事前藥 啡色分泌物

食緊事前藥第二個月 係yaz個隻
食到第21日 開始有啡色分泌物
到琴日食左第25日藥 已經係無藥效嘅
今日起身都係啡色分泌物
同月經差唔多 子宮都有啲痛
想問下究竟係分泌物定係月經?
我本身第一日就已經遲左12小時
所以我有食足七日之後先有無套性行為
想問下咁樣有無風險?:pray:t2:麻煩晒

Hello

服用避孕藥初期都需要比身體大概三個月至半年嘅時間適應,而服用初期有機會出現常見嘅副作用,例如流啡/點狀出血。當身體適應咗藥物,呢啲副作用就會消退(一般一至三個月後,情況因人而異,有啲人可能需要更長嘅時間去適應,所謂「唔超過6個月」都只係理論)。

根據你嘅描述,食咗二個月身體仍然處於適應期,所以如果冇嚴重副作用嘅話,暫時可以照跟住流程食唔使太擔心:)同埋啱啱開始食嘅時候,正如頭先都有提及,藥物都要時間喺體內適應,因此月經週期都未必可以咁有規律& 真係會喺食緊白色藥丸嘅時間嚟M。 但如果你而家嘅情況都同平日黎M嘅情況相似嘅話,咁就應該係黎M啦。

另外,如果係24小時之內漏服有效藥丸,一旦記起應該儘快服食,並喺下次按正常時間服藥。如果超過24小時仍未服用任何含有效成分藥丸,避孕藥的效力可能已降低。建議之後兩星期都用返避孕套(如果係漏食Yaz呢個情況);但與此同時如果你嗰七日有按時並且冇漏服嘅話,其實身體都已經建立一定嘅避孕功效唔使太擔心:)

最後,雖然你所講嘅症狀係常見嘅副作用,但避孕藥未必適合每個人。同埋每個牌子劑量不一,如果擔心嘅話都可以諮詢下醫生,睇下依家食緊嗰隻係咪真係啱自己,另外喺家計會買藥都會平一半架:crazy_face:,不過都有定心理準備如果轉藥嘅話身體都要啲時間再適應返。

唔該曬:pray:t2:
但係想知你第一段就話流啡係副作用
但係之後第三段就話係嚟m
咁所以究竟係副作用定係經期?:pray:t2:🥲

有啡色分泌物都唔洗擔心嘅,其實荷爾蒙避孕藥係用人造嘅荷爾蒙係取代本身嘅月經週期,原則上食咗藥係會抑制咗排卵嘅,而每個月出現嘅月經,都唔係因為卵子冇受精依排出嘅月經,但係點解都定時定候會見到有流血嘅狀況呢?

因為藥物嘅設計都想比使用者習慣每個月都有月經咁樣,感覺上有一個規律性同埋知道自己冇懷孕嘅感覺。所以食到最後嗰幾日冇藥效嘅藥物/停藥期,因為荷爾蒙嘅驟降,都會有少量子宮內膜出血嘅情況,形成咗你服藥之後見到嘅嗰啲出血嘅情況。雖然外界一般都會繼續叫佢做月經,但佢正式嘅學名其實係撤退性出血(withdrawal bleeding)。所以有時候喺服用事前避孕藥期間,特別係頭幾個月,見到啡色嘅出血,真係好難第一時間去判斷佢究竟係副作用嘅出血啊,定係撤退性出血。

一般來講,係接近或者服食緊冇藥效藥丸期間,如果持續出現分泌物(好似以往嘅月經咁樣),都可以認為呢一個撤退性出血,亦都係你今個月嘅月經。事前避孕藥除咗會改變月經周期,亦會改變撤退性出血/月經時出現嘅血量同顏色,未必會好似以往月經一樣係咁鮮紅色嘅。相反,因為藥物副作用而出現嘅點狀出血通常量都會比較少,而且唔會好似月經咁連續幾日持續分泌。

有撤退性出血就代表你有按時食藥,藥物生效嘅時候就能夠有避孕嘅作用,另一方面亦都代表住你無懷孕嘅。既然你由21號直到今日都有出現呢啲啡色分泌物,咁都可以判斷為今個月嘅撤退性出血/月經。

@Andy_StickyRiceLove 所講嘅,啱啱開始食嘅頭三至六個都係適應期,呢段時間比較大機會出現副作用同埋唔穩定嘅情況,例如少量嘅點狀出血、月經嘅狀態同以往唔太一樣等等嘅情況。不過如果你都一直有維持着食避孕藥嘅習慣,其實避孕嘅功效係好高嘅,可以唔使擔心。

至於你話第一日遲咗12個鐘食嘅情況,其實yaz嘅補食時間係24個鐘內都OK,所以都唔使擔心,但係都要記住之後每日都要恆常喺差唔多嘅時間內食藥呀。

另外,如果係啱啱開始食藥第一個月或者漏咗食藥補食返,咁就需要係頭/接下來七日使用額外嘅避孕措施,例如安全套。但如果你一直都有恆常地食藥嘅話,其實藥效喺身體裏邊已經建立得好穩定,都唔需要再擔心㗎啦。

最後,雖然事前避孕藥喺香港唔係一個處方藥物啦,但因為市面上避孕藥嘅牌子有好多,每隻都會有唔同嘅荷爾蒙劑量同種類,而且都唔係每個人嘅身體狀況都適合食事前避孕藥,所以都會建議係食之前搵醫生做個初步檢查,例如可以去家計會啦,而且家計會嘅藥物都會比坊間嘅平呀,如果有啲咩情況出現咗都可以再上去檢查。

如果出事啡色分泌物重可唔可以帶套曳曳?

Hello​:ok_woman:t2:見到你有另外開新post,同事會喺新post回覆你~