排卵期食事後丸

你好, 經期不嬲唔準, 食左兩年事前避孕藥, 中間停過藥再食返, 今年1月5日再次正式停左事前避孕藥, 1月7-11日黎m。

1月22日突然有啲好黏既分泌物, 睇返都係差唔多時間排卵, 諗住今個月會差唔多正常時間(2月4日=cycle第28日)黎m。

1月31日開始nipple有啲痛, 2月1日就右邊小腹痛左兩次, 以為就黎黎m, 所以2月3日無套外射左一次。
但諗諗下睇返之前自己紀錄,上次停藥期間都係nipple痛同右小腹痛既時候排卵, 前後時間同時有蛋清分泌, 然後十幾日後黎m。

即係話可能我而家先至真正排卵, 但呢幾日冇蛋清分泌物, 所以大意左, 以為係就黎m​:pensive:所以我完事個半鐘內食左一粒Levonorgestrel 1.5mg 事後丸, 想請問

  1. 上網睇話如果已經排卵, 事後丸就會無用, 請問到底係咪真? 事後丸證實係咪可以阻止受精同無咁易著床?

  2. 性行為後11日後驗孕就可以確定冇懷孕? 因為我見有建議食完事後丸21日後驗孕先準確

  3. 呢段期間係咪冇其他野可以做? 因為我有少少焦慮症, 因為呢件事都嚴重失眠同影響情緒, 而家都非常後悔同驚恐:pray:t2::pray:t2:

謝謝:pleading_face:

Helloo

介唔介意講下你之前因為咩原因停咗再食?因為一般都唔建議食事前藥期間無故停藥呀,重新服用有機會令副作用大左& 影響左身體同藥效。因此停藥前/決定重新服用前都建議諮詢返醫生嘅意見:)

而服用避孕藥初期都需要比身體大概三個月至半年嘅時間適應,而如果你已經停食左一段時間嘅話,身體都可能要啲時間再重新適應返& 建立返比較穩定嘅功效。

而且停藥後因為身體逐漸回復返未食藥之前嘅狀態,因此體內荷爾蒙都會有變動影響月經;而月經其實都受唔同因素影響,例如最近有冇食過其他藥、飲食唔均衡、生活唔定時、情緒有起伏、壓力過大等等… 都會令黎月經週期變長/變短,而你所講嘅分泌物變黏稠&小腹痛& 胸部壓痛有機會係經前症狀唔使太擔心:)

不過,正正因為月經受唔同因素影響,因此我哋要等月經出現先可以推算返嗰個週期令我地難以準確預測「安全期 / 危險期」,所以佢並唔係一個好有效嘅避孕方法呀。如果之後擔心懷孕嘅話都建議用返一啲有效嘅避孕方法例如安全套/避孕丸/避孕針等等……

而事後丸主要有兩種,一隻係屬於單一荷爾蒙(72小時之內食),另一隻係黃體激素受體劑(性交後120小時之內食)。你食嗰隻Levonorgestrel屬於單一荷爾蒙。只要性交72小時內食已經會開始有藥性,完美使用嘅話成效都有成97-99%(期間冇因為嘔吐副作用而將藥物排出),不過都食完事後丸有機會有唔同嘅副作用,例如係頭暈丶噁心丶疲倦丶經痛等等… 甚至影響下一次月經嘅日子同埋血量;佢嘅原理係透過抑制排卵,干擾受精過程&改變子宮內膜環境令受精卵唔能夠著床,所以無論食事後丸之前有冇排卵/卵子有冇受精,只要喺有效時間之內服用,而且冇喺短時間内嘔吐/腹瀉,咁避孕成功率都會係好高㗎啦:) 就算你服藥前已經排咗卵,都依然會有藥效。

另外,一般受精卵著床需要6-9日,所以性行為最快7日後驗已經可以有初步結果,而性行為11日後驗孕,已經可以話係準確&可靠。呢度補充多少少先,驗孕主要係檢驗尿液入面嘅hCG(卵子受精着床後身體會產生嘅荷爾蒙)水平。而坊間嘅驗孕棒準確度都好高,只要跟返驗孕棒相應嘅指示操作,喺有效時間內閱讀結果- 通常喺5至10分鐘內(以說明書所述嘅時間為準)- 基本上都唔會有大問題:+1:t6: 所以你可以選擇喺性行為11日後驗孕,如果結果顯示你冇懷孕嘅話都可以容讓自己相信呢個結果;但如果真係好唔放心嘅話都可以去醫院做抽血驗孕,呢個方法會最最最最準。

呢段期間要不斷承受呢份擔憂辛苦你了,但同時我都好欣賞你願意搵方法同呢份焦慮和解。文字入面我都好感受到你嗰份擔憂同緊張,一嚟如果真係好擔心會懷孕嘅話下次性行為可以配合用返安全套等等措施(避免用安全期避孕),同時呢段時間都可以做一啲幫助自己放鬆嘅練習,例如腹式呼吸- 搵個舒服嘅位置瞓低/坐低,之後可以深深吸一啖氣,吸氣嘅時候你會感受到個肚微微脹起,呼氣嘅時候你會感受個肚微微收縮;如果過程中覺得暈嘅話可能係吸得太多氣,可以喺吸氣之後hold一兩秒先再呼氣,平時覺得緊張嘅時候都可以做呢個練習:)另外都可以喺日常生活中建立靜觀嘅習慣,不過佢就唔係for放鬆嘅,主要係提升對自身嘅覺察。每種情緒嘅出現都有佢嘅原因,可能佢都有啲嘢想提醒你甚至保護你,但同時佢可能用錯左方法,因此令你成日覺得好辛苦,但呢份焦慮不代表你,佢只係你整體嘅一部分。如果你覺得已經嚴重影響左生活,都可以考慮同專業人士傾下,糖不甩嘅大家亦會喺度陪住你:)

多謝你地呀:pray:t2: 因爲乳房問題,驚長時間食避孕藥會惡化,所以選擇左停藥:pensive:

請問性行為後最快幾多日可以抽血驗孕有最準確既result?

另外今日係食事後丸day4, 而家要食消炎藥會唔會影響?:pleading_face::pray:t2:

Hello​:ok_woman:t2:的確食避孕藥會為身體帶來好多副作用,亦未必適合每個人,見到你話因為乳房問題所以選擇停藥,如果之後重新服用避孕藥或者服用其他藥物之前都建議先向醫生資訊,檢查一下自己身體係咪適合某一種嘅安全措施或者藥物啊~

抽血驗孕同尿液驗孕一樣,都係喺驗體內嘅hCG水平,所以性行為後11日進行驗孕會有較準確同埋可靠嘅結果~不過如果驗血的話都係要去診所做,就要視乎返個別診所所用嘅測試工具。

至於你提及服用消炎藥會唔會有咩影響,緊急避孕藥喺服食同比身體消化後已經會開始發揮作用,而家已經係你食藥後嘅四日,原則上食消炎藥的話都唔會有交互作用。但如果你擔心嘅話,可以向處方消炎藥俾你嘅醫生查詢一下。