排卵期 事後丸

女朋友上次12月23黎M,30號完,1月7號晚發生2次關係!

第一次有戴套完事,但過左一陣,女朋友捉住我弟弟幫我打飛機,然後突然一個轉身就騎左上黎,就甘樣內射左

雖然事後8小時,女朋友已經食左事後丸,但我地仍然有呢個顧慮,希望係度得到解答:pray:

Hello
懷孕係因為卵子同精子相遇、卵子受精、受精卵著床而造成嘅。排卵期係要等月經出現之後先可以計算返,而月經係會受好多唔同因素影響,例如荷爾蒙水平、飲食、作息、壓力、藥物等等,所以我哋可能準確咁判斷究竟幾時會排卵、幾時會月經。因此,無論喺月經週期嘅邊一日,陰道/陰道口同陰莖/陰莖分泌物(包括精液同埋尿道球腺液,陰莖喺受到刺激嘅時候會分泌尿道球腺液,當中有機會含有少量精子)有接觸,咁都會有一定嘅懷孕風險。 :confounded:

緊急避孕藥係靠高劑量嘅荷爾蒙去抑制排卵、增加子宮頸分泌物嘅粘稠度令精子難以進入身體、同埋改變子宮內膜嘅環境令受精卵難以著床,從而達致避孕嘅效果。要提醒你哋嘅係,事後藥喺香港係處方藥,要由醫生處方先可以食,未經醫生處方而買到嘅避孕藥我哋好難去判斷佢嘅藥效。如果女朋友有喺性行為72小時/120小時內睇咗醫生服用咗緊急避孕藥,服用之後冇嘔吐或者嚴重腹瀉,咁懷孕風險係好低嘅。 :blush:

都想你同女朋友知道,正正因為事後藥有高劑量嘅荷爾蒙,服用之後有機會影響1-2次月經週期嘅情況(例如月經週期長度、流血量 、流血日數、經痛程度等)。而且,同一個月經週期內唔建議食用兩次緊急避孕藥,所以有啲醫護人員會建議:服用完緊急避孕藥至到月經出現期間,唔好發生陰道陰莖插入式嘅性行為住,你哋可以考慮參考呢個建議。 :relaxed:

如果你哋好擔心懷孕風險,可以考慮自行驗孕。驗孕係檢查身體內有冇hCG,hCG係受精卵著床之後身體會產生嘅激素,而卵子受精著床要6-9日時間。所以,喺性行為7日後(1月14號)驗孕,會得到初步結果;而11日後(1月18號)進行驗孕,會得到相對比較準確嘅結果。你哋可以購買驗孕棒,根據包裝/說明書上嘅指示去驗孕。 :wink:

最後提醒返你哋,每次發生性行為嘅時候,記得全程正確咁使用安全套,咁就可以更加安心啊!
或者你哋都可以商量下,睇下女朋友會唔會考慮使用其他避孕措施,例如荷爾蒙避孕法,避孕成功率喺正確使用嘅情況下有約99%,包括避孕針同避孕藥。避孕針要由醫生檢查女朋友身體狀況之後覺得適宜使用先注射。而避孕藥雖然相對容易買到,我哋都建議第一次服用之前去睇下醫生,諮詢下意見,睇下女朋友嘅身體係咪適合、適合邊一款避孕藥。如果有需要嘅話,可以去家計會診所/母嬰健康院/部分私家診所預約見醫生。 :woman_health_worker:t2: :man_health_worker:t2:
同埋想你哋知道,避孕針同避孕藥並唔能夠好似安全套咁,有減低性病傳播同其他感染(例如尿道炎、念珠菌感染、龜頭炎、陰道炎等)嘅風險。你哋都可以考慮使用荷爾蒙避孕法嘅同時配合埋安全套一齊使用。 :smiling_face_with_three_hearts:

有其他問題歡迎隨時問啊 :sparkling_heart:

唔該曬!到時會驗:blush:同埋女朋友話最近半年既月經週期都好穩定28日,所以預計下次1月20日會黎!按照呢個日期往前14日推算,正好6號排卵,所以仍然有d擔心

之前都有解釋過,排卵係唔能夠準確推算到嘅,除非每日都係醫護人員嘅指導之下用排卵試紙進行測試。即使女朋友以往嘅月經週期都穩定,都唔代表佢嚟緊一定會20號嚟。尤其服用過緊急避孕藥,排卵同月經都有機會受到影響嘅。

現時女朋友如果已經依照醫生處方服用事後藥,並冇嘔吐或者嚴重腹瀉,其實避孕成功率都好高。除咗等到性行為11日後進行驗孕,暫時都冇其他嘢可以做到。建議你嘗試放鬆下心情,耐心等待下。 :blush: