婦科檢查及疫苗查詢

你好 今年25+ 隨住年紀增長
想開始定期做下檢查
見到有啲自選婦科選項 想睇下自己需唔需要做

1) 抹片檢查
聽人講係有性行為先需要做
但我同男友 暫時仲係用手指
咁樣需要做嗎?

  1. 乳房造影/超聲波檢查
    請問兩者係咪類似嘅檢查?
    我會否都需要做?

另外 想請問HPV 疫苗
係咪每個人都可以打嫁? 會唔會有其他限制:no_entry_sign:

謝謝:pray:t2:

Hello~首先好欣賞你會想定期做檢查,了解多啲自己身體嘅情況。其實好多病症初期都係毫無病徵嘅,去到出現病徵嘅時候可能已經屬於比較嚴重嘅階段,所以定期做身體檢查絕對係一個好嘅習慣!

1)抹片檢查一般係建議25歲以上有過性經驗嘅女性定期進行嘅檢查。透過抽取子宮頸嘅樣本去檢查子宮頸細胞有冇唔正常嘅病變。會建議喺有過性行為嘅人先去做係因為好多時子宮頸癌或者子宮頸病變都係由高危型嘅HPV病毒引起,而呢種病毒主要係由性行為傳播。但其實除咗HPV病毒,亦有好多其他因素有機會導致子宮頸病變,例如家族病史、吸煙、免疫力過低等等。所以其實即使未發生過陰莖插入陰道嘅性行為,如果自己有擔憂或者本身有其他上述嘅高風險因素,都會建議恆常進行抹片檢查。不過如果你以往冇進行過陰莖插入陰道嘅性行為,醫護人員好大機會都會叫你考慮清楚,因為係檢查過程係需要利用儀器輕微張開陰道,再將棉棒或者細刷伸至子宮頸位置去抽取樣本。過程中除咗有機會有不適,亦有機會會令陰道冠(坊間所講嘅「處女膜」)造成少量撕裂。但其實陰道冠就有開口,等分泌物等月經都可以自然流出,而每個人嘅陰道冠開口狀況/大細都唔一樣,所以坊間所講第一次插入式時間為會「破處」其實都係唔成立嘅 :see_no_evil:。原則上擺放棉棒或者細刷入陰道並唔會導致陰道冠出現大型撕裂,不過有部份人就會好介意自己陰道冠嘅情況,所以呢一點你都可以自己斟酌一下。如果本身冇其他風險因素,只係發生過手指插入陰道的話,會因而感染到HPV嘅機率並唔高。但都有機會其實有隱性嘅風險因素係體內,所以你都可以自行判斷一下需唔需要現時進行抹片測試呀~

2)乳房X光造影同超聲波檢查係兩樣唔同嘅檢查。透過X光造影可以清楚見到乳房內嘅狀況,亦可以觀察到未形成腫瘤嘅微鈣化點。而假如乳房內有腫塊,超聲波掃描就可以幫助分辨到到底係實體抑或係有液體係入面嘅囊腫。詳細可以睇下香港乳癌基金會有關乳健檢查嘅資訊:乳健中心 | Hong Kong Breast Cancer Foundation - 乳健檢查問與答 好多乳房組織嘅病變或者腫塊一開始出現嘅時候都未必有太多表徵,所以如果以往都無做過類似嘅檢查,都不妨做一次,咁就可以清晰咁知道自己身體嘅狀況。另外你亦可以自行檢查乳房,初步睇睇有冇硬塊嘅出現,方法可以參考香港防癌會嘅文件:https://www.hkacs.org.hk/uploadimages/download/00014/1.pdf 如果感覺到有硬塊的話,就更加建議要做晒兩項檢查。而如果以往都有係非接近經紀時出現過乳房疼痛或者乳頭有異常分泌,亦都會建議要做晒兩項檢查。你都可以徵詢一下醫生嘅意見,或者打去你準備做身體檢查嘅中心了解多啲再決定~

3)HPV疫苗可以減低感染某啲基因分型嘅HPV病毒。現時已知嘅HPV病毒大概有超過200種基因分型,當中佢哋可以分成高危型(例如16同18型-有機會導致細胞病變,如果唔治療的話可能會演變成子宮頸癌、陰莖癌、肛門癌、直腸癌或口腔癌)同低危型(例如6同11型)-有機會導致性器官出現濕疣,亦即係椰菜花)。現時嘅接種門欖係只要年滿9歲已經可以打針,一般會建議係初次插入式性行為前接種,減低體內已經感染咗HPV病毒而令疫苗嘅功效下降嘅機會。而家最常見到嘅係9合1嘅HPV疫苗,佢會針對6、11、16、18、31、33、45、52及58型HPV病毒作出保護,已經包含咗最常有人感染嘅HPV基因分型。HPV疫苗亦冇限只有女性先可以接種,因為HPV病毒對不同性別嘅身體都可以造成影響,所以任何性別嘅人有需要都係可以打架!有啲國家會限制只有某個年齡嘅女性先可以接種,但喺香港,基本上身體健康的話已經可以打HPV疫苗。如果本身有長期疾病,就要等醫生確認當時你嘅身體狀況係咪安全,適合接種。而且係打疫苗之前,醫生都會詢問一下病歷,確保你嘅身體情況適合打針先開始。如果有打算打的話,其實不妨建議埋男朋友都一齊接種,咁就可以更好地保護到大家喇~