自從識左男朋友之後，開始有性接觸，都好驚會感染一d病毒，例如HPV(冇打HPV疫苗)。想問下衣加打仲有冇用。做過research 話對已受感染既HPV就冇用，咁如果我已加想打係唔係應該要做下HPV既測試先(想知邊度可以有呢d測試)？
另外，真係有好多關於呢方面既野好驚好無助，其實係唔係應搵婦科檢查下？同想問可以去邊䏲？
唔該晒，真係每日都好大心理壓力(因為自己係第一次，而男朋友唔係)。
Hellooo
呢度好欣賞你有呢個意識呀:)
首先「做過research 話對已受感染既HPV就冇用」，呢個講法可以再補充多少少，現有嘅HPV疫苗分別有2價、4價、9 價，現時市面上比較多見嘅係9 價，意思係佢可以cover 9種型號嘅HPV病毒，所以可以去打呀：）
因為HPV疫苗可以減低某啲基因分型嘅感染，如果之前已經感染咗 某一隻類型嘅hpv 嘅話，疫苗就唔會對 嗰隻HPV 嘅基因分型有效㗎啦，但係對於 其他類型嘅HPV，只要係疫苗cover到，而打之前你又冇受感染嘅話，都會對 其他類型嘅HPV 有效。而即使打完都好啦，都建議返定期作子宮頸抹片篩檢，因為現時嘅疫苗並不能覆蓋所有高危型HPV型號。
呢度補充多少少，現時已知嘅HPV病毒大概有超過200種基因分型，當中亦分成高危型（例如16同18型－有機會導致細胞病變，如果唔治療的話可能會演變成子宮頸癌、陰莖癌、肛門癌、直腸癌或口腔癌）同低危型（例如6同11型）－有機會導致性器官出現濕疣，亦即係椰菜花）。現時嘅接種門欖係只要年滿9歲已經可以打針，一般會建議係初次插入式性行為前接種，減低體內已經感染咗HPV病毒而令疫苗嘅功效下降嘅機會。而最常見到嘅係9合1嘅HPV疫苗，佢會針對6、11、16、18、31、33、45、52及58型HPV病毒作出保護（已經包含咗最常有人感染嘅HPV基因分型）。
如果你想打之前檢查一下係咪已經感染咗某種類型嘅HPV分型，坊間都有啲診所提供HPV病毒基因檢測(椰菜花檢查)嘅服務，不過價錢會貴少少；另外亦都可以選擇做子宮頸細胞檢驗，佢主要係檢查子宮頸細胞有冇不正常病變。 不過出現不正常細胞並不一定代表有癌症。 若檢驗結果顯示細胞有病變，一般會作進一步檢查（例如陰道鏡檢查）。而 家計會 /其他婦科診所都有提供婦科&子宮頸細胞檢驗嘅服務。假設檢測結果話你感染咗某一隻類型都好啦，疫苗依然會對其他類型嘅HPV有作用㗎。
呢度都俾啲資訊你睇吓:) 另外因為疫情關係，都記得留意下現時門診服務會唔會有啲咩update
另外都有一點值得注意，如果本身有長期疾病，就要等醫生確認當時你嘅身體狀況係咪安全，適合接種。而且喺打之前，醫生都會詢問一下病歷，確保你嘅身體情況適合打針先開始。如果最近接種過其他疫苗嘅話會建議最少四星期之後先再打其他疫苗，以免影響功效。
最後，都想問下你哋平時發生性行為嘅時候會唔會用安全套？：）如果冇嘅話的確會有風險呀；假設男朋友之前發生嘅性行為冇用安全套，而對方又有HPV嘅話，的而且確有可能感染到再傳返俾你，如果有做定期檢查，冇咩異樣嘅話其實都唔使太擔心。另外之後嘅性行為如果有呢類擔憂嘅話，都可以考慮用返安全套減低感染性病嘅風險。安全套喺冇過期、冇穿冇漏、啱size（安全套喺使用以緊貼陰莖為準）先發揮到最大功效，而使用時記得將安全套套到落根部最底，並將儲精囊內嘅空氣擠出先用：）
最後，HPV疫苗亦冇限只有女性接種，因為HPV病毒對不同性別嘅身體都可以造成影響，所以任何性別嘅人有需要都係可以打架！基本上身體健康的話已經可以打HPV疫苗。如果計劃好打嘅話，不妨建議埋男朋友都一齊接種，情侶一齊接種都係非常非常正常嘅事呀，我相信你會有咁樣嘅擔憂並唔係唔信任對方，更加多嘅係想雙方都有保障，為大家嘅健康着想。如果真係擔心都可以同男朋友溝通返，一黎可以更好地保護到雙方，二黎你都唔使再獨自承受呢份擔憂
好多謝你咁詳細既答覆呀！
有呀，我地會用安全套。只係佢幾個月之前有一次佢係度磨既時候冇。個次之後自己做左好多research睇STD既資料，睇到好驚，之後每一次接觸既時候都有用安全套。而男友已經應成左我佢會去驗。
因為我真係好擔心好不安，所以都有檢查自己下面既習慣。見到自己小陰唇前端(不是內側和外側)有對稱的肉芽，同小陰唇的線條係連埋一齊，唔知係唔係一直都有定係係小陰唇既形態，呢個可唔可以問下你地有冇相關資料？如果唔係，有可能係假性濕疣？因為睇過同椰菜花好唔同。其實我已經預約左做婦科檢查，但因為要就經期同年假，冇咁快睇到，所以想問下你地。
麻煩晒你地呀!
Hello
首先好欣賞你哋發生性行為會使用安全套啊，因為使用安全套係最有效預防性病同埋避免意外懷孕嘅安全措施。見你都有提及男朋友會去做性病檢測，咁就太好啦
情侶一齊做檢測或者接種疫苗都係想雙方有保障，咁大家就唔需要為性健康有咁多嘅擔憂～
至於你發現自己小陰唇前端有對稱嘅肉芽，有以下三種嘅可能性：
-
椰菜花(性病疣)：由低危型人類乳頭瘤狀病毒(HPV)引發，佢會喺性器官或者周圍出現痕癢但唔痛嘅肉粒，形狀多為細小粒狀、扁平或菜花狀，所以如果你發現小陰唇前端嘅肉芽冇出現痕癢嘅情況，咁好大機會唔係椰菜花，而係假性濕疣
-
外陰部毛囊炎：外型類似暗瘡，有機會有紅腫或者疼痛嘅情況，發炎過程中有可能會含膿、熟透、凋謝。主要原因係因為內衣唔透氣，清潔度不足，皮脂分泌太旺盛而堵塞毛囊，剃毛時太接近毛孔導致刮傷皮膚等。
-
假性濕疣：外型主要係淡粉紅色嘅息肉、肉芽、魚籽狀，約1-2mm，會密集成片或者呈條帶狀生長喺小陰唇、大陰唇、尿道口、陰道口旁邊、近肛門位置。而科學上仲未有一個準確嘅原因解釋假性濕疣嘅出現，有可能係因為荷爾蒙水平波動造成。但現時我哋知道嘅係呢啲假性濕疣並無傳染性，對身體亦冇明顯嘅影響，最重要嘅係佢唔會造成任何疼痛，痕癢或燒灼嘅感覺，而且有少部份人嘅假性濕疣會隨着年紀嘅增長，自然萎縮或者消失，大部份人一直都毫無變化。亦有人會因為外觀問題而去做激光手術消除呢啲肉粒。
如果你冇出現任何痕癢，紅腫，疼痛嘅情況，基本上都可以排除係椰菜花或者外陰部毛囊炎。至於你話「肉芽同小陰唇的線條係連埋一齊」可能要詳細講多少少，因為一般嘅假性濕疣係會一排咁樣出現，如果只係一粒或者幾粒狀嘅外型就未必係假性濕疣。所以而家呢個情況都好建議你去婦科檢查
明白因為新年同埋疫情嘅影響，未必好快可以做到性病檢測同埋婦科檢查，呢段時間都避免自行擠壓或者針刺肉芽，因為造成傷口嘅話好容易會引起細菌感染或者發炎。有恆常檢查自己嘅性器官狀況係一件好好嘅事
除咗可以及早發現問題，亦都可以好好了解吓自己嘅身體啊
1個讚
另外，想請問下你地知唔知HPV的空窗期係幾耐架？因為想係打HPV針之前check下HPV病毒基因檢測。但衣加好擔心如果已經感染左HPV病毒，而令疫苗嘅功效下降。好驚會develop做子宮頸癌。男朋友都已經應承自己會去做HPV病毒基因檢測先，但我真係好驚佢有。如果係，而又令我有，我會好後悔。
雖然每次都有用condom，但之後察覺到自己有d過度恐懼男朋友有HPV病毒同其他性病，所以覺得自己應該因擔心病毒有性恐懼，所以想搵你地開解下。
Hi 
HPV嘅「空窗期」大概為7－14日（即係感染病毒7－14日後先會容易檢測到），而潛伏期可以長達8個月甚至更加耐（即係有機會感染咗病毒，但一直冇任何症狀）。
我哋之前已經解釋過，HPV病毒有好多唔同嘅變種，唔係每一種HPV病毒都會發展成為癌症，而且發現及時嘅話，情況係會被改變。即時只同單一嘅性伴侶發生性行為，仍然有機會會感染HPV，所以要記得打疫苗、發生性行為嘅時候使用安全套、同埋恆常做測試。你可以每年去預約做抹片測試，了解自己嘅身體情況，醫護人員亦會根據你嘅測試結果建議你需要進行測試嘅頻率（例如有啲HPV感染個案，醫生會建議靠身體自身嘅免疫系統去解決，並唔會處方藥物，但會要求每6個月進行一次抹片測試，睇下康復情況）。 
欣賞你同伴侶每次性行為都有使用安全措施，只要每次性行為全程都有正確咁使用安全套，性病嘅感染風險係會降低嘅 
。而如果你擔心嘅，你亦可以考慮使用口交套、指套呢啲安全措施，減低性病／其他感染（例如念珠菌、陰道炎、龜頭炎等）嘅風險。 
你亦可以同伴侶溝通，做一次全套嘅性病測試，了解身體情況，令雙方都安心。 
最後想你知道，性病其實係透過高風險體液，例如精液、尿道球腺液、陰道分泌物、腸液同血液，直接接觸到性器官、比較脆弱嘅黏膜組織（例如口腔、肛門、陰道、尿道口），特別係當上面有開放性傷口（正在流血）先會有比較大機會可以造成傳播，而且亦必須要其中一方係感染者先有機會造成傳播。
現今醫學昌明，除咗部份病毒感染（例如HIV感染）唔能夠根治之外，其他性病感染可以靠藥物／醫療程序幫助下痊癒；而暫時未能根治嘅感染，都可以靠藥物控制病情，並唔會影響日常生活。希望你了解完之後會安心啲！ 
1個讚