生度攞咗醫念珠菌嘅藥，現時服用中。但我有個問題，就係因為呢個報告係喺我發生陰道交前做嘅，意味住我喺有陰道交前已有念珠菌，咁我喺陰道交時所產生嘅不適係因為念珠菌，定有其他原因（例如性病）？我下一步應該點做？
Hello 佩戴子宮環後有機會出現唔同形式同程度嘅副作用，而陰道點狀出血就係其中一種常見嘅副作用。而每個人適應嘅時間都唔同，但一般適應期都係大概3個月至6個月。所以最近陰道又出現返點狀出血都有可能係子宮環嘅副作用之一。特別係如果你係佩戴藥性子宮環的話，因為含有荷爾蒙成份，陰道點狀出血都係比較常出現既副作用。
係性行為後出現輕微陰道出血有機會係因為潤滑度不足，亦有機會係因為你現時有念珠菌發炎嘅徵狀。其實係念珠菌發炎嘅狀態下一般都唔建議發生性行為。因為其實係一般狀況下身體都會存有少量念珠菌，但係陰部pH值失衡、抵抗力下降或其他外在因素影響下（例如天氣炎熱潮濕），念珠菌就會大量繁殖，導致發炎嘅徵狀出現。有人發炎時唔會有任何症狀，亦有人會出現陰道痕癢不適、出現豆腐渣狀分泌物等等嘅症狀。呢啲症狀都同你現時感覺到陰道嘅不適好類似。
現時嚟講，首先建議後念珠菌發炎嘅情況完全復原前都避免發生性行為，定時服食藥物之外，亦要保持健康生活習慣，維持陰部清潔乾爽，希望發炎情況盡快消退。其次，一般佩戴子宮環後2－3週都會返去醫生度覆診，檢查子宮環係體內嘅情況。唔知道你本身嘅診所有無為你預約呢個覆診？如果無的話，可以考慮去家計會診所求診（26歲以下可以去 青少年保健中心，26歲以上可以前往 節育指導診所。可以先打電話過去預約）。除咗檢查子宮環係咪擺放咗係正確位置，都可以就住你最近感覺到嘅不適作進一步檢查。有部份人係佩戴子宮環後有機會出現盆腔炎嘅情況，病徵會包括腹痛、分泌物異常、發熱等等。由於部分症狀同其他情況（例如佩戴子宮環後嘅副作用或者念珠菌發炎）都類似，所以都建議進行檢查，起碼可以令自己更安心。
至於你擔心會唔會係性病感染，因為性病需要透過性器官／體液之間直接接觸先會導致傳染，如果以往多無試過進行無套嘅性行為，咁都唔需要太擔心。而且抹片檢查時都只係發現到念珠菌發炎嘅徵狀，如果係有其他性病感染的話，相信醫生都會留意到，所以暫時都可以排除性病感染嘅可能性。不過，如果你想進行檢查的話，可以係去家計會預約求診時同職員講埋，到時一次過進行所有檢查。