排卵期食避孕藥係咪冇效😢

我原本應該13/1黎m,12/1同男朋友搞過。
搞到一半個套穿左,即刻攞返出嚟,24個鐘內食左事後藥。
但我都係好驚,網上面話排卵期食冇咁有效:cry:
搞果日全日身體都比較熱,係咪排左卵既意思….

Hello

事後丸有分兩隻,分別係單一荷爾蒙同埋混合荷爾蒙;前者需要喺72小時內服用,後者則需要喺120小時內。
而事後丸只要喺完美使用嘅情況下(冇因為嘔吐將藥物吐出),避孕率都已經差唔多接近100%㗎啦,呢度唔使太擔心:) (見你都有提及24個鐘之內食咗)

另外「網上面話排卵期食冇咁有效」其實都唔完全錯嘅,因為以前舊款嗰啲事後丸只有抑制排卵嘅作用,但近年醫生處方嘅事後丸大多數都已經可以做到抑制排卵同埋干擾受精。不過,事後丸唔可以喺同一個月經周期內食多過一次,否則會降低效用。

以下有個網址關於緊急避孕俾你參考下呀

如果真係唔放心嘅話亦可以喺性行為11日後驗孕 。一般受精卵著床需要6-9日,所以性行為7日後驗孕已經可以有初步結果。而性行為11日後驗孕,已經可以話係準確&可靠。呢度補充多少少先,驗孕主要係檢驗尿液入面嘅hCG(卵子受精着床後身體會產生嘅荷爾蒙)水平。

此外,嚟m嘅症狀大家都會有啲唔同,所以我哋好難準確去判斷係咪關「排卵」事。例如頭痛、下腹痛、全身疲累、便秘、胸部脹大等等其實都只係一個指標,參考價值並不大呀,因為唔一定淨係嚟m嘅時候先會出現,有機會係我哋身體嘅血液循環丶疾病,或者係心理因素令到身體有呢類反應。

最後,都見你有提及condom喺性交嘅時候穿咗嘅情況,呢度常見嘅原因包括潤滑不足、喺需要嘅情況下冇補充潤滑劑 ,又或者戴上condom嘅時候冇擠走儲精囊嘅空氣,呢度都值得我哋留意呀:ok_man:t6:

我既藥係第一代食兩次果種,係咪即係無用啊 :sweat:

Hello @Ggg

第一代嘅藥其實就係72 小時之內食嘅嗰隻。 而事後丸嘅功能除咗可以延遲或者抑制排卵,亦有阻止受精同埋都減低受精卵著床機率嘅作用。所以即使已經排卵,只要身體狀況適合的話,依然可以透過事後丸做到緊急避孕嘅功效。

但由於事後丸喺香港係需要醫生處方,如果自己去藥房買藥的話,藥房有機會擔心放蛇而售賣冇藥盒甚至唔係事後丸嘅藥物。另一方面,亦唔係每個人嘅身體都適合食事後丸。所以如果你所食嘅事後丸係經過醫生處方所得到嘅,基本上都唔使擔心。

但如果你係自己去買藥,假如你好肯定自己食咗嗰個係第一代嘅藥物(有藥盒有說明書),又清楚知道係要食幾多粒,而你亦係性行為發生24小時內食咗藥,咁即使係喺藥房買嘅藥都應該係有一定嘅功效嘅。唔使太擔心。

但如果你真係好緊張嘅,咁你可以盡快去家計會嘅診所求診,同醫生講返個情況,睇下醫生會唔會建議處方另一次嘅事後丸畀你,或者係做其他嘅緊急避孕嘅方法, 例如子宮環。

宜家隻藥都係醫生開架,我係咪應該信醫生

我好擔心排卵期係咪真係更易有萬一 :sweat:

琴晚小腹好痛係咪都係藥既副作用?

Hellooo

如果係醫生開嘅,而你又喺24個鐘之內食咗,呢度可以俾自己放心先因為事後丸嘅成效都已經有接近97-99%架啦:+1:t6:(當然啦現時冇任何避孕方法可以做到100%避孕;同埋事後丸並不能作為恆常避孕措施因此都建議之後嘅性行為可以用返有效&恆常嘅避孕法eg. 安全套、避孕藥、避孕針等等)
而正如@gabi_stickricelove所講,即使已經排卵,只要身體狀況適合仍然可以達致避孕功效。

另外事後丸常見嘅副作用包括頭痛、噁心、頭暈、疲倦、經痛、腹痛、背痛、乳房脹痛等,不過正如之前提及過,呢啲只係一個指標,唔一定淨係嚟m嘅時候先會出現,有機會係我哋身體嘅血液循環丶疾病,或者係心理因素令到身體有呢類反應。如果真係好擔心都建議向醫生查詢呀。

最後如果真係唔放心嘅話,亦可以喺性行為11日後驗孕 。一般受精卵著床需要6-9日,所以性行為最快7日後驗已經可以有初步結果啦~而性行為11日後驗孕,已經可以話係準確&可靠。呢度補充多少少先,驗孕主要係檢驗尿液入面嘅hCG(卵子受精着床後身體會產生嘅荷爾蒙)水平。而坊間嘅驗孕棒準確度都好高,只要跟返驗孕棒相應嘅指示操作,喺有效時間內閱讀結果- 通常喺5至10分鐘內(以說明書所述嘅時間為準)- 基本上都唔會有大問題:+1:t6: