選擇事前避孕藥

我依家20歲
我不嬲M唔準
想用避孕藥去調經
所以前幾日去咗睇婦科醫生打算問下我點解啲M唔準
同埋可唔可以用避孕藥去較返準啲週期

咁醫生最後就話我有輕微多囊卵巢症 所以M唔準
建議我食低劑量既避孕藥去解決月經唔準時
最後開咗Microgynon 30比我食

我有幾樣野想問
1)我返到屋企上網再search 發現原來microgynon係第二代既避孕藥
好似比起第四代既避孕藥會多啲副作用
因為佢係用 Levonorgestrel(黃體素) 加 Ethinyl Estradiol(雌激素)
我上網搵見到Levonorgestrel 同其他牌子避孕藥比較既話
佢既雄性素活性最高
即係會易啲生瘡 體重增加 焦慮等等


所以我想問下其實你地會唔會知點解醫生會開呢隻藥比我 而唔開第四/第三代既藥比我?
佢比起第三四代既藥有咩優勝之處?
會唔會建議我遲啲轉返第四代 定都係要再問下醫生意見?

2)唔同代既避孕藥會唔會話避孕效果唔同定其實都差唔多?eg 第四代既避孕效果好過第二代

3)我知道無套既話點都會有機會有咗
但如果 無套唔內射有咗 既機會會唔會比起 無套內射既機會低?定其實差唔多咁大機會

如果無套唔內射有咗既機會低啲
喺我食咗事前既情況下 我無套唔内射有咗既機會係咪超低?

4)避孕藥既成功機會有99%
咁其實淨低嗰1%我係咪只要日日凖時食藥、冇屙、冇嘔、冇食啲會影響避孕藥藥效既野
就可以100%成功?

5)如果我知對方冇性病
而我又有準時食藥、冇屙嘔、冇食其他藥
雙重避孕對我嚟講必要性大唔大?

6)因為醫生話我有輕微多囊卵巢症
好似話有呢個病既話
受孕機會會低啲
咁其實我係咪唔洗咁擔心會有咗:joy:

我好似好多野問:rofl:唔該哂你

Helloo

1)「我想問下其實你地會唔會知點解醫生會開呢隻藥比我 而唔開第四/第三代既藥比我?
佢比起第三四代既藥有咩優勝之處?
會唔會建議我遲啲轉返第四代 定都係要再問下醫生意見?」

因為避孕藥每個牌子劑量不一,所以唔係每個人都適合所有牌子,有啲人甚至唔適合食避孕藥。例如過去或現在患有血栓塞、乳癌或性器官癌症、不明的陰道出血、嚴重的肝病、腦血管或冠狀動脈疾病、嚴重高血壓和糖尿病嘅婦女、懷疑或證實已懷孕的婦女,以及有吸煙習慣而年齡又在35歲以上的婦女,都不宜服用避孕丸。因此醫生係根據你嘅身體狀況去評估你適唔適合食&應該食邊一隻嘅。而避孕丸嘅常見副作用包括噁心、體重增加、頭暈、頭痛、乳房脹痛、水腫及情緒轉變。呢啲現象一般屬於輕微及短暫,可於數週後消失。

另外,levonorgestrel既常見副作用係容易生痘痘同水腫。相對而言,第三代嘅雌激素含量則小於0.05毫克,甚至有小於0.03毫克的超低劑量。第四代擁有抗雄性化嘅活性,因此幾乎無痘痘、出油或毛孔粗大等困擾。不過,服用超低劑量配方嘅避孕丸都有需要注意嘅地方,喺服用頭三個週期都有機會出現不規則出血嘅副作用。一般嚟講1-3個月後身體適應咗藥物呢啲副作用就會消退。不過情況亦會因人而異,有啲人嘅身體可能需要更加長嘅時間去習慣藥物,不過理論上唔超過6個月。而亦都有啲人係要轉幾次藥,先搵到最適合自己嘅藥。而即使嗰隻藥可能副作用會比較多,但都唔代表每個人都一定會有,如果冇出現咩嚴重副作用影響生活嘅話你可以選擇繼續食先,真係好擔心嘅話都可以再同醫生講下,睇下有冇轉藥嘅需要。

2)唔同代既避孕藥會唔會話避孕效果唔同定其實都差唔多?eg 第四代既避孕效果好過第二代

市面上有好多事前避孕藥嘅牌子可以選擇,但即使係唔同代都好,我哋可以簡單以藥物含量&成分差異去比較,每隻牌子嘅避孕丸都可能有「不同含量嘅雌激素」&「不同嘅黃體素」嘅組合。
而避孕藥嘅原理,係通過人造荷爾蒙去抑制排卵,改變子宮頸黏液嘅粘稠度,同埋改變子宮內膜環境,達致避孕嘅功效。因此即使唔同代,佢嘅避孕功效都係差唔多嘅,主要分別在於劑量不同而造成嘅副作用,因此揀啱自己適合嗰隻避孕藥好緊要呀。

3)我知道無套既話點都會有機會有咗 但如果 無套唔內射有咗 既機會會唔會比起 無套內射既機會低?定其實差唔多咁大機會
如果無套唔內射有咗既機會低啲 喺我食咗事前既情況下 我無套唔内射有咗既機會係咪超低?

無套唔內射有咗& 無套內射既機會 嘅機會可以話係差唔多,即使冇內射成日都好,因為喺過程中男性分泌嘅尿道球腺液(precum) 或者 前列腺液 有機會流入陰道構成懷孕風險。如果擔心嘅話,都建議之後性行為都可以再配合用安全套。

(尿道球腺液:男性喺性行為時因為性興奮而有機會分泌出透明黏稠狀嘅液體,當中都有存在精子;
前列腺液:白色黏稠狀,當中都有存在精子)

而如果你已經長期有食避孕藥,身體已經建立左一定穩定嘅功效,並且服用期間冇出現漏服&喺有效時限內服用,基本上唔使太擔心啊:)避孕藥對 無套唔內射有咗 & 無套內射 都係差唔多一樣咁有效。

4)避孕藥既成功機會有99% 咁其實淨低嗰1%我係咪只要日日凖時食藥、冇屙、冇嘔、冇食啲會影響避孕藥藥效既野 就可以100%成功?

呢個問題都好值得關注,容我補充一點。現時坊間冇任何避孕措施可以擔保100%成功避孕;另外亦唔代表無套性交就必定會100%懷孕。即使完美服用避孕藥都好,可能都會有啲我哋未能預測嘅身體因素影響到個藥效(雖然作用可能好微好微),冇辦法100%擔保成功;不過只要冇出現漏服&喺有效時限內服用、冇屙冇嘔,其實個避孕功效都已經好高好高,呢度唔使太擔心啊。
如果真係好擔心嘅,亦可以喺性行為11日後驗孕確保自己冇懷孕 。一般受精卵著床需要6-9日,所以性行為最快7日後驗已經可以有初步結果啦~而性行為11日後驗孕,已經可以話係準確&可靠。呢度補充多少少先,驗孕主要係檢驗尿液入面嘅hCG(卵子受精着床後身體會產生嘅荷爾蒙)水平。而坊間嘅驗孕棒準確度都好高,只要跟返驗孕棒相應嘅指示操作,喺有效時間內閱讀結果- 通常喺5至10分鐘內(以說明書所述嘅時間為準)- 基本上都唔會有大問題:+1:t6:

5)如果我知對方冇性病 而我又有準時食藥、冇屙嘔、冇食其他藥 雙重避孕對我嚟講必要性大唔大?

如果雙方已經做過檢查,確保冇性病嘅話,都可以按照個人意願去選擇用安全套做雙重避孕嘅。不過有樣嘢我哋都可以留意,避孕套除咗可以預防性病,亦都可以預防埋其他因為性接觸而有機會感染到嘅病例如念珠菌陰道炎。另外,避孕藥(喺有效嘅服用條件下)本身已經有功效,配合埋避孕套雖然都會令避孕功效提高左,但唔會擔保一定去到100%。

6)因為醫生話我有輕微多囊卵巢症 好似話有呢個病既話 受孕機會會低啲 咁其實我係咪唔洗咁擔心會有咗

雖然呢個症的確會令受孕機會低咗,但都唔代表不育呀,換言之不安全性行為同樣會為你帶嚟懷孕嘅風險,呢度可以根據自己需要選擇適合自己嘅避孕方法,例如安全套/避孕針/避孕藥等等。

好啊 明白 唔該哂你啊