Hello, 想請問下發生性行為時陰莖既一d狀況，同女朋友做愛既時候，有時會轉一兩個姿勢會keep住硬，想射不過忍住，再轉第三/四個姿勢就愈來愈軟，想問咁樣既情況普唔普遍，同健唔健康架呢?
Helloo
其實喺性入面每個人都有自己嘅喜好，可能係某啲姿勢角度令你覺得唔舒服，或者係陰莖長期處於相同嘅刺激下耐左都有機會變軟。而呢個情況非常常見呀唔使太擔心:) 呢度可以feel多啲自己其實鍾意啲乜嘢？喺有共識嘅前提下同伴侶嘗試唔同事物亦可以增進大家嘅嘅情趣，同時亦都係一個好好嘅過程俾你去摸索自己嘅身體。
而如果想增加硬度同持久度嘅話，都可以試下凱格爾運動（Kegel Exercise)去促進海綿體嘅血液循環，增加硬度。做呢個運動前首先要感受一下相應嘅肌肉。可以喺平時去廁所嘅時候忍一忍，感受一下身體近骨盆底嘅肌肉縮放。感受到嘅時候就已經距離成功不遠了，之後就平時得閒嘅時候隨心所欲咁做呢個練習- 收縮5秒，放鬆5秒。大概每日做5組，習慣咗之後都可以延長時間至10秒（當然唔好太耐啦，記得係唔影響健康為前提下進行
）
最後都見你有提及自己想射但忍住嘅情況，呢度都想問多少少係咪有啲咩原因呀？例如擔心俾唔到性歡愉對方？補充多少少其實性歡愉同時間長短冇必然關係，而且性交時間耐咗女性嘅陰道分泌都可能會有變化。呢點都可以同伴侶溝通返，探索一下點樣做先可以令大家最舒服最享受
感謝Andy你既答覆 
我都覺女仔做耐左就會冇咁濕，通常尼講大概幾多分鐘既range會係較合適男女雙方呢 (唔計前戲)? 另外，問多句，如果多想射但忍住，會唔會容易增加發炎/ 精液倒流等等既健康風險? Thx again~!
要視乎係喺邊個時間忍住唔射
如果係 肌肉冇收縮，精液都冇進入尿道，咁樣唔會倒流
而如果係 收縮咗之後，精液亦都從輸精管進入咗尿道，但係就忍住唔射，咁樣先係逆行射精
見到你提及觀察到女仔做耐咗會冇咁濕，其實喺性興奮狀態下陰部會流出嘅分泌都係好受外在內在因素所影響嘅。除咗當時嘅身體狀況（例如荷爾蒙水平、攰唔攰、有冇服食緊其他藥物），環境中嘅空氣乾燥度等等都會影響到分泌物嘅多少同埋體感上覺得乾定濕
。而且好多時呢啲分泌都唔足夠支撐時間較長或者較激烈嘅性行為。所以其實係性行為開始嘅時候就可以使用額外嘅潤滑劑或者選擇有較多潤滑成份嘅安全套，有足夠嘅潤滑下性行為除咗會變得更加順暢，亦可以減低受傷或者令安全套破損嘅機會！
至於性行為嘅長短，其實冇一個客觀嘅標準點樣先為之適合或者理想。外國曾經有研究記錄參加者由插入到射精嘅時間，其實由一兩分鐘直到五十幾分鐘都有。而呢啲數字其實都會隨着唔同地區，同係唔同時代進行而有變化。呢啲數字亦唔代表係「最理想」或者「最適合」。因為只有你同你伴侶之間先知道幾耐或者點樣做係最適合你哋
所以如果對於性行為時間長短有考慮，都不妨直接問吓伴侶嘅意見啊～再加上其實性行為着重嘅係過程，並唔係話時間好長或者一定要令到雙方高潮先至係一個好嘅性愛體驗。點樣為之「好」應該由你哋兩個人共同去決定。
最後，關於擔心發炎或者精液倒流嘅問題，其實如果你係喺察覺到刺激度頗強，差唔多想射精嘅時候已經停止刺激，例如暫停抽插，係唔會對身體有太大問題嘅。反而如果係已經超越咗想射精嘅感覺，基本上已經感覺到精液蓄勢待發要射出，係呢個狀態下精液其實已經係尿道入邊。如果係呢個時候阻止精液排出，例如用手捉緊陰莖或者強行擋住尿道口唔俾精液排出，咁就有機會令精液無法排出體外。反覆出現的話有機會導致精液倒流或者引起尿道甚至前列腺發炎嘅情況。
唔該晒兩位既回答 