避孕藥減少m量!

請問是不是任何一款避孕藥都可以減少月經流量?
我買咗輕樂偶,thx

Hello
首先都想了解多少少,你係咪第一次食避孕藥?食咗幾耐呀?今次係你食完第一盒藥嘅月經?你食藥之前有冇睇過醫生先呀? :face_with_monocle:

雖然避孕藥好容易自己買到嚟食,但我哋都會建議第一次食藥之前,或者停藥之後想食返藥之前,要睇下醫生咨詢下醫生意見。因為一嚟唔係個個人嘅身體情況都適合服藥,例如有心臟/腎臟/肝臟/免疫功能問題嘅人,就未必可以食避孕藥;二嚟唔同款嘅避孕藥有唔同嘅人造荷爾蒙成份同劑量,醫生可以根據你嘅身體狀況同埋需要俾適合你嘅藥。如果你之前冇睇過醫生,都可以考慮去睇下醫生。你可以去預約家計會診所/母嬰健康院/部分私家診所睇醫生呀。 :woman_health_worker:t2: :man_health_worker:t2:

而改變月經情況,其實有唔少款式嘅避孕藥都會嘅。避孕藥嘅原理係通過人造荷爾蒙(雌激素),令到身體自身唔會分泌呢兩種荷爾蒙,從而抑制排卵,並且會改變子宮頸黏液嘅狀態(你可能會留意到分泌物有減少、變得相對比較黏稠),同埋改變子宮內膜嘅環境,達致避孕嘅功效。 :blush:

而正因為咁,服用緊避孕藥期間嘅「月經」並唔係冇藥物作用嗰陣因為荷爾蒙週期變化而產生嘅,而係「撤退性出血」-係因為服藥週期控制而出現嘅出血現象。如果你係服用輕樂偶,食21粒藥嘅時候身體有人造荷爾蒙,而停藥7日期間冇荷爾蒙,呢個變化會令到子宮內膜脫落,所以服用避孕藥一段時間之後,「月經」會變得規律。而好似輕樂偶呢種「低劑量」荷爾蒙避孕藥,因為改變咗子宮內膜嘅狀況,係會令「月經量」減少嘅,亦都因此可以舒緩經痛等不適。 :relaxed:不過並唔係每一款避孕藥都係咁嘅。如果你想轉食其他款式嘅避孕藥,建議你諮詢下醫生建議先呀!

而如果你係初初開始服藥,有機會因為身體仲適應緊藥物,所以月經未必會好規律,亦有機會出現經期間點滴出血。理論上3個月左右後,身體習慣咗藥效,月經就會穩定,點狀出血現象亦會冇咗;不過有啲人嘅身體可能需要相對長少少時間去適應,例如6個月,甚至有人要試過幾款藥之後先搵到最適合自己嘅藥。

所以,經量減少係服用避孕藥之後有機會會出現嘅現象,唔需要太擔心呀。 :wink: