事后丸,肛交 有左?

你好 希望你地可以好好解答下我:pleading_face::pleading_face: 謝謝
首先想問下安生期點計?
話說我30/12同男朋友做完(冇套)我已經6個鐘之後去咗食事后丸 但係我到而家都冇乜覺得有副作用 同埋我想問吓事后丸嘅成功率高唔高 因為聽人講話越快食越好同埋我已經買咗驗孕棒 我想問下我要幾耐先去驗 加上點驗?
之後今日我同男朋友肛交完 佢內射左2次 但係佢又冇流出嚟 不過我男朋友已經即刻不停用紙布抹 想問下係咪會中?
同埋肛交后 我個肚好痛 不停all 仲要係自己流左D出嚟食係自己忍唔住果隻 想問吓係咪正常?定係因事后丸搞到我肚痛?定係因為有左?
其實我而家已經好亂 乜都分唔清楚 日日都失眠 所以我唔知可以點
唔該晒:pray:t2:謝謝

Hello

首先想你知道,並冇所謂嘅「安全期」 :x:。你可能有見過「安全期」係指避開排卵期同排卵前後嘅日子。排卵期通常係月經前14日,而要等月經出現之後先可以推算份排卵日期,所以其實除非每日喺醫護人員指導下用排卵試紙測試,否則我哋唔能夠準確咁去預計幾時會排卵/月經。但係排卵同月經都會受好多唔同身體因素影響,每人每個月經週期同排卵期都可能唔同。所以,「安全期」並唔能夠作為安全可靠嘅避孕措施。喺冇使用安全措施嘅情況下,陰莖/陰莖分泌物(包括精液同尿道球腺液,尿道球腺液係陰莖喺受到刺激嘅時候分泌嘅透明液體,當中有機會含有少量精子)同陰道/陰道口有接觸,咁就會有一定嘅懷孕風險。 :confounded:

而緊急避孕藥,只要喺性行為72小時/120小時內服用,就會有效,當然越快食越好。而提返你,緊急避孕藥喺香港係處方藥物,要有醫生處方先可以食 :woman_health_worker:t2: :man_health_worker:t2:。如果你係經醫生處方服用藥物,服用之後冇嘔吐或者嚴重腹瀉,咁避孕成功率會好高;但如果你係自行購買藥物,因為唔能夠肯定你買到嘅藥物嘅質素,所以好難判斷藥效。

緊急避孕藥係通過高劑量嘅人造荷爾蒙去抑制排卵、增加子宮頸分泌物粘稠度使精子難以穿過、改變子宮內膜環境使受精卵難以著床,從而達致避孕功效。每人體質唔同,對於緊急避孕藥嘅反應亦因人而異,未必每人都會有明顯嘅副作用。不過想你知道,事後藥係有機會影響1-2次月經嘅情況(例如週期長度、流血量、流血日數、經痛程度等等),如果你今次月經較平時遲,喺排除懷孕嘅情況下可以唔需要太擔心。

而正因為緊急避孕藥係使用高劑量嘅荷爾蒙,所以建議同一個月經週期內只可以服用一次,而且唔建議連續兩個月經週期內都服用,以免對身體造成比較大嘅影響。而有啲醫生都會建議服用完緊急避孕藥後直至月經出現之前,唔好發生性行為。你可以考慮下呢個建議。 :relaxed:

而並冇任何一種症狀可以顯示有冇懷孕,如果想知道自己有冇懷孕,係需要驗孕嘅。驗孕係測試體內有無hCG呢種物質,hCG係卵子受精著床之後,身體先會產生嘅一種激素。而卵子受精著床需要6-9日時間。所以,喺性行為7日後驗孕,會得到初步結果;而喺11日後驗孕,會得到相對比較準確嘅結果。你可以計算日子,然後購買驗孕棒,仔細閱讀包裝/說明書上嘅指示,依照指示去進行驗孕。 :blush:

如果你哋發生無套肛交,而陰莖/精液/尿道球腺液並無接觸到陰道/陰道口,咁懷孕風險係好低嘅。可以參考:Login • Instagram

而因為你肛交有內射,即係有精液由肛門進入腸道內,所以會出現肚屙嘅情況,就類似灌腸咁。而且本身腸道相對敏感,當有「異物」進入嘅時候會加快蠕動盡快排出體外,所以你會出現肚瀉同肚痛嘅情況。 :persevere:

建議你下次再發生性行為嘅時候,無論係陰道交定係肛交,都可以使用安全套,可以有避孕功效,減低性病傳播或者其他感染(尿道炎/陰道炎/念珠菌感染)嘅機會,亦可以減少肛交後嘅不適。記得肛交後再陰道交,要更換安全套,減低陰道細菌感染風險;同樣道理,陰道交後肛交,都建議更換安全套。關於安全套嘅正確使用方式,可以參考:Login • Instagram