請問16歲以上去家計會嘅青少年保健嗰到配避孕藥係咪唔會要求家長陪同/監護人嗰啲證明架
同埋請問個流程會係點？需要準備啲咩？ 
你好呀， 你可以放心，如果你無主動提供，佢哋唔會要求你俾家長/監護人資料嘅。
因為你26歲以下，係可以用家計會嘅青少年保健服務，你可以直接打去想去個診所度預約，亦可以去家計會嘅網站揀返【醫療服務】
【青少年保健】【e-服務預約｜青少年保健服務】進行預約架啦。如果係用e-服務預約的話，職員會係辦公時間內打電話俾你了解多啲你嘅情況同埋確認。
不過，因為家計會要確保你係無懷孕嘅情況開始食避孕藥，所以會要求你係月經頭5日嘅時候先可以上去見醫生同埋配藥，所以你可以等到月經嚟嘅時候再打去book，如果唔係職員都會同你講下次嚟月經嘅時候先再預約。
去到預約當日，提供身份證登記後你需要填寫一份表格，主要都係有關個人資料同埋病歷。之後就會入房見護士，同你度高磅重，了解返你月經嘅情況，例如經血量、月經嚟嘅時間同維持幾耐、幾歲開始有性行為、同埋以往所用嘅安全措施等等。之後護士／醫生就會評估你嘅身體情況適唔適合食藥，同你解釋一下藥物嘅原理，同埋推薦適合你嘅牌子（如果你有自己想嘗試嘅牌子，到時都可以主動同醫護人員提出），最後都會同你講解下食避孕藥嘅注意事項同可能出現嘅副作用等等。同埋如果你第一次食藥，多數只可以配一個月嘅藥量，然後大概一個月後返去覆診，睇下你食藥嘅情況，無問題的話就可以買更多月份嘅藥物（呢個安排可能會隨著疫情發展而有改變）。當然，如果途中出現咗任何問題，都可以隨時打電話同佢哋約時間檢查。
咁之後就係俾診症費同藥錢（係網站入面都有列出大概收費），第一次去大概係$280 （醫生評估$150 + 護士評估$30 + 藥物$50-100），你打去預約嘅時候都可以再問一問職員。因為實際收費都會視乎你嘅身體狀況而有不同，例如需唔需要見醫生，定淨係見護士就可以或者需唔需要做額外檢查等等。所以第一次上去最好帶定多少少錢。如果成功開藥，之後主要想去配藥的話，就只需要俾藥物嘅費用。家計會嘅藥物係賣得比坊間平，而且有咩事亦可以隨時返去覆診，確保安全。交完錢拎埋藥物之後就可以離開診所啦。
明白，唔該！