你好，我本身食開優悅，之後因為樓下個人護理店無貨買左優思明，食左三日，個人好眼瞓，想問下如果屋企有一排備用的優悅（本身食左兩三粒）可唔可以轉食翻個排優悅？感謝
你好 @Oli 
因為優思明比優悅嘅劑量高，所以都唔太建議食完幾日中途就轉嘅，而且由低劑量轉去高劑量，都會出現少少身體狀況嘅，例如你眼訓嘅情況。比較建議你食完呢一排優思明，即係食完21日之後停7日，之後先開始轉返優悅。不過因為優思明劑量比較大，一向食開優悅（超低劑量）嘅你，身體可能都要重新適應過。
如果真係好想轉藥，都唔係唔得，但係就要買一盒新嘅藥重新開始食，唔好食備用果盒。而且因為避孕藥係荷爾蒙藥物，不斷轉換都會令月經唔會好似之前咁準，又或者狀態可能會有變化，呢點都要留意返。
當出現任何副作用，建議都係帶埋你食緊嘅避孕藥去搵家計會醫生，睇下會唔會係身體唔太適應高劑量嘅藥物。而且家計會都有避孕藥買，價錢仲平過出面添，你可以打電話去預約時間架。
正如上面所講，身體都會需要時間適應，所以都建議你啱啱轉藥嘅頭7日都用返額外嘅安全措施，例如安全套，以免係無計劃下懷孕。
同埋下次如果你再有咁嘅情況，可以先食住後備嘅優悅先，但係要記住食夠24粒後開始食4粒白色藥丸，然後無論剩低幾多藥都好，重新開過盒優悅由第一粒開始食呀。
感謝回覆