需要事後丸嗎?

1/28 零晨與女朋友性愛, 有用安全套, 但係大概5-10分鐘後發現穿左, 未射亦唔見有太明顯精液。

女朋友1/8 黎過M… 1/18 因為又係穿左, 所以食左事後丸. 1/23 黎M… 1/28都仲有好少好少血, 所以有點難計安全期

請問懷孕機會大嗎?再食事後丸可以嗎?

Hello @Hello4

明白到安全套穿咗都令到你同女朋友好困擾。由於事後丸其實係一粒帶有大量人造荷爾蒙嘅藥丸,用來擾亂身體嘅狀況,抑制排卵或減低受精同著床嘅機會。雖然一般都唔建議係同一週期內服食超過一次事後丸,但因為一個月經週期係由嚟月經第一日直到下一次嚟月經前一日為止,而上次18/1食過事後丸之後已經係23/1嚟咗月經,所以其實現時對比上次食事後丸食嘅日子,已經踏入咗一個新嘅月經周期。如果有需要的話,仍然可以係得到醫生處方後,服食藥物作緊急避孕嘅。

因為事後丸係香港係需要醫生處方嘅藥物,而且有分性行為後72小時或者120小時內服用兩種,都建議女朋友盡快揾醫生求診。可以選擇去家計會診所、普通私家門診或者婦科診所。提醒女朋友見醫生時記住講返自己最近食過事後丸嘅情況,等醫生判斷女朋友嘅身體係咪仍然適合透過呢個方式緊急避孕。如果唔適合的話,其實仲可以考慮係120小時內配戴子宮環作緊急避孕,而且事後子宮環亦可以繼續留係體內,作為長期避孕嘅工具。

然後都希望同你講返,其實如你所講,係好難計安全期。不過,其實係無論有冇食事後丸嘅情況底下,安全期都係一個唔可靠嘅方法。坊間所講嘅安全期係以一個週期28日去計算,安全期嘅計算係假設咗身體會係第14日排卵,所以週期嘅第1-7日以及21-28日,亦即係所謂嘅月經前7後7日會係所謂嘅安全期。但安全期唔可靠嘅原因係:1)唔係每個人嘅週期都係28日 2)即使係28日週期嘅人都唔一定係第14日排卵 3)要去到月經出現我哋先可以計算上一個週期係幾長,再大概估算上個周期嘅排卵日同「安全期」係幾時,唔能夠係未出現月經就單憑計算日子準確知道係幾時排卵 5)除非每日都係醫生指引下用排卵棒測試體內狀況,否則無辦法準確知道係邊一日排卵。所以總括而言,計算安全期並唔可以可靠地避孕。而且,有啲週期較短嘅人甚至會係月經期間或月經月結後就排卵,而精子進入體內最長可以生存3-5日,如果咁啱遇上身體排卵,就有機會造成懷孕。再加上你女朋友近期食過事後丸,係事後丸內含嘅高劑量荷爾蒙影響底下月經週期會有更大嘅變化,變咗更難去推算下個月經週期嘅日子。

但係如果真係好擔心的話,都可以喺性行為之後第7日同第11日買驗孕棒,跟足說明書指示去驗孕, 咁如果到時候係顯示陰性的話,就即係冇懷孕嘅風險。
最後,留意到最近幾次都係因為安全套破裂而需要服食事後丸,除咗要留意返選擇合尺寸嘅安全套亦要確保自己有正確使用安全套,減低日後再次出現意外嘅機率(詳情可以參考我哋嘅文章,例如係: Login • Instagram Login • Instagram 同埋 Login • Instagram )。其實除咗安全套,荷爾蒙式嘅避孕法,例如事前避孕藥、避孕針、子宮環等都係有效率嘅可靠方法。雖然缺點係無辦法預防性病,但如果雙方都做過性病檢查,其實選用呢啲方法嘅成功率都會比安全套高,不妨考慮一下。