擔心感染性病

我大約兩星期前曾因好奇去召妓, 除了發生前後有用消毒紙巾清潔外, 口交及性交的過程一直帶安全套, 最後亦未有射精。
雖然我的陰莖應該沒有明顯傷口, 但最近龜頭好像有一些白點, 我擔心自己感染了性病。
請問我應該在發生性行為後多少天去做檢測?

為什麼未能射精

第一次, 太緊張, 而且做到一半有些後悔

之前有過性經驗嗎

沒有, 第一次

Hello​:ok_woman:t2:首先想同你解釋返,當高風險體液,例如精液、尿道球腺液、陰道分泌物、腸液同血液,直接接觸到性器官、比較脆弱嘅黏膜組織(例如口腔、肛門、陰道、尿道口),特別係當上面有開放性傷口(正在流血)先會有比較大機會可以造成性病傳播。所以你嗰日嘅性行為係有帶安全套嘅話,感染性病嘅風險係相對比較低嘅。但係的確有啲性病係有機會經口交傳播,例如梅毒、衣原體、淋病同疱疹,如果對方感染咗呢啲病菌,而且有病徵,咁啱你或者對方都有流緊血嘅傷口,喺呢個狀態下口交都會係相對有風險嘅性接觸。

而你所見到陰莖上嘅白點,除非係肉粒狀或者見到內裏含膿,否則會係性病或者其他感染嘅可能性都唔高。有可能係皮膚乾燥或者過敏嘅症狀,可以再觀察多一排先,如果白點依然存在可以去搵醫生檢查一下。

如果你需要進行性病測試,社會衛生科有免費嘅測試,不過要等性行為後3個月「空窗期」後先會有相對準確嘅結果。而一啲私家診所會提供「空窗期」較短,較快出化驗報告嘅測試,你可以根據需要去了解下。不過要提返你,因為唔同性病都有各自嘅「空窗期」同「潛伏期」,亦有好多性病係感染後係毫無病徵。即使測試結果真係陽性,都唔代表係因為今次嘅性接觸導致感染。

大部份性病都可以喺藥物治療下痊癒,只有HIV病毒同部份HPV病毒暫時係無法根治,但係可以喺藥物治療下受控,只要及早發現之後盡快治療,係唔會影響到日常生活嘅。而HIV同HPV都係要通過高風險嘅性接觸先會感染到,通過口交感染嘅機會係好低啊~

最後都想提醒返你,陰莖嘅皮膚會比較幼嫩,建議用清水清潔,唔建議使用消毒紙巾,以免會令到皮膚敏感,或者破壞陰莖健康嘅環境,令到環境中嘅細菌或者病毒有機會造成感染。

最近發現在陰毛附近有一粒紅色丘疹, 請問會不會是其中一種性病?

如果只有一粒,而且無痕無痛嘅話,應該就唔係性病症狀。有時下體皮膚都會起粒,可能因為油脂/乾燥/清潔等問題。

如果你擔心,你可以好似@Feii所講,去進行性病測試。 :woman_health_worker:t2: :man_health_worker:t2: