擔心懷孕 求指教

背景:有食優悅半年,每一至兩週偶有一兩日漏食,但漏食24小時內已補食。過去半年週期穩定,食左最後一粒白色藥當日朝早嚟m。今個月所有性行為均有帶套。上個月曾無套發生關係,因性行為前七日內,有一日漏食超過24小時,尋求醫生批准後,有食72小時內事後藥。結果上月如期嚟m,即係食最後一粒白色藥當日朝早。

是次情況:今個月食第二粒白色藥當日晏晝,即三日前嘅星期二有套發生關係,拔出後發現套已外翻,未射精。及後換套繼續,射精入套。尋日星期四,食埋第四粒(最後一粒)白色藥,月經到依家未嚟。

問題:打算朝早起身後驗孕,驗孕棒測試如果顯示為無懷孕,應否食72小時內事後藥?

你好呀 @stephen034

見到你好擔心三日前星期二發生性關係嘅時候 安全套外翻,擔心會否因為尿道球腺液(precum)而造成懷孕。 都見到你其實已經復食咗優悅半年有多嘅時間。雖然當中有漏食嘅情況,但都有係指定補食時間內食返,其實只要有正確咁服食荷爾蒙避孕丸已經會有避孕功效。如果你係星期二性行為發生前7日內都無漏食過藥物,咁今次嘅情況係唔需要另外服食事後丸嘅。
至於未來月經嘅情況,因為你上個月有食過事後丸,事後丸內含高劑量荷爾蒙,或多或少都會影響到體內嘅荷爾蒙水平,亦有機會係導致今個月月經未有係白色藥丸之內出現嘅原因。

另一方面,雖然事前避孕藥內嘅人造荷爾蒙會控制體內嘅月經周期,但其實月經仍然會被好多外在內在因素所影響,例如情緒、壓力、荷爾蒙改變等等。 有機會月經推遲係因為有一啲生活上嘅新改變導致,因此而提早或者推遲。雖然服食事前避孕藥後多數會係停藥期/服食無藥性藥丸期間嚟月經,但有時有幾日嘅差距都唔需要太過擔心嘅。可以留意下盡量適當放鬆心情,都有助月經盡快到嚟。

如果你希望驗孕,最快可以喺性行為後第七日 或者第十一日用跟足說明書進行驗孕棒測試。 驗孕棒其實係測試尿液中hcg水平,呢種激素會係卵子受精著床時開始釋放,而受精著床一般需要6-9日時間。所以如果你聽日就進行驗孕棒測試,其實係未能夠得到可靠嘅結果嘅。可以留待性行為七日後(1/2)再用驗孕棒測試。不過,如果你係下星期一(31/1)【距離服食今次呢包事前避孕藥最後一粒無藥性藥丸已經4日】都仍然未嚟月經,都建議你約見醫生作進一步檢查。
而你問到需唔需要食事後丸,因為事後丸需要後性行為發生72小時/120小時內服食,而如果本身有食開事前避孕藥的話只能夠選擇食用72小時服用個一款。由於現時距離你係星期二發生嘅性行為已經超過咗72小時,事後丸已經唔能夠發揮任何效用。所以無論你驗孕時得到任何結果,都係無需要服食事後丸。

好的!感謝 @Gabi_StickyRiceLove 詳細解惑!