我有食事前避孕藥嘅習慣，但過去兩個月停咗，到今個月月經後第5日先開始食返第一粒。食咗5日，同男朋友有性行為，無用安全帶而且有內射，我擔心事前避孕藥未有避孕效果，想問下需唔需要食事後避孕藥？
過去兩個月因為停藥後荷爾蒙同月經週期都仲未調整返好，所以第一個月停食事前避孕藥嘅週期係39日，第二個月係33日。以33日週期嘅計算，我下次嘅排卵期會係6/2，但事前避孕藥影響荷爾蒙的效果，按理下次會被抑制排卵(?)咁樣算唔算安全？我需唔需要食事後避孕藥以防萬一？
Helloo
介唔介意講下你之前食避孕藥食咗幾耐? 後尾因為咩原因而停咗2個月？ 因為一般都唔建議食事前藥期間無故停藥呀，因為重新服用有機會令副作用大左& 影響左身體同藥效。因此停藥前/決定重新服用前都建議諮詢返醫生嘅意見：）
而服用避孕藥初期都需要比身體大概三個月至半年嘅時間適應，而如果你已經停食左超過兩個月嘅話，身體都可能要啲時間再重新適應返& 建立返比較穩定嘅功效。
而且停藥後因為身體逐漸回復返未食藥之前嘅狀態，因此體內荷爾蒙都會有變動影響月經；而月經其實都受唔同因素影響，例如最近有冇食過其他藥、飲食唔均衡、生活唔定時、情緒有起伏、壓力過大等等… 都會令黎月經週期變長／變短，所以出現你所提及嘅情況都係正常嘅:) 同埋你而家開始食返避孕藥，身體都需要啲時間重新適應返，所以月經嘅日子未必正如你預期一樣（6/2）；同時避孕藥的確有抑制排卵嘅作用但唔會影響健康，如果唔係有嚴重副作用影響日常生活嘅話，都可以繼續服用嘅唔使太擔心，但因為身體仲適應緊嘅緣故，建議初次/重新服用嘅頭七日性行為都用返安全套，因此嗰次嘅性行為的確係有風險存在 。
呢度想問下你同男朋友係幾耐之前發生性行為？如果喺有效時限內食嘅話，都可以考慮食事後丸呀。
事後丸可以喺家計會丶母嬰健康院丶婦女健康中心丶婦科診所等等取得，俾個網址你參考下呀:)
事後丸有分兩隻： 一隻係屬於單一荷爾蒙（72小時之內食），另一隻係黃體激素受體劑（性交後120小時之內食）。
性交後72小時內食嗰隻事後丸屬於單一荷爾蒙系列。理論上食咗已經會開始有藥性，完美使用嘅話成效都有成97-99%（期間冇因為嘔吐副作用而將藥物排出），不過都食完事後丸有機會有唔同嘅副作用，例如係頭暈丶噁心丶疲倦丶經痛等等… 甚至影響下一次月經嘅日子同埋血量，而服用呢種事後藥之後，可以繼續服用你本身食緊嘅避孕藥，但越遲食會越影響藥效；而120小時嗰隻就唔會，不過服用呢種事後藥後，同一個月經週期就唔可以再食避孕藥啦。
不過唔係每間診所都會提供兩種類型嘅藥，可以喺預約嘅時候問吓診所會有邊種藥提供到，從而按照自己需要選擇：）
呢個係關於事後丸嘅額外資訊：
如果唔太放心嘅話，亦可以喺性行為11日後驗孕 。一般受精卵著床需要6-9日，所以性行為最快7日後驗已經可以有初步結果啦～而性行為11日後驗孕，已經可以話係準確&可靠。呢度補充多少少先，驗孕主要係檢驗尿液入面嘅hCG(卵子受精着床後身體會產生嘅荷爾蒙)水平。而坊間嘅驗孕棒準確度都好高，只要跟返驗孕棒相應嘅指示操作，喺有效時間內閱讀結果- 通常喺5至10分鐘內（以說明書所述嘅時間為準）- 基本上都唔會有大問題
最後，避孕藥未必適合每個人。同埋每個牌子劑量不一，如果擔心嘅話都可以諮詢下醫生，睇下依家食緊嗰隻係咪真係啱自己，另外喺家計會買藥都會平一半架，不過都有定心理準備如果轉藥嘅話身體都要啲時間再適應返。如果真係好擔心，平時性行為都可以再配搭避孕套令自己有多啲保障：）