避孕藥副作用好似好嚴重

最近開始食事前避孕藥(優悅)食左一星期左右 最近成日好攰 反胃想嘔 心情好差 子宮悶痛 係唔係正常反應?
但我以前都食過同款三個月左右 但冇出現過副作用

定其實係懷孕初期症狀?我今個月3-9黎左m 13號發生過性行為

你好 @Hey :wave:t2::wave:t2:

都想知道你13號發生嘅性行為有無使用安全套架?有用安全套嘅話,懷孕嘅風險都係比較低嘅。而且就算真係懷孕,都唔會咁快就出現你所講嘅徵狀嘅。

如果無使用安全套,都會有懷孕嘅風險嘅,建議你聽日買驗孕棒驗孕,因為已經係性行為嘅7日後,可以得到初步嘅結果,24號可以再驗多次,果日係性行為11日,驗孕就會得到比較準確嘅結果。:relieved:

我哋好難用一啲徵狀嚟判斷有無懷孕嘅,但你所講嘅情況的確係食事前避孕藥可能出現嘅副作用,建議你拎埋盒要搵醫生檢查返。雖然你都之前有食過相同嘅藥物無咩事,但係因為事前避孕藥都係一啲荷爾蒙藥物,最近嘅生活作息、情緒、有無病過等等都會影響藥物嘅情況,所以我哋都比較建議大家去家計會買事前避孕藥,因為家計會會幫你睇下啱食咩藥,而且價錢都比出面便宜。:+1:t2:

不過你今次開始食避孕藥嘅時間唔太啱,因為避孕藥係要喺月經期間開始食嘅,唔單止確保你係無懷孕嘅情況下開始食,而且仲會幫你調節月經週期。

睇返你嘅描述,你一星期前開始食,姐係12號左右,但當時你月經已經完結,13號就已經有性行為,藥物係需要至少7日先可以係身體建立藥效,而且如果你係非月經時間內開始食藥,14日內都要使用額外嘅安全措施避免意外懷孕,如果你13號無用安全套嘅話,懷孕嘅風險係相對上比較高嘅。另外都要去家計會檢查下依家呢個情況適唔適合繼續食餘下嘅避孕藥,不過如果你驗孕之後無懷孕嘅話,原則上都可以繼續食嘅,但都係建議你打去家計會預約,同佢地講返你嘅情況,睇下會唔會可以約到上去檢查。:pleading_face:

可能坊間會話用安全期避孕,但係使用安全期避孕並唔係一個有效的方法,因為月經週期可以被好多因素影響,例如呀生活習慣嘅改變、情緒變化、有無食緊藥物同病緊等等,變相亦較難準確推算出一個絕對『安全』的日期。

你聽日去買驗孕棒驗咗孕先,如果發生咩事你都可以上嚟搵我地架,糖不甩嘅大家都會陪住你架。:smiling_face_with_three_hearts: