懷孕還是遲來m?

早排冇app 就咁記 上個月月頭黎 呢個月月中黎
我有用月經app 用左6個月月經週期約33-35
通常有遲冇早 遲1-2日 但都幾準時
對上一次係一年前自己傻,驚隔住底底會中所以好似遲咗好耐
本人身體虛,血紅素不足,之前都暈低過好幾次


3/12帶套破處
24/12指插
30/12 31/12 帶套入
每次都有全程帶套(男朋友表示個套冇穿)、已經特登避過原本的排卵期(14-20/12)同+ - 7日、男朋友拎返出嚟係套入面射(冇體內射)

指插嘅時候唔確定手上有冇前列線液,不過佢話冇(我當下有問)
自己係佢戴套嘅時候摸到少少佢啲前列線液,然後掂過個套:disappointed_relieved:
定唔知係咪以下因素
12月考試壓大,21號口號考完試個作息由11:30-7:30 改為1:00-10:30(中間都會醒下咁),前排天氣凍手手腳腳好冰,呢一個禮拜更加係擔心遲黎m,早一兩日開始食白鳳丸
已經遲咗一個星期,愈來愈驚,求分析/解答:pray:t2:

Hello
首先解答咗你關於懷孕風險嘅問題先。如果你哋幾次性行為嘅整個過程都有正確咁使用安全套(關於安全套嘅正確佩戴方式可以參考:Login • Instagram ),而安全套冇穿冇漏。其實你嘅意外懷孕風險係好低嘅。 :blush:

「前列腺液」呢樣嘢係精液嘅一部分,通常係白色;而你所講嘅陰莖受到刺激嘅時候分泌嘅液體,通常係透明嘅,其實係尿道球腺液,當中有機會含有少量精子。而精子離開體外其實要靠精液/尿道球腺液提供養份先生存同埋移動到,所以當呢啲液體暴露喺空氣中會漸漸揮發,精子自然生存唔到。建議你哋之後再戴套之前,可以用紙巾抹乾凈手,咁就可以更加安心啦。 :wink:

如果你真係好擔心,與其「囉囉攣」好憂慮咁,不如去驗孕。驗孕係檢查身體內有冇hCG,hCG係受精卵著床之後身體會產生嘅激素,而卵子受精著床要6-9日時間。所以,喺最後一次性行為7日後(1月7號)驗孕,會得到初步結果;而11日後(1月11號)進行驗孕,會得到相對比較準確嘅結果。你可以購買驗孕棒,根據包裝/說明書上嘅指示去驗孕。市面上嘅驗孕棒有好高嘅「靈敏度」(sensitivity)同「特異性」(specificity),所以喺正確使用嘅情況下,結果都會好準確可靠嘅。你可以考慮聽日驗孕呀。 :relaxed:

排除咗懷孕嘅可能性之後,就可以耐心等待月經出現。
想你明白,月經係由身體幾個系統互相配合而形成,所以會受好多唔同身體因素影響,例如荷爾蒙分泌、飲食、作息、壓力、藥物等等。即使你之前嘅月經週期都比較穩定,但每人每一個月經嘅情況(包括月經週期長度、流血日數、流血量、經血顏色質地、經痛程度等等)都其實有幾會有所不同,至於你之前都經歷過因為緊張、壓力大所以月經比平時嘅平均相比遲咗。正如你自己都有講,呢排考試壓力大,考試之後嘅作息時間又有變化,呢啲生活習慣上嘅變化都會對月經有影響。甚至你擔心自己未嚟月經嘅緊張情緒都會有影響。而你又有血紅素不足嘅問題,其實呢樣嘢都係其中一種因素。至於白鳳丸嚟樣嘢,因為當中含有中藥成分,如果你體質唔啱食,就咁自行服用可能反而對身體造成負擔,亦都可能會因此導致月經有變化,建議你可以諮詢下中醫嘅意見。有或者你可以就著血紅素不足、會暈呢樣嘢睇下醫生,檢查下身體情況,睇下有冇一啲病理性嘅原因導致,需要藥物治療,定係可以靠服用營養補充劑(例如補充鐵質)或者注意日常飲食而調節情況。 :woman_health_worker:t2: :man_health_worker:t2:

至於排卵期呢樣嘢,亦都想同你解釋返,其實佢都會好似月經咁,受到唔同身體因素影響。而且,要等月經出現之後先可以推算返幾時排左卵。所以,除非每日都喺醫護人員嘅指導下用排卵試紙進行測試,否則我哋好難準確咁知道究竟邊一日排卵。有時月經週期短嘅時候,甚至月經期間已經會排卵。

可能咁樣講完你都明白,用app記錄未必可以好準確咁預計到排卵期/月經幾時會出現,因為app唔會考慮到你嘅生活作息變化、壓力程度同埋服用嘅藥物等等因素。不過有紀錄嘅習慣係好嘅,如果你連續幾個月經週期情況都有比較大嘅浮動,其實都可以考慮去睇下醫生,檢查下有冇其他身體情況導致呢個情況出現(例如荷爾蒙系統/子宮/卵巢問題)。或者有時睇醫生嘅時候,醫護人員都會詢問你嘅月經情況而作參考。所以,建議你可以將個app作為一個紀錄月經嘅工具,但唔需要依靠佢去準確咁預計自己幾時排卵/月經。

嘗試放鬆下,月經會出現嘅。有其他問題歡迎你隨時再問我哋呀! :smiling_face_with_three_hearts:

感謝你嘅回覆:pray:t2:今日黎m了
鬆左一口氣😮‍💨