今個月同男朋友做左三次（雖然唔知算唔算），佢三次都冇射到，次次都因為好攰就停左，第一次係安全期嘅時候，冇帶condom，第二次已經唔係安全期，有帶，第三次係琴日，用保鮮紙……？我知我琴日真係無知，但係三次都冇射嘅，但都係少驚有b……
Hello~ 因為男性喺性興奮嘅時候陰莖通常會自動分泌尿道球腺液，當中都含有少量精子，所以體外射精並唔係一個有效嘅避孕方法。
至於計算安全期方面，一般來講所謂嘅「安全期」係指月經前嘅七日同月經起計七日。不過呢一個計算係好科學地以周期數字係28日，而且係第14日排卵去計算。但現實生活中唔係每一個人嘅周期數字都係28日，亦唔係每一個女性都係喺第14日排卵，所以一般情況下係唔會建議大家透過計算安全期或者危險期去避孕。
而且其實要月經嚟咗先至會知道到底幾時係前七日同後七日，同埋大概知道呢個月嘅周期去大概計算返排卵日。所以其實係未嚟月經嘅日子之下，係唔能夠推算到幾時排卵或者幾時係安全期嘅。
另外，保鮮紙質料並唔能夠阻隔精子同細菌，亦都無辦法喺整個性行為期間緊貼陰莖，所以照你所講嘅情況，第一次同第三次嘅性行為係有懷孕風險嘅，建議你盡快去睇醫生拎取緊急避孕藥。緊急避孕藥嘅有效服用時限係性行為後72-120小時內，因為佢喺香港屬於醫生處方嘅藥物，所以需要到家計會、母嬰健康院或者私家診所向醫生拎取，相關嘅詳細資訊可以參考以下網站: 緊急避孕 - 香港家庭計劃指導會
最後，如果暫時未有準備懷孕，建議喺每次性行為時都使用有效嘅安全措施，例如安全套、口服避孕藥、避孕針等等。
1個讚