平時同男朋友進行性行為嘅時候
有時除會摸到套外有啲白色液體
唔係好肯定係漏咗出嚟定係我自己嘅
因為聽講女仔嗰啲係透明嘅
所以成日都會心慌慌
而且男朋友用開嘅套都有少少鬆
（男朋友完全硬嘅時候先啱size）
尋日同男朋友有幾次性行為
男朋友射咗少少喺個套到仲有繼續性行為
中途仲有軟咗少少（個套鬆鬆哋）
所以更驚會漏出嚟
雖然冇穿
但因為好驚所以都下定決心想去家計會買避孕藥
啱啱已經喺家計會website 度登記咗
所以想問吓流程會點？想知多少少冇咁緊張
仲有係唔係唔太建議以上我男朋友嘅做法？（射咗啲仲繼續性行為）
另外仲想問吓男朋友pre cum 都幾多吓，咁樣正唔正常？
Hello
如果你已經喺家計會嘅網站進行咗網上預約，家計會職員應該今日已經聯絡咗你，了解你需要進行緊急避孕嘅原因同埋約時間，如果佢哋今日未有時段俾你見醫生，聽日應該會盡快聯絡你，如果你未收到佢哋電話，可以留意住電話／電郵。 
：去到需要登記，同埋問一啲你嘅個人資料、身體狀況、性行為經驗，需要填表。而個人資料係會保密嘅，家計會亦唔會喺未經你同意嘅情況下，聯絡你嘅家人。
然後就會見醫護人員，護士會為你做簡單嘅身高、體重、血壓記錄，了解你嘅月經週期情況、性行為經歷、使用嘅避孕措施、有冇長期病患等。醫生亦會評估你嘅身體情況，然後依照你嘅需要處方藥物俾你。
通常你要喺診所食完藥先離開，醫護人員會同你解釋有機會出現嘅副作用，同埋通常會建議，直至月經出現前，都唔好發生陰道陰莖插入式嘅性行為。
由於疫情，而家家計會唔俾人陪同你入診所。同埋記得帶身份證同埋足夠現金（家計會只收現金），關於收費，可以參考：青少年保健 - 香港家庭計劃指導會
陰部受到刺激嘅時候，係會有透明嘅分泌物。而喺性行為摩擦嘅過程中，會變白色（就好似拂蛋白咁）。所以，如果安全套冇破損、冇漏嘅情況下，嗰啲液體應該唔係精液。 
根據你所講嘅情況，可能安全套尺寸唔啱，所以男朋友會覺得鬆／唔舒服，而唔啱尺寸嘅安全套，係會影響避孕功效嘅。你可以參考呢個安全套尺寸嘅資訊：Login • Instagram
而正確使用安全套嘅方法，可以參考：Login • Instagram
除咗揀啱安全套嘅尺寸、佩戴嘅時候分清正反、擠走儲精囊空氣、戴至陰莖底部呢啲確保安全套成功率嘅注意事項以外，射精之後亦有嘢要留意 
：射精之後，要盡快㩒住安全套底部抽出體外，以免陰莖疲軟之後，安全套脫落留喺陰道內。唔建議射精之後陰莖繼續留喺陰道內
你所講嘅應該係陰莖受到刺激嘅時候分泌嘅透明嘅尿道球腺液，當中有機會含有少量精子。所以我哋建議性行為全程都使用安全套，避免陰道／陰道口接觸到尿道球腺液而有懷孕風險。
尿道球腺液嘅量同好多因素有關嘅，例如年齡、荷爾蒙、刺激強度、作息、壓力等等身體情況。如果冇特別顏色／異味嘅話，就唔需要擔心嘅。
有其他問題歡迎隨時問我哋呀～ 
多謝你哋嘅回覆，解答得好詳細
我今日已經去咗保健中心同食咗事後丸啦
但係我到依家都好似feel唔到有副作用，咁樣係唔係正常？
食完事後大概幾耐之後先會有副作用㗎？
依家開始有啲暈暈哋，冇胃口又想嘔咁，唔知關唔關事呢？
Helloo
有啲人食完之後可能會出現頭痛、噁心、頭暈、疲倦、經痛、腹痛、背痛及乳房脹痛等現象。不過唔一定會出現副作用呀，因為每個人嘅體質都唔同。而一般情況下副作用唔會持續超過廿四小時，如果真係好唔舒服/持續左一段時間都可以向開事後丸俾你嗰位醫生查詢下。
而事後丸主要有兩種，一隻係屬於單一荷爾蒙（72小時之內食），另一隻係黃體激素受體劑（性交後120小時之內食）。完美使用嘅話成效有成97-99%（期間冇因為嘔吐副作用而將藥物排出），唔使太擔心：）
如果唔太放心嘅話，亦可以喺性行為11日後驗孕 。一般受精卵著床需要6-9日，所以性行為最快7日後驗已經可以有初步結果啦～而性行為11日後驗孕，已經可以話係準確&可靠。呢度補充多少少先，驗孕主要係檢驗尿液入面嘅hCG(卵子受精着床後身體會產生嘅荷爾蒙)水平。而坊間嘅驗孕棒準確度都好高，只要跟返驗孕棒相應嘅指示操作，喺有效時間內閱讀結果- 通常喺5至10分鐘內（以說明書所述嘅時間為準）- 基本上都唔會有大問題
明白，唔該晒你～