好驚，幫男朋友打完飛機，之後有一齊沖涼，隔咗大約2個半，想嘗試入，因為我第一次，冇做過，太痛，入得半支，我都feel到再入會超痛，所以佢都冇再入，就咁頂咗十幾下，冼返出嚟冇再入，想問咁樣會唔會懷孕。。。我唔知佢啲前列腺液會唔會入到去，同埋我係危險期緊。
全程冇戴套㗎，咁樣係咪都好大機會有咗，我係咪應該食返粒事後？
當男性處於性興奮而未射精嘅時候時，陰莖分泌嘅透明無色液體，其實係叫尿道球腺液 (pre-ejaculate / Cowper’s fluid) ， 主要功能係提供潤滑作用，同埋中和酸性（陰道環境係酸性，而精子系酸性嘅環境係會有害，所以中和酸性有助增提高精子存活率）。尿道球腺液中係含有少量精子，有機會導致女性懷孕， 所以睇完你嘅分享，你嘅情況的而且確有一定懷孕風險。
而你所講嘅危險期應該係排卵期， 雖然我哋每一次月經嘅所謂排卵期及安全期都要等到下一個月經來臨嘅時候我哋先至可以正確地推算返， 但係如果你都有keep住用月經app 去紀錄，而你嘅月經一直以嚟都係穩定， 咁就真係有機會撞正排卵期，咁嘅情況底下你嘅懷孕機率係偏高嘅。
由於照你所講嘅情況，的確係有懷孕嘅機會，而因為緊急避孕丸喺香港係必須經醫生處方嘅，所以建議盡快去睇醫生拎取避孕丸。緊急避孕丸分為單一荷爾蒙（黃體酮 ）同黃體激素受體劑兩種，單一荷爾蒙嘅服藥時限為性行為後嘅72小時內，越遲服藥，失敗率越高；而黃體激素受體劑服藥時限就係性行為後嘅120小時內，服用時間唔會影響效果。所以如果決定服用嘅話，可以到家計會、母嬰健康院、婦女健康中心、婦科診所或者私家診所向醫生拎取，有關緊急避孕丸嘅詳細資料可以參閱以下網址：https://www.famplan.org.hk/zh/health-info/contraceptive-methods/emergency-contraception，不過緊急避孕丸並唔可以用作恒常嘅避孕工具，所以建議之後性行為時使用返安全措施，例如安全套、避孕藥、避孕針等等。
如果你性行為嘅日子距離而家已經過咗可以食事後丸嘅時間咁就可能要過咗七日之後去買驗孕棒驗孕。一般驗孕棒都要係喺性行為七日後驗孕，就可以攞到一個初步嘅結果。11日之後就可以攞到一個準確結果。 如果到時候你跟足說明書，驗孕棒上面係一條線的話，即係話係陰性，你冇懷孕； 如果係兩條線的話，即係你有可能好大機會已經懷孕，我哋會建議你搵醫生調查。