我有冇破處?

我一直唔想太快破處,但同男朋友都有性需要,所以會有性接觸,但最多都係出面磨。咁琴日男朋友係出面磨磨下忍唔住插咗入去,佢話插咗半隻手指公嘅長度入去。我當時都feel到佢插咗入去,亦feel到佢頂到我處女膜,但可能當時我好濕,亦做咗好多前戲,佢插咗入去我都唔覺痛,亦冇撕裂嘅感覺(因為聽講破處會好痛同feel到撕裂感)。而且我當時係嚟m最後一日,仲會有好少量嘅血,佢插完我即刻用紙巾抹下面睇吓有冇流血,有好少量嘅血,大概兩三滴,而且係啡色,似最尾一日嘅m血顏色,我都覺得只係m血。所以想問吓根據以上特徵,我有冇破處,插完半隻手指公嘅長度入去,我唔痛,冇撕裂感,但feel到佢頂到我處女膜,亦有幾滴啡色血跡,想問問我有冇破處?:pray:t2:

Hi Nicole​:wave:t6:

關於呢點我哋都好難確實咁解答到呀,要靠醫生檢查先可以知道,目前只可以話有呢個可能,因為「處女膜」本身有唔同型態,撕裂嘅機會亦都唔同,所以有啲人未發生過進入陰道嘅性行為,就會因日常嘅活動而撕裂,亦都有啲人即使進行過插入式性行為都冇撕裂/或者未必第一次就完全撕裂。補充多少少,陰道冠其實唔係話好入,而且佢係一個中間有窿嘅組織,嗰個窿嘅形狀同大細會影響佢撕裂嘅機會,而撕裂後可能會造成血管破裂而有出血情況,血量因人而異,但並唔係每一個位置都有血管所以唔一定會流血㗎;另外,亦有第一次發生插入式性行為後,陰道冠未完全撕裂,但之後嘅性行為有出血嘅情況。而神經末梢主要集中喺連結陰道壁嘅邊緣位置。如果係接近中間位置撕裂,就唔太會覺得痛,因此「處女膜」有冇穿同以往有冇性經驗並冇一個直接嘅關係呀。

另外父權制度令社會- 不論男或女- 都承受住好多唔同嘅標籤同埋定型,例如女仔應該時刻保持貞潔,談論性/性需求大啲就會俾人話淫娃蕩婦,但其實每個人都會有自己嘅需求,因此唔需要為自己有性需求嘅事覺得羞愧;另外我哋嘅身體應該係自主嘅,即使冇咗嗰塊所謂「處女膜」都好(上面都提及過處女膜同性經驗冇直接關係),都唔代表啲咩~

多謝你嘅解答:bowing_woman:t2:
咁想問下如果檢查處女膜嘅要去邊度檢查同過程係點?:pray:t2:

Hello @Nicole
首先針對你嘅問題都有少少補充嘅,一般坊間所講嘅「處女膜」其實正式名字係陰道冠/陰道前膜, 咁陰道冠其實並唔係一塊一觸即破嘅薄膜,而係一個中間有窿、唔完全封閉嘅結締組織。之所以有窿係因為可以俾分泌物同經血排出體外,而窿嘅形狀同大細亦都因人而異。

都會想了解返點解你咁想知道自己究竟係咪所謂嘅「破處」?因為Andy所講嘅醫生檢查,並唔係指可以就咁去醫生度要求檢查陰道冠。而係因為陰道冠係好近陰道口嘅組織,所以基本上做任何需要檢查陰道嘅項目,醫生都可以大概憑肉眼觀察到陰道冠。但因為陰道冠本身就係有窿,所以就算係醫生檢查,佢都只會係睇到陰道冠大概嘅狀態。而且好似我哋之前所講,每個人陰道冠嘅開口形狀都唔一樣,其實肉眼睇都好難去分辨究竟佢現時嘅狀態係天生定抑或係發生過插入式性行為而造成。另一方面,除咗插入式性行為之外,其實都有好多行為有機會無意之間令到陰道冠有撕裂嘅,例如激烈嘅運動。

反而,因為你提及到男朋友有插入過你嘅陰道,都會想問返你哋有冇做足安全措施?因為無論喺性行為嘅過程有冇射精都好,如果係冇使用安全套或者其他安全措施, 其實只要性器官有直接接觸到 (無論有冇「破處」,因為陰道冠本身就已經有窿),都會有懷孕嘅風險。雖然對方只係插入少少,但係喺射精前其實陰莖都會排出尿道球腺,亦即係我哋所講嘅precum,裏面都有少量精液。即使係月經最後一日,由於排卵期都有機會係月經期間發生,精子一定進入體內亦可以存活最長5日。所以只要係冇做安全措施底下嘅性器官接觸,我哋都會定義佢為不安全性行為, 都會有懷孕或者感染性病嘅風險。

由於你所講性行為係發生喺琴日, 所以如果你哋係無用任何安全措施的話, 其實係可以服食事後丸。其實在發生性行為72小時(3日)/120小時(5日)之內服用事後丸,都有好大成效可以做到緊急避孕! 而係香港,事後避孕藥屬於醫生處方藥物,一般聲稱有售事後丸的藥房或網店,由於無醫生駐診,所以所賣的藥唔一定可靠。部分私家診所會有事後丸,你亦可以去家計會嘅診所求診,26歲以下可以去青少年保健中心,26歲以上可以去節育指導診所。聽日星期六家計會診所依然會應診,你可以聽朝打去預約,確保診所有位先去見醫生。留意返事後丸含有劑量較大嘅激素,所以服用事後丸之後,可能會出現噁心或不適等嘅副作用。亦有機會影響下一次嘅月經。

如果妳擔心嘅話,記得儘快諮詢合資格醫護人員嘅建議採取緊急避孕方法啦!希望可以解答到你最逼切嘅需要!

另外,如果醫生認為你嘅身體情況唔適宜服用緊急避孕藥,咁都可以考慮喺性行為120小時內由醫生放置子宮環作為緊急避孕嘅方法,與此同時,子宮環亦可以作為長期避孕措施。你哋可以盡快預約家計會診所/母嬰健康院/部分私家診所睇醫生。

多謝你嘅解答:pray:t2::pray:t2:
男朋友係有戴套嘅,但因為冇諗住插,所以戴得好求其,都係笠住個頭就算。插入個陣都有戴但都係套得好出,所以我都唔放心,去藥房買咗事後藥食,牌子係安立婷,但聽講有d藥房會賣假貨,咁我依家食咗仲會唔會有風險?
仲想問吓如果係本身就有窿嘅肌肉組織咁佢係咪有彈性?即係破處其實係撐大咗陰道冠嘅窿?如果男朋友只係好快咁插咗一下就掹返出嚟,咁撐大左嘅窿會唔會合返細?而且冇出血唔痛係因為過程冇傷害到血管?如果2年冇同任何人發生插入式性行為,咁兩年後陰道冠咁窿會唔會自動合返細,好似冇破過處咁?

Helloo

字裡行間我都好感受到你嘅擔憂,相信呢件事都一定困擾左你唔少:pleading_face: 呢度我都提供多少少資訊俾你,睇吓會唔會幫到手啦。首先回應返「事後丸」嗰一點先,其實佢喺香港屬於處方藥物,需要由醫生處方(可以喺私家醫生、家庭計劃診所或帶備醫生處方去社區藥房買);而如果唔係經正規渠道去藥房買嘅話的確有風險喺度,因為有機會正如你所講,嗰隻藥物未必係有保證/可能已經過期,咁樣就會減低佢嘅效力。另外關於安全套我哋都需要留意,喺使用嘅時候安全套一定要套到落根部並且貼緊陰莖先可以發揮佢最大嘅功用,下面都提供個網址俾你參考下呀:)

另外我都想就「陰道冠」嘅事補充多少少,其實 陰道冠嘅彈性 同 陰道肌肉嘅彈性 係有分別。前者「陰道冠」會因為外來物嘅進入而令到嗰個「窿」擴大,但如果外來物本身比較大/撞到某一啲位,其實佢甚至有機會撕裂,因為陰道冠本身係結締組織,因此佢唔會好似陰道肌肉咁可以發揮埋收縮放鬆嘅功能;如果嗰個「窿」擴大左或者出現撕裂嘅情況,佢係唔會自動縮返細或者回復原狀呀。具體啲咁講,就好似你飲珍珠奶茶咁,支飲管拮落個蓋嗰陣都會穿咗個窿,但如果呢個時候你用支再大啲嘅飲管插入去,個窿就會擴大,好似陰道冠咁。不過,就算擴大左/撕裂咗都好啦,由於陰道冠真係超級薄,因此對方陰莖進入嘅時候佢都唔會感覺到陰道冠嘅形狀/係咪穿咗,因為真係簿到feel唔到咁滯。

最後我都好感受到你擔心陰道冠係咪穿咗呢件事,如果你願意嘅話會唔會都方便同我哋分享一下點解會有呢份擔憂呀:pleading_face:

根據你上述嘅講解,即係我好大機會已經破咗處,但連自己都唔知破咗。咁即係破處係冇任何特徵可以分辨到?如我未來同伴侶發生性行為,佢係唔會知道我曾經有冇發生過性行為?同埋我1/4食完事後藥,今日1/9下體有流少少啡色血,咁係咪正常?流血有冇代表d咩?

Hello​:smiling_face_with_three_hearts:

  1. 「破處嘅問題」:冇錯呀~其實會連自己都未必知道陰道冠係咪穿咗,唯一可以觀察嘅係撕裂時造成嘅痛楚同埋出血嘅情況。但呢樣嘢都係因人而異,例如陰道冠較厚嘅人喺破裂嘅時候可能會感受到較大嘅痛楚同埋出血,但陰道冠較脆弱嘅人未必會感受到痛楚或者有出血嘅情況。所以我哋都唔可以單憑呢啲原因去肯定自己有冇「破處」:face_with_monocle:

  2. 至於「未來同伴侶發生性行為,佢係唔會知道我曾經有冇發生過性行為?」,其實無論肉眼定係陰莖進入陰道嘅時候,都好難見到整個陰道冠嘅組織,或者feel到陰莖穿過陰道冠呢個動作,我哋亦都好難去判斷陰道冠撕裂係由啲咩原因造成,發生性行為只係其中一個會導致陰道冠撕裂嘅原因。另外,都知道社會上某啲人會用「處女膜」或者外陰顏色/形狀/厚薄等去判斷女性有冇發生過性行為,但其實呢樣嘢都係因人而異,有好多因素影響住外陰顏色/形狀/厚薄,例如黑色素沉澱,荷爾蒙,年紀增長,日常磨擦等。所以外陰顏色深色並唔代表發生過性行為,或者發生過多次性行為。就好似 @Andy_StickyRiceLove 所提及嘅性別定型,「破咗處」或者外陰顏色深色都唔代表啲咩架:sneezing_face:

  3. 提醒返你一啲關於服用事後避孕丸嘅副作用~會出現頭痛、噁心、頭暈、疲倦、經痛、腹痛、背痛及乳房脹痛等現象。而且你提及到嘅「啡色血」,都係正常有機會出現嘅情況。始終事後丸屬高劑量荷爾蒙藥物,服用之後會令女性血液中嘅激素水平突然提高。到激素回落至一般水平嘅時候,就有機會產生子宮內膜部分脫落,導致流啡色分泌物/陰道出血嘅情況。最後就係服用事後丸後,亦有機會令你下次黎月經嘅日子有所變動,例如提前或者延遲幾日。如果遇到以上情況都屬於正常,唔使太擔心:relieved:

希望解答到你嘅問題:ok_woman:t2:

聽完放心咗好多:sob::sob:唔該曬你:pray:t2::pray:t2:

1個讚